Read Tzeltal Proverbios 8 Bible Online

Proverbios 8 - Tzeltal bible

Proverbios 8

¹¿Ma bal ya x'awon te p'ijil-o'tanil? ¿Ma bal yacuc xc'opoj te bin ay ta na'el?

²Ta toyol q'uinal ta ti'be, ta jet-be, ya stehc'an sba;

³ta ochibaletic yu'un te pueblo, ta ochibaletic ya x'awon, hich ya yal:

⁴Winiquetic, ha'ex ya cawtayex; ya jc'opon te yal-snich'nab ants-winiquetic.

⁵Ha'ex te ma xana'ic q'uinal, nopahic stsahtayel abahic; ha'ex sonsohex, na'ahic me q'uinal.

⁶A'iya me awa'iyic, yu'un c'ax lec te bin ya cal; ya jam que ta yalel bintic toj.

⁷Ya cal bin smelelil, te que ya yihlay te bin chopol.

⁸Spisil te jc'op mero stojil ay, mayuc bin chopol o te ma tojuc.

⁹Spisil te mach'atic ya sna'beyic scuentahil ha stojil ya ya'iyic, te mach'atic stahojic sp'ijil-o'tanil ha yich'oj scuentahil.

¹⁰Ich'ahic te nohptesel cu'un, ma ha'uc te plata, ich'ahic te bin ay ta na'el, ma ha'uc te lequil oro,

¹¹como c'ax hich lec a te p'ijil-o'tanil te bin ut'il t'ujbil tonetic; soc spisil te bin ya sc'an awo'tanic ma spaj sba soc stuquel.

¹²Ho'on te p'ijil-o'tanilon, jun nahinemon soc te snopojibal, soc jtahoj te bin ay ta na'el soc te stsahtayel.

¹³Te xi'el te Jehová, ha te sp'ajel te bin chopol; ya quihlay te toybahil soc te muc' ya scuy sba, te chopol be soc te chopol c'op.

¹⁴Sjoquinejon te j'ac'-o'tanil soc stojil chahpanel; ho'on cu'un te bin ay ta na'el soc te yip ta pasele.

¹⁵Ho'on ta jcuenta te ya xcuentahinwan te ajwaliletic, soc te ya schahpanic stojil leyetic te príncipaletique.

¹⁶Ho'on ta jcuenta te ya xcuentahinwanic príncipaletic, soc te ya ya'iyic chahpanwanej te gobernadoretique.

¹⁷C'ux ta co'tan te mach'a c'uxon ta yo'tan, soc te mach'atic ya slehonic ya stahonic.

¹⁸Sjoquinejon te c'ulejalil soc ich'el ta muc', te c'ulejalil te ya xhalaj soc te bintic stojil ay ta pasel.

¹⁹Te bin ya cac' ho'on c'ax hich yutsil a te bin ut'il oro, te oro te yich'oj pasel ta lec; te bin ya cac' ho'on c'ax hich yutsil a te bin ut'il lequil plata.

²⁰Ya xbehenon ta toj be, ta sbehlal te bin toj ta pasel,

²¹yu'un ya ca'be te bintic ya xc'oht ta scuentahic te mach'atic c'uxon ta yo'tanic, soc te ya jnojesbe yawil sc'ulejalic.

²²Te Jehová la spason ta shahchibal te ya'tel, te c'alal ma to shahch ya'tel a.

²³La jquich' pasel c'alal ta sbahtel q'uinal, ta shahchibal, te c'alal ma to pasbil a te bahlumilale.

²⁴La yac' ayinucon te c'alal ma to ayuc a te muc'ul maretic, te c'alal ma to ayuc a te sloq'uib-ha'etic yu'un bayel ha'etic.

²⁵Te c'alal ma to pasbilic a te witsetic, te c'alal ma to ayuc a te tsehletic ayinemonix a;

²⁶te c'alal ma to ba spasoj a te lumq'uinal soc te aquiltic, soc te ts'ubilum yu'un te bahlumilale.

²⁷Tey ayon a te c'alal la schahpan te ch'ulchan; te c'alal la sp'is te sti'il te sba te xahab,

²⁸te c'alal la yac' te tocaletic ta ch'ulchan, te c'alal la ya'be yip te ha'etic yu'un te c'ubul mar,

²⁹te c'alal la ya'be sti'il te mar scuenta yu'un te ha'etic ma ba ya sc'axuntaybe smandar, soc te c'alal la ya'be yich'o-ip te lumq'uinal,

³⁰tey joquinej a ta schahpanlanel spisil. Mero yutsilon yo'tan jujun c'ahc'al, spisil ora tse'el co'tan ta stojol;

³¹tse'el co'tan yu'un te bahlumilal, te lumq'uinal yu'un, soc tse'el co'tan yu'un te ants-winiquetique.

³²Yo'tic, calatac, a'iybon awa'iyic jc'op; ¡bayel me yutsilic te mach'atic ya scanantaybon te behetic cu'un!

³³A'iya awa'iyic te nohptesel, p'ijanic me, ma me xap'ajic.

³⁴Bayel me yutsil te mach'a ya ya'iybon te jc'ope, te jujun c'ahc'al ya sq'uehlan sit ta ti'nahiletic cu'un, te yac smahliybel ta sti'il te jnahe.

³⁵Como te mach'a ya stahon, ya sta scuxlejal, soc lec ta o'tanil yu'un te Jehová.

³⁶Pero te mach'a ya sta smul ta jtojol, ya ya'be sba swocol, spisil te mach'atic ya sp'ajonic ha c'ux ta yo'tanic te lajele, xchi te P'ijil-o'tanile.