Read Tzeltal Eclesiastés 3 Bible Online

Eclesiastés 3 - Tzeltal bible

Eclesiastés 3

¹Spisil ay yorahil; ay yorahil spisil te bin ya yich' pasel ta ye'tal ch'ulchan:

²Ay yorahil ayinel, ay yorahil ya xcham; ay yorahil ts'umbajel, ay yorahil ta bulel;

³ay yorahil milaw, ay yorahil poxtayel; ay yorahil ta jinel, ay yorahil ta pasel;

⁴ay yorahil oq'uel, ay yorahil tse'ej; ay yorahil mel-o'tan, ay yorahil ahc'ot;

⁵ay yorahil ta puhquel bahel tonetic, ay yorahil ta tsobel tal tonetic; ay yorahil mech'el, ay yorahil mayuc mech'el;

⁶ay yorahil ta lehel, ay yorahil ta ch'ayel; ay yorahil ta q'uejel, ay yorahil ta ch'ojel bahel;

⁷ay yorahil ta jatsel, ay yorahil ta ts'isel; ay yorahil ch'abal ta c'op, ay yorahil ya xc'opoj;

⁸ay yorahil c'uxul-o'tanil, ay yorahil ihlayel; ay yorahil guerra, ay yorahil lamal q'uinal.

⁹¿Bin ya xloc' yu'un a te winic te bayel ya x'a'teje?

¹⁰Quiloj te a'tel ya x'a'bot yu'un Dios te yal-snich'nab ants-winiquetic yu'un ya yo'tantayic spasel.

¹¹Dios t'ujbil spasoj spisil ta yorahil; soc la ya'be sna' ta yo'tan te ants-winiquetic te bintic scuenta sbahtel q'uinal, aunque ma xhu' yu'unic sna'el te bin spasoj Dios c'alal shahchibal ha to ta slajibal.

¹²Jna'oj te mayuc yan bin lec ya spas te ants-winic, ha nax te tse'eluc yo'tan soc te lecuc bin ya spas ta scuxlejal;

¹³soc te ha mahtanil yu'un Dios te spisilic ya xwe'ic ya x'uch'ic, soc te ya smulanic spisil bintic ya spasique.

¹⁴Jna'oj te spisil bintic ya spas te Diose, stalel ay: Mayuc bin yan ay ta otsesel soc mayuc bin ay ta loq'uesel a. Dios hich ya spas scuenta yu'un ya x'ich'ot ta muc' yu'un te ants-winiquetique.

¹⁵Te bin ay ta ora ini, nameyix ay, soc te bin ya xc'oht ta pasel, c'ohemix ta pasel; soc Dios ya yac' chicnajuc yan buelta te bin c'axemixe.

¹⁶Ay to xan yan la jquil ta ye'tal ch'ulchan: te banti ay chahpanwanej, ay bin chopol tey a; te banti ay stojil ta pasel, ay mulil tey a.

¹⁷Hich la jcal ta co'tan: Dios ya schahpan te mach'a toj yo'tan soc te mach'a chopol yo'tan, como ay yorahil spisil bin ya sc'an soc ay yorahil spisil bintic ay ta pasel, xchihon.

¹⁸Soc la jcal xan ta co'tan: Te ants-winiquetic, Dios ya stsaj scuenta yu'un hich ya sna'ic a te pajal ayic soc te chambahlametique.

¹⁹Como te bin ya xc'oht ta scuenta te ants-winiquetic soc te chambahlametic junax ta schebalic: ha te bin ut'il ya xcham te june, hich nix ya xcham te yane. Pajal ya yich'ic ic'; te ants-winic mayuc banti toyol yu'un te chambahlam, yu'un spisil tojol nax.

²⁰Spisil ya xbahtic ta junax awilal; spisil pasbil ta ts'ubilum, soc spisil ya suht xan ta ts'ubilum.

²¹¿Mach'a c'an sna' teme mohel ya xbaht te espíritu yu'un te ants-winic soc teme cohel ya xbaht ta sc'ubulil lumq'uinal te espíritu yu'un te chambahlame?

²²Ha yu'un la jquil te mayuc bin yan xan lec ya xhu' ya spas te ants-winique, ha nax te ya smulan te ya'tele, yu'un hich a'bibil spas. Como ¿mach'a ya xhu' ya ya'be yil bin ya xc'oht ta pasel ta stojol ta patil?