Read Tzeltal Proverbios 5 Bible Online

Proverbios 5 - Tzeltal bible

Proverbios 5

¹Jnich'an, a'iya me awa'iy te sp'ijil co'tan, a'iybon awa'iy te bin jnopoj,

²scuenta yu'un yac atsahtay aba soc ay ap'ijil te ya xc'opojate.

³Como ya xt'uhlaj chab ta ye te j'antsinel-ants, te yac' c'ax hich sc'unil a te bin ut'il aceite;

⁴pero te slajibal, c'ax hich sch'ahal a te bin ut'il ch'ahco', te ye hich ya xlajinwan a te bin ut'il espada te scha'bunjehchel ay ye.

⁵Ya xco bahel ta lajel te yoc; te jujujihm yoc toj ya xbaht ta yawil mach'atic chamenic.

⁶Ma xyich' ta cuenta te sbehlal cuxlejal; ma ba sna'oj te ma ba jun ay te be yu'une.

⁷Ha yu'un yo'tic, jnich'an, a'iybon awa'iy jc'op, ma me xawihquitay hilel te bin ya cal.

⁸Ihquitaya ta namal te be yu'un te antse, ma me xnohpojat bahel ta sti'il sna,

⁹scuenta yu'un mayuc mach'a yan yac awa'be te awipe, soc ma ba yac awa'be te j'uts'inwanej te ha'biletic awu'une;

¹⁰te manchuc yan mach'atic ya snojes sch'uhtic a te awipe, te ma xbaht ta yan na te awa'tele.

¹¹Soc ta slajibal acuxlejal ya x'ahcanajat, te c'alal ya xlaj yip abaq'uetal,

¹²te hich yac awal: ¡Mero la jp'aj te tojobtesele! ¡Mayuc sc'oblal c'oht ta co'tan te tsitsele!

¹³Ma ba la jca'iybe sc'op te mach'atic la snohptesonic, ma ba la jquich' ta cuenta te jp'ijubteswanejetic cu'une.

¹⁴Jteb ma ba jc'axel la jquich' jinel ta yohlil spisil te tsoblej, xchihat me ta patil.

¹⁵Uch'beya te ya'lel te jocbil yawil ha' awu'un, te ha' te ya x'oquin tal ta uch'o-ha'il awu'une.

¹⁶¿Lec bal teme ya xmahl loq'uel ta callehetic te sloq'uib-ha' awu'une? ¿Lec bal teme ya x'oquin bahel ta plazahetic te yacan ha' awu'une?

¹⁷Atuquel me awu'un, ma me ha'uc yu'un yantic te sjoquinejate.

¹⁸¡Bayeluc me yutsil te sloq'uib-ha' awu'un, soc tse'eluc me awo'tan soc awihnam ta aqueremil,

¹⁹ha antsil chij te buen c'uxultaybil, ha t'ujbil gacela-chij! Spisiluc me ora yac amulambe stahn, spisiluc me ora ac'a yu'untayat te sc'uxul yo'tan.

²⁰Jnich'an, ¿bin stuc yac awac' yu'untaybat awo'tan te j'antsinel-ants? ¿Bin yu'un yac amech'be stahn yan ants?

²¹Te behetic yu'un te ants-winic ay ta sit te Jehová, ha ya stsahtay yil spisil te behetic yu'un.

²²Te mach'a chopol ha nix ya stsacot yu'un te sbohlile; ha nix ya xchucot yu'un te slazohil te smule.

²³Ya me xlaj ta scaj te mayuc tojobtesel yu'un, ya xhowiy bahel yu'un te jc'axel ma sna' q'uinal.