Read Tzeltal Eclesiastés 12 Bible Online

Eclesiastés 12 - Tzeltal bible

Eclesiastés 12

¹Na'a me te Jpaswanej awu'un ta yorahil te jcolel al-nich'anat, te c'alal ma to ba stahoj sc'ahc'alel wocol, soc te ya xc'oht yorahil te hich yac awal: Mayuc yutsilal ya ca'iy, te xchihate;

²te c'alal ma to ba ihc'uben a te c'ahc'al soc te sacal q'uinal, te u soc te eq'uetic, soc te ya suht tal te tocal te c'alal c'axix a te ha'ale;

³te c'alal ya xnihc te jcananetic yu'un te na, soc te ya xcoxaj spatic te winiquetic te ay yipique; te ya xlaj yip te scha'am ta scaj te mayuquix tsobol, soc te ya x'ihc'ub te bintic ya x'ilawanic ta ventanahetic;

⁴te c'alal ya xmahc te puertahetic ayic ta stojol calle, soc ya xpehc'aj sc'op te molino; te c'alal ya xhahch yu'un ya x'oc' mut, pero ma ba ya xchicnajix te c'ayojetique;

⁵te c'alal ya xiw teme toyol ay, soc ay bin xiweltic sba ta be; te c'alal ya snichin te almendro, soc ayix yihcats ya ya'iy te c'ulub, soc ma sc'anix bintic mulambilixe; como te winic ya xbaht ta banti ya xnahin sbahtel q'uinal, soc ya sbehentayic te callehetic te mach'atic ya x'oq'uic;

⁶Na'a me te Jpaswanej awu'un te c'alal ma to ba tuch'em a te cadena pasbil ta plata, o te ma to ba wuyem a te oxom pasbil ta oro; te c'alal ma to ba top'en a te q'uib ta sti'il te sloq'uib-ha', o te ma to xet'emuc a te rueda ta hotbil yawil ha';

⁷o te ya suht xan bahel ta lumq'uinal te ts'ubilum, hich te bin ut'il ay ta nahil to, soc te ch'uhlelal ya suht xan bahel ta stojol Dios te ha nix a'bibil yu'une.

⁸¡Tojol nax, tojol nax, xchi te Jp'ijubteswanej, tojol nax ta spisil! xchi.

⁹Te jayeb ay sp'ijil yo'tan te Jp'ijubteswanej, hich la ya'be snop te ants-winiquetique. La ya'iy, la stsahtay yil soc la schahpan bayel tsahbil c'opetic.

¹⁰Te Jp'ijubteswanej la slehticlan c'opetic te snuhp' ya xc'oht scuenta yu'un ya sts'ihbay te bin smelelile.

¹¹Te c'opetic yu'un te mach'atic ay sp'ijil yo'tanic hich c'ohemic te bin ut'il ch'ix, te tsobil c'opetic hich c'ohemic te bin ut'il clavohetic te bajticlambilic ta lec, te la yich'ic halel yu'un jtuhl jcananchij.

¹²Yo'tic, jnich'an, teme ay to xan c'opetic te bin ut'il ini, tsahtaya me aba yu'un. Te spasel tsobol librohetic mayuc slajibal, soc te bayel nohptesel ya yac' luhbel.

¹³Te slajibal spisil te bin ay ta a'iyel, ha ini: Ich'a ta muc' te Diose soc ch'uhumbeya te mandariletic yu'une, como hich ay spisil te ay ta scuenta spasel te ants-winiquetique.

¹⁴Como Dios ya sc'ambe cuenta yu'un spisil a'tel, soc ha nix hich spisil bintic muquen pasbil, teme lec o teme ma lecuque.