Read Tzeltal Proverbios 29 Bible Online

Proverbios 29 - Tzeltal bible

Proverbios 29

¹Te mach'a tulan ya yac' sba, teme ya yich' comel, ora nax ya yich' jinel, soc mayuc spoxil yu'un.

²Te c'alal ya yich' yipic te mach'atic toj yo'tanic, ha tse'el yo'tan yu'un te pueblo; yan te c'alal ya yich' yipic te mach'atic chopol yo'tanic, ya x'ahcanaj te pueblohe.

³Te mach'a c'ux ta yo'tan te p'ijil-o'tanil ya ya'be yutsil yo'tan te state; yan te mach'a ya sjoquinlan te j'antsinel-antsetic ya slajin bintic ay yu'un.

⁴Te ajwalil te toj bin ya spas, ya ya'be yich' yip te slumale; yan te mach'a ya schon sba, ha ya sjin stuquel.

⁵Te mach'a ya yalbe t'ujbil c'op te ma meleluc ta stojol te spat-xuhc, ha nix ya spas syacol te banti yac ta behele.

⁶Te mach'a chopol yo'tan ya xyacot yu'un te schopolile, yan te mach'a toj yo'tan ya xc'ayojin soc stse'elil yo'tan.

⁷Te mach'a toj yo'tan, bayel sc'oblal ta yo'tan bin ut'il ay te pobrehetic, yan te mach'a chopol yo'tan, mayuc sc'oblal ta yo'tan stuquel.

⁸Te jlabanwanejetic ya shachbeyic yo'tan te pueblo, pero te mach'atic ay sp'ijil yo'tanic ya slahmajtesic ilimba.

⁹Te mach'a p'ij yo'tan teme ya yut sba soc te mach'a ma sna' q'uinal, te mach'a ma sna' q'uinal, ha nax ya x'ilin soc ya xlabanwan, mayuc lamal q'uinal.

¹⁰Te jmilawaletic ya yihlayic te mach'a jun yo'tan, pero te mach'atic toj yo'tanic ya slehbeyic yutsil sch'uhlelic.[2]

¹¹Te mach'a ma sna' q'uinal ya yac' ta ilel spisil yilimba, yan te mach'a p'ij yo'tan ya scom sba stuquel.

¹²Teme ay ajwalil te ya yich' ta cuenta te lotil-c'op, ha nix hich chopol yo'tanic spisil te j'a'teletic yu'une.

¹³Te pobre soc te j'uts'inwanej junax sc'oblalic: pajal ya x'a'bot yilic sacal q'uinal yu'un te Jehová.

¹⁴Te ajwalil te toj ya schahpan te pobrehetic, spisil ora ay me yip te shuctajib.

¹⁵Te xul soc te tojobtesel ya yaq'uic p'ijil-o'tanil, pero te nich'anil te hich nax ay ya yac' ta q'uexlal te snane.

¹⁶Teme ya xp'ohl te mach'atic chopolic, ya xp'ohl te c'axun-mandar; pero te mach'atic toj yo'tanic ya me yilic te jinel yu'unique.

¹⁷Tojobtesa te anich'an, hich me ya ya'bat lamal q'uinal, soc ya ya'bat stse'elil awo'tan.

¹⁸Te banti mayuc jal-c'op, ma ba ya scom sba te pueblo; pero bayel yutsil te mach'a ya sch'uhun spasel te Ley.

¹⁹Ma ba ya xtojob ta c'op nax te a'bate; aunque ya xc'oht ta yo'tan, ma ba ya yich' ta cuenta.

²⁰¿Ay bal awiloj te mach'a ora nax ya xc'opoje? Ha ay xan bin ay ta mahliyel yu'un te mach'a ma sna' q'uinal te bin ut'il ini.

²¹Te mach'a yutsp'in te ya'bat te c'alal alal to, ta patil ha ya x'ich'bot te biluc yu'un.

²²Te c'ahc'al winic ya shach c'op, te mach'a ora nax ya x'ilin ya sta bayel smul.

²³Ya xpehc'anot yu'un stoybahil te winique, yan te mach'a peq'uel yac'oj sba ya me x'ich'ot ta muc'.

²⁴Te mach'a jun yo'tan sba soc te j'elec' ha nix ya scontrahin sba; aunque ya ya'iy te chopol sc'oblal ya xc'oht, ma ba ya yalbe smul te j'eleq'ue.

²⁵Te xiwel ta stojol ants-winiquetic, ha yaquil c'ohem, yan te mach'a ha smuc'ulinej yo'tan te Jehová, canantaybil stuquel.

²⁶Tsobolic ya slehic te lec yo'tan yu'un te ajwalil, pero ha nax stuquel te Jehová te ya spas lequil chahpanwanej ta stojol spisilic.

²⁷Te mach'a toj yo'tan ya yihlay te mach'a ma ba toj yo'tan, te mach'a chopol yo'tan ya yihlay te mach'a toj yo'tan.