Read Tzeltal Proverbios 4 Bible Online

Proverbios 4 - Tzeltal bible

Proverbios 4

¹Jnich'nab, a'iya me awa'iy te nohptesel yu'un jtuhl tatil; a'iya me awa'iyic ta lec scuenta yu'un yac atahic bin ay ta na'el.

²Ya ca'beyex lequil nohptesel, ha yu'un ma me xawihquitay te nohptesel cu'une.

³Ha nix hichon, al-nich'anon yu'un te jtate, soc c'uxultaybilon yu'un te jnane,

⁴te jtat la sp'ijubteson, hich la yalbon: Ac'a ta awo'tan te bintic ya calbat; ch'uhuna te mandariletic cu'un, hich me ya xcuxajat a.

⁵Ich'a sp'ijil awo'tan, ich'a snopojibal awu'un; ma me xach'ay ta awo'tan soc ma me xawihquitay te bintic ya calbat.

⁶Ma me xawihquitay te p'ijil-o'tanil, ha ya scanantayat; c'uxuc me ta awo'tan, ya me scanantayat.

⁷Ha nahil ay te p'ijil-o'tanil, ha yu'un ich'a sp'ijil awo'tan. Ich'a te bintic ay ta na'el, c'ax hich sc'oblal spisil a te bintic ay awu'un.

⁸Ich'a ta cuenta te p'ijil-o'tanil, hich ya stoybat ac'oblal; mech'a, hich ya yac'at ta ich'el ta muc'.

⁹Ya me ya'bat yutsil sch'ahlel ajol, ha me ya ya'bat t'ujbil corona, xchi te jtate.

¹⁰A'iya awa'iy, jnich'an, ich'a ta cuenta bin ya cal, hich me bayel xan ha'bil ya xcuxajat a.

¹¹La jtojobtesat ta sbehlal p'ijil-o'tanil, la jcac'at ta behel ta toj behetic.

¹²Te c'alal ya xbehenat mayuc bin ya smacbat awoc; teme ya x'ahnimajat ma ba yac ac'ohchin awoc.

¹³Tsaca te nohptesel, ma me xacoltay; canantaya ta lec, como ha acuxlejal.

¹⁴Ma me xat'un bahel te be yu'un mach'atic bohlic, ma me xbehenat ta be yu'un mach'atic chopolic.

¹⁵Ihquitaya, ma me xc'axat tey a; loc'an tal tey a, bahan.

¹⁶Como ma xwayic ha to teme la spasic te bin chopole; ma ba ya xtal swayelic teme mayuc mach'a la syahltesic.

¹⁷Como ha swe'elic te bin chopol, te bin ya yuch'ic ha te uts'inwanej.

¹⁸Te be yu'un te mach'atic toj yo'tanic hich ay te bin ut'il ya xhahch ta sacubel te q'uinal, te behbe ya sacub ha to c'alal ts'acal sacubix te q'uinale.

¹⁹Pero te be yu'un te mach'atic chopol yo'tanic, hich ay te bin ut'il yihc'al q'uinal; ma sna'ic bin ya sc'ohchinic.

²⁰Jnich'an, a'iya awa'iy ta lec te c'opetic cu'un; a'iya awa'iy bintic ya cal.

²¹Ma me xch'ay ta asit, q'ueja ta awo'tan,

²²como ha cuxlejal yu'un te mach'a ya sta, soc ha pox yu'un spisil sbaq'uetal.

²³Ta spisil, canantaya awo'tan, como tey ya xtal a te acuxlejale.

²⁴Coma awe ta yalel te bin chopol; namal hiluc ta awe te chopol c'op.

²⁵Toj ac'a yil bahel te asite; t'ojana asit a te bin nahil ay ta atojol.

²⁶Tsahtaya te be te banti yacat ta behel bahel, soc tojuc me spisil te behetic awu'une.

²⁷Ma me xhowiyat ta wa'el o ta q'uexam; ma xat'un te bin chopole.