Read Tzeltal Eclesiastés 7 Bible Online

Eclesiastés 7 - Tzeltal bible

Eclesiastés 7

¹Ha lec xan a te lec c'oblalil te bin ut'il lequil perfume, soc ha lec xan a te bin c'ahc'alil ya xcham te bin ut'il te bin c'ahc'alil ayine.

²Ha lec xan a te bahel ta na ta ban ay mel-o'tan yu'un mach'a cham te bin ut'il bahel ta na ta ban ay we'elil yu'un q'uin, como te lajel ha slajib spisil ants-winiquetic, soc te mach'a cuxul ya ya'be sna' ta yo'tan.

³Ha lec xan a te mel-o'tan te bin ut'il te tse'ej, yu'un teme ay ta mel-o'tan te sit yelaw ha lec ya xc'oht a te yo'tane.

⁴Te yo'tan te mach'a ay sp'ijil ay ta na banti ay mel-o'tan, yan te yo'tan te sonso ay ta na yu'un yac'oltayel q'uinal.

⁵Ha lec xan a te yac awa'iy te tsitsel yu'un te mach'a ay sp'ijil yo'tan, te bin ut'il yac awa'iybe te c'ayoj yu'un te mach'a ma sna' q'uinale.

⁶Te stse'ej te mach'a ma sna' q'uinal hich ay te bin ut'il te sc'op ch'ixetic yaquic ta chiq'uel ta ye'tal oxom. Ha nix hich tojol nax ini.

⁷Te uts'inel ya sjimbe sjol te mach'a ay sp'ijil yo'tan; soc te aq'uel taq'uin yu'un chahpanel ya sjin o'tanil.

⁸Ha lec xan te slajibal te bin ay te bin ut'il te shahchibale; soc ha lec xan te ya xc'ax yu'un swocol te bin ut'il te toybahile.

⁹Ma me orahuc ya x'ilinat, como te ilimba ay ta yo'tan te mach'a ma sna' q'uinal.

¹⁰Ma me hichuc xawal: ¿Bin yu'un te ha lec xan te ha'biletic c'axemiquix te bin ut'il ay ta ora ini? ma me xchihucat, como mayuc p'ijil-o'tanil ta sjoc'oyel ini.

¹¹Buen lec te p'ijil-o'tanil soc te bin ya x'a'bot yich' hilel, ay bintic ya stahic a te mach'atic ya yilic te c'ahc'ale.

¹²Como ha mahquilal te p'ijil-o'tanil, ha nix hich ha mahquilal te taq'uine, pero ha lec xan a te p'ijil-o'tanil, yu'un ya ya'be scuxlejal te mach'atic yich'ojique.

¹³Ilawil te bin la spas te Diose: ¿Mach'a ya xhu' ya stojobtes te bin scoxanej?

¹⁴Ta yorahil te bin lec, tse'eluc awo'tan yu'un; soc te bin ora wocol, nopa ta lec. Ha nix Dios la spas ta schebalic, scuenta yu'un te ants-winic ma ba ya sna' te bin ya xc'oht ta stojol ta patil.

¹⁵Ta spisil ini quilojix te jayeb c'ahc'al cuxulon te mayuc scuentahil te jcuxlejale: ay mach'a toj yo'tan te ch'ay bahel aunque toj yo'tan, soc ay mach'a chopol yo'tan te bayel ha'bil cuxaj aunque chopol yo'tan.

¹⁶Ma me c'ax tojucat soc ma me c'ax p'ijucat. ¿Bin yu'un yac ajin aba?

¹⁷Ma me c'ax chopolucat, soc ma me c'ax sonsohucat; ¿Bin yu'un ya xchamat te ma to ba stahoj aworahil a?

¹⁸Ha lec te yac atsac te june, soc te ma xcol bahel ta ac'ab te yane. Te mach'a ya yich' ta muc' te Diose, spisil lec ya xc'oht yu'un.

¹⁹Te p'ijil-o'tanil c'ax hich ya ya'be yip a te mach'a ay sp'ijil yo'tan te bin ut'il lajuntuhl mach'atic ay yipic ta jun pueblo.

²⁰Mayuc ni jtuhluc ta bahlumilal te toj yo'tan, te ya spas te bin lec, te ma ba ya sta smul.

²¹Ma me xawac' ta awo'tan spisil te bintic ya yich' halel, scuenta yu'un ma ba yac awa'iy a te bin chopol ya yalbat ac'oblal te a'bat awu'une;

²²como ana'oj ta awo'tan te bayel buelta ay bin chopol la awalbe sc'oblal yantic.

²³Ta spisil ini la jtsahtay soc sp'ijil co'tan, hich la jcal: ¡Ayuc sp'ijil co'tan! xchihon, pero namal ay ta jtojol.

²⁴Namal ay te bin c'axemix, soc mero chuhcul ta na'el, ¿mach'a ya xhu' ya sta?

²⁵Ha yu'un la jcac' co'tan ta sna'beyel scuentahil, ta stsahtayel soc ta slehel te p'ijil-o'tanil soc te bin ut'il ay spisil, soc ta sna'beyel schopolil te sonsohil soc te ya xhowiyteswan te sohquejolalile.

²⁶La jta te bin c'ax hich sch'ahal a te bin ut'il te lajele: ha te ants te ha yaquil soc ya xchucawan te yo'tan, soc te ha cadenahetic te sc'abe. Te mach'a tse'el yo'tan Dios yu'un, ma ba ya x'och ta sc'ab stuquel, yan te jmulawil ya me xchucot yu'un.

²⁷Ilawil, xchi te Jp'ijubteswanej, hich ay te bin jtahoj ta slehbeyel scuentahil te jujuchahpe,

²⁸te yac to ta slehel te jch'uhlel pero ma to ba stahoj: Ay jtahoj jtuhl lequil winic ta yohlil jmil ta tuhl, pero ma ba jtahoj ni jtuhluc lequil ants ta yohlil spisilic.

²⁹Ha nax jtahoj ini: ha te toj yo'tan pasot yu'un Dios te ants-winic, pero ha la sle bayel ta chahp bintic ma lecuc.