Read Tzeltal Eclesiastés 2 Bible Online

Eclesiastés 2 - Tzeltal bible

Eclesiastés 2

¹Hich la jcal ta co'tan: Conic, ya jtsajat quil ta scuenta spasel te bintic ya smulan co'tan, yac awa'iy te bintic lec, xchihon. Pero ha nix hich, tojol.

²La jcal te ha locahijel te tse'ej. Soc ¿bin stuc te bin ya smulan te o'tanile?

³La jnop ta co'tan te ya ca'be smulan jbaq'uetal te vino soc te ya ca'iy sonsohil, ya to scuentahimbon co'tan a te p'ijil-o'tanile, ha to c'alal ya quil bin a te lec ay ta pasel yu'un te yal-snich'nab ants-winiquetic ta ye'tal ch'ulchan te jayeb c'ahc'al cuxulic.

⁴La jpasticlan muc'ul a'teliletic; la jpasticlan nahetic soc la jts'un ts'usubiletic cu'un.

⁵La jpasticlan yawil awal-ts'unubiletic soc nichimetic, soc la jts'unticlan bayel ta chahp te'etic tey a te ya yac' sit.

⁶La jpasticlan yawil ha'etic yu'un ya yich' ahts'esel a te te'etic yaquic ta ch'ihyele.

⁷La jmanticlan mosohetic soc criadahetic, soc ay mosohetic te ayinic ta jna. Soc ay bayel wacaxetic soc tuminchijetic cu'un, c'ax hich a te bin ut'il spisil te mach'atic nahil cu'un ta Jerusalén.

⁸La jtsob bayel plata soc oro, soc c'ulejaliletic yu'un ajwaliletic soc yu'un yantic q'uinaletic. La jquic' jc'ayoj-winiquetic soc antsetic, soc bayel yantic antsetic,[1] ha te bintic ya sc'an yo'tan te yal-snich'nab ants-winiquetic.

⁹C'ax hich muc' jc'oblal c'oht a te bin ut'il spisil te mach'atic nahil ay cu'un ta Jerusalén. Ta spisil ini, la sjoquinon te p'ijil-o'tanile.

¹⁰Ma ba la jcom te bin la smulan te jsite, ma ba la jcom te bin la smulan te co'tane. La smulan co'tan spisil te ca'tel, ha jmahtan c'oht yu'un spisil te ca'tele.

¹¹Patil la jquil spisil te bintic jpasoj ta jc'ab soc te ca'tel te la jpase. Tojol ay soc ha snutsel te iq'ue; mayuc bin loc' a ta ye'tal ch'ulchan.

¹²Patil hahchon ta sna'el te p'ijil-o'tanil, locahijel soc sonsohil. ¿Bin yan ya xhu' ya spas te mach'a ya x'och ta ajwalil ta patil? Mayuc, ha nix te bin pasbilixe.

¹³La jquil te c'ax hich lec te p'ijil-o'tanil te bin ut'il te sonsohil, hich te bin ut'il c'ax lec te sacal q'uinal te bin ut'il te yihc'al q'uinale.

¹⁴Te mach'a ay sp'ijil yo'tan jamal te site, yan te mach'a ma sna' q'uinal ya xbehen ta yihc'al q'uinal stuquel. Pero la jnop te junax ya xc'oht ta stojol schebalic.

¹⁵Ha yu'un hich la jcal ta co'tan: Te bin ya xc'oht ta stojol te mach'a ma sna' q'uinal, hich nix ya xc'oht ta jtojol. ¿Banti ya xtuhun cu'un hiche te ay bayel sp'ijil co'tan? Ha yu'un la jcal ta co'tan te ha nix hich tojol nax, xchihon.

¹⁶Como te mach'a p'ij yo'tan soc te mach'a ma sna' q'uinal ma spisiluc ora ya xna'ot; c'alal ya xc'ax bayel c'ahc'al spisil ya xch'ay ta o'tanil. Te mach'a ay sp'ijil yo'tan soc te mach'a ma sna' q'uinal, pajal ya xchamic.

¹⁷Ha yu'un la jp'aj te cuxlejal, como te bintic ya yich' pasel ta bahlumilal, ma lecuc la jca'iy. Spisil tojol nax, ha snutsel te ic' c'ohem.

¹⁸Ha nix hich la jp'aj spisil ca'tel la jpas ta ye'tal ch'ulchan, ta scaj te ya sc'an ya ca'be hilel yan te ya xtal ta patil cu'une.

¹⁹¿Mach'a ya sna' teme ay sp'ijil yo'tan o teme ma sna' q'uinal te mach'a ya scuentahimbon spisil te ca'tel te la jca'telin spasel ta bahlumilal soc sp'ijil co'tan? Ha nix hich tojol nax.

²⁰Ha yu'un tal jmel-o'tan yu'un spisil ca'tel te baht ta co'tan spasel ta ye'tal ch'ulchan.

²¹Como te winic ya x'a'tej soc sp'ijil yo'tan, ya sna' ta lec soc ya xhu' yu'un te a'tele, patil ya me ya'be hilel spisil te mach'a ma ba a'tej tey a. Ha nix hich tojol nax soc mero ma lecuc.

²²Como ¿bin ya sta a te winic yu'un spisil ya'tel te ya xc'ax yo'tan yu'un, te ya yo'tantay spasel ta ye'tal ch'ulchan?

²³Spisil scuxlejal c'ux obol sba soc ay swocol yu'un te ya'tel; ni ha'uc ya scux yo'tan ta ahc'abal. Ha nix hich tojol nax ini.

²⁴Mayuc bin yan xan lec ya spas te winic, ha nax te ya xwe' ya x'uch' soc te ya ya'iybe yutsil te ya'tele. Quiloj te ha nix talem ta stojol Dios ini.

²⁵Como ¿mach'a ya xhu' ya xwe' soc ya smulan bintic ay teme ma ha'uc ta scuenta te Diose?

²⁶Como Dios ya ya'be sp'ijil yo'tan, sna'ojibal soc yutsil q'uinal ya'iy te mach'a lec ta site; yan te jmulawil ya ya'be ya'tel ta stsobel soc ta sbusanel c'ulejalil yu'un ya ya'be hilel te mach'a lec ta o'tanil yu'un Dios. Ha nix hich tojol nax soc ha snutsel te iq'ue.