Read Tzeltal Proverbios 27 Bible Online

Proverbios 27 - Tzeltal bible

Proverbios 27

¹Ma me xatoy aba ta scuenta pajel, como ma xana' te bin ya xc'oht ta pasel te pajele.

²Ac'a yalbat lec ac'oblal yan, ma ha'ucat nix yac awal aba; ha lec yan, ma ha'ucat nix yac awal.

³Al ta liquel te ton soc te hi', pero c'ax hich yalal ta schebal te yilimba te mach'a ma sna' q'uinale.

⁴Te ilimba ya x'uts'inwan, te sc'ahc'al-o'tanil ya xjinawan, pero ¿mach'a ya xcuhch yu'un te ti'ti'o'tantayele?

⁵Ha lec xan te tsitsel ta jamal te bin ut'il c'uxul-o'tanil te muquen aye.

⁶Ya xcoltaywan te ehchen ya yac' te mach'a c'uxat ta yo'tan, pero ha lot te uts'uyel yu'un te mach'a ya sp'ajat.

⁷Te mach'a nojel sch'uht, ya sp'aj te chabe, yan te mach'a ay swi'nal, chi' ya ya'iy te bin ch'a.

⁸Hich te bin ut'il ha'mal mut te ya yihquitay hilel te spechech, hich ay te mach'a ya yihquitay hilel te slumale.

⁹Te aceite soc te perfume ya yac' yutsil-o'tanil, soc te tojobtesel yu'un te amigo ya xlecub q'uinal yu'un.

¹⁰Ma me xapihtes aba soc awamigo o te yamigo te atate; soc ma me xbahat ta sna awermano te bin ora ay awocol, ha lec xan te apat-axuhc te nopol ay te bin ut'il awermano te namal aye.

¹¹Jnich'an, ayuc me sp'ijil awo'tan, hich me yac awac' tse'ejinuc co'tan; hich ya xhu' ya jsuhtesbe sc'op te mach'a ya sp'ajone.

¹²Te mach'a p'ij yo'tan, c'alal ya yil te bin chopol, ya snac' sba ta stojol, pero te mach'a ma stsahtay sba ya sohl xan bahel, ya xc'ax swocol yu'un.

¹³Ich'beya sc'u' te mach'a ya stehc'an sba yu'un sbette mach'a ma sna'be sba; ich'beya bin ya yac' te mach'a ya stehc'an sba yu'un sbette ants te howiyem bahele.

¹⁴Te mach'a ya yalbe ta aw lec sc'oblal te amigo ta buen sab, ha ma lecuc sc'oblal ya x'a'iyot.

¹⁵Te jtuhl ants te ya x'utawan pajal soc t'ojob ta yorahil ha'al;

¹⁶teme ya yich' comele, hich c'ohem te bin ut'il scomel ic', o stsaquel ta swa'el-c'ab te aceite.

¹⁷Te taq'uin ya yich' huxbeyel ye ta yan taq'uin, ha nix hich te winic, ya xp'ijub ta scuenta yan winic.

¹⁸Te mach'a ya scanantay te higuera, ha nix ya slo'be sit, soc te mach'a ya scanantay te yajwal ya x'ich'ot ta muc' yu'un.

¹⁹Hich te bin ut'il ya xchicnaj snohc'otal ta ha', ha nix hich te yo'tan te winic te ya yac' chicnajuc te stalele.

²⁰Te yawil mach'atic chamenic soc te yawil jinel mayuc bin ora te tic' ya ya'iy a, ha nix hich te sit te winic, mayuc bin ora ya xlaj yo'tan ta ilaw.

²¹Te plata ya xtsajot ta banti ya x'uhltesot, te oro ya xtsajot ta horno, te winic ya stsajot yu'un te lec sc'oblal ya xhalot.

²²Aunque yac aten ta juch'el te mach'a ma sna' q'uinal, hich te bin ut'il ya yich' juch'el te trigo, ma ba ya yihquitay te sonsohile.

²³Na'a ta lec bin yilel te tuminchijetic awu'un, ilawil ta lec te chambahlametic awu'une;

²⁴como ma spisiluc ora ya xhalaj te c'ulejalil, soc te corona ma ba ya xhalaj ta cajalcaj ts'umbalil.

²⁵C'alal ya yich' bojel te aquiltic soc te ya scha'pulin, soc te ya yich' tsobel te aquiltic ta witsiltic,

²⁶ay me tuminchijetic awu'un te ya ya'bat ac'u'-apac', te tentsunetic ya ya'bat te stojol te q'uinal,

²⁷soc ay me bayel leche yu'un te sme' tentsunetic te yac amac'lin aba soc a te mach'atic ay awu'un soc te criadahetic awu'une.