Read Tzeltal Proverbios 28 Bible Online

Proverbios 28 - Tzeltal bible

Proverbios 28

¹Te mach'a chopol yo'tan ya x'ahn bahel aunque mayuc mach'a ya xnutsot yu'un; yan te mach'a toj yo'tan, jun yo'tan ay hich te bin ut'il choj.

²C'alal ay toybahil ta jun nación, ay bayel jcuentahinwanejetic yu'un, yan te winic te ay scuentahil ta yo'tan soc te ay sp'ijil yo'tan ya yac' te ma xhahch c'op.

³Te pobre te ya yuts'in te pobrehetic, hich ay te bin ut'il tulan ha'al te ya slajin te ts'unub awalil.

⁴Te mach'atic ya yihquitayic te ley ya yalbe lec sc'oblal te mach'atic chopolic, yan te mach'atic ya sch'uhunic te ley ya scontrahinic te mach'atic chopolic.

⁵Te mach'atic chopol yo'tanic, ma xc'oht ta yo'tanic stojil chahpanel, yan te mach'atic ya slehic te Jehová ya xc'oht ta yo'tanic spisil.

⁶Ha lec xan te pobre te lec yo'tan ya xbehen, te bin ut'il te jc'ulej te chopol te be yu'une.

⁷Te mach'a ya sch'uhun spasel te ley, ha al-nich'an te ay sp'ijil yo'tan, yan te mach'a ya sjoquin te mach'atic bayel ya xwe'ic, ya yac' ta q'uexlal te state.

⁸Te mach'a ya stsob sc'ulejal ta scuenta sc'ambeyel bayel sjol te staq'uine, ha ya stsob yu'un te mach'a ya sna'be yo'bolil sba te pobrehetique.

⁹Te mach'a ma sc'an ya ya'iy te ley, ha nix hich ihlaybil te bin ya sc'opon Dios yu'une.

¹⁰Te mach'a ya yic' bahel ta chopol be te mach'atic toj yo'tanic, tey nix ya xyahl a ta syac spasoj, yan te mach'atic mayuc smulic ya me x'a'bot yich'ic te bintic leque.

¹¹Te mach'a jc'ulej ya scuy sba ta p'ij, pero te pobre te ya sna' q'uinal ya xhu' ya stsahtay.

¹²C'alal ya ya'iyic tsalaw te mach'atic toj yo'tanic, ay bayel yutsil; yan te c'alal ya yich' yipic te mach'atic chopolic, ya snac' sbahic te winiquetique.

¹³Te mach'a ya smuc smul, ma xp'ohl te bintic ay yu'un, yan te mach'a ya yal ta jamal smul soc ya yihquitay spasel, ya me sta c'uxultayel.

¹⁴Bayel yutsil te mach'a spisil ora ya xi' te Jehová, yan te mach'a ya stulanijtes yo'tan ya sta swocol.

¹⁵Pajal soc choj te ya x'awon soc oso te ay swi'nal, hich ay te mach'a chopol yo'tan te ya scuentahin te pueblo te pobre aye.

¹⁶Te ajwalil te ma sna' q'uinal ya yac' bayel uts'inel; yan te mach'a ya sp'aj te bin ma stojiluc ta tahel, ya xnahtij scuxlejal.

¹⁷Te mach'a ay swocol ta scaj smilaw, ya x'ahn ha to c'alal ya xbaht ta muquenal; ma me ayuc mach'a ya xcoltayot yu'un.

¹⁸Te mach'a jun yo'tan ya xbehen, ya xcol, yan te mach'a chopol te be yu'une, ya me xyahl cohel.

¹⁹Te mach'a ya x'a'tej ta sq'uinal, ay bayel we'elil yu'un, yan te mach'a ya st'un bahel bin ya swayichtay, c'ax bayel ya xpobrehub.

²⁰Te mach'a jun yo'tan ya me yich' bayel bendición, yan te mach'a ora nax ya sc'an ya xc'ulejub ya me yich' castigo.

²¹Ma lecuc te tsahbil nax mach'a ya x'ich'ot ta cuenta; ¡ta scuenta jxeht' nax pan ay ya sta smul a te winique!

²²Te mach'a ay st'ut'il ya suj sba ta slehel sc'ulejal, ma sna' te yac ta talel pobrehil ta stojol.

²³Te mach'a ya stsits yan, c'ax hich lec yo'tan yu'un ya xc'oht a te bin ut'il te mach'a ya yal t'ujbil c'op te ma meleluque.

²⁴Te mach'a ya yelc'ambe sbiluc te stat o te snan soc te ya yal te ma muliluc, ha smohlol te mach'a ya xjinawan.

²⁵Te mach'a bayel ya xbic'taj yo'tan, ya shach c'op, pero te mach'a ha smuc'ulinej yo'tan te Jehová ya xp'ohl bintic ay yu'un.

²⁶Ha sonso te mach'a ya smuc'ulin sba yo'tan, yan te mach'a ya xbehen ta sbehlal p'ijil-o'tanil libre ya xc'oht yu'un.

²⁷Te mach'a ay bin ya ya'be te pobre mayuc bin ya spasot falta yu'un; yan te mach'a ma ba ya yilbe swocol, bayel ma lecuc sc'oblal yu'un.

²⁸C'alal ya yich' yipic te mach'atic chopolic, ya snac' sbahic te ants-winiquetic, te c'alal ya xch'ayic bahel, ya xp'ohlic te mach'atic toj yo'tanic.