Read Tzeltal Eclesiastés 8 Bible Online

Eclesiastés 8 - Tzeltal bible

Eclesiastés 8

¹¿Mach'a pajal soc te mach'a ay sp'ijil yo'tan? ¿Mach'a ya sna'be scuentahil te bintic aye? Te p'ijil-o'tanil ya sacubtesbe sit yelaw te winic soc ya syanijtesbe te tulan sit yelawe.

²Ho'on ya cal te ch'uhumbeya smandar te ajwalil, yu'un hich awaloj ta jamal ta stojol Dios.

³Ma me orahuc ya xloc'at bahel ta stojol te ajwalile. Soc ma me junuc xawac' aba soc te bin chopol ay ta pasel, como te ajwalil ya spas spisil bin ya sc'an yo'tan stuquel.

⁴Ha toyol te sc'op te ajwalile, mayuc mach'a ya xhu' ya yalbe: ¿Bin yac apas? te xchihe.

⁵Te mach'a ya sch'uhun spasel te smandar mayuc bin chopol ya xc'oht ta scuenta; soc te mach'a ay sp'ijil yo'tan ya sna' bin ora soc bin ya yut ya yac' c'ohtuc ta pasel stuquel.

⁶Como ay yorahil soc ay bin ut'il ay ta pasel spisil te bin ya sc'an pasele, aunque te bin bayel swocol yu'un te winic

⁷ha te ma sna' bin ya xc'oht ta pasel; soc te bin ora ya xc'oht ta pasel ¿mach'a ya xhu' ya yalbe?

⁸Mayuc mach'a ay yip ta stojol te yic'al te cuxlejal, yu'un ya yac' te ma xtup', o te ay yip ta stojol te sc'ahc'alel lajel. Mayuc mach'a ya x'ac'ot bahel ta yorahil guerra, soc te mach'a chopol ma ba ya x'ac'ot ta libre yu'un te bin chopole.

⁹Spisil la jquil ini te c'alal la jcac' co'tan ta sna'el bintic ay ta pasel ta ye'tal ch'ulchan, te c'alal jtuhl winic ya smosohin yan winic yu'un ya ya'be swocol.

¹⁰Ha nix hich quiloj te mach'atic chopolic, te ma ba ya xbahtic ta ch'ul awilal, c'alal la yich'ic muquel halbot lec sc'oblalic; soc ta pueblo banti la spasic te bintic chopol ma'yuc mach'a la sna'ix bin la spasique.[2] Ha nix hich tojol nax.

¹¹Teme ma ba ya x'a'bot castigo ta ora yu'un te bin chopol la yich' pasele, te ants-winiquetic ya xbaht ta yo'tanic spasel te bin chopole.

¹²Aunque te jmulawil ya sta smul ho'winic (100) buelta, soc ya xnahtij scuxlejal, pero jna'oj te lec ya xc'oht te mach'atic ya yich'ic ta muc' te Diose, te mach'atic ya xiwic ta stojol;

¹³soc te mach'a chopol yo'tan ma ba lec ya xc'oht soc ma ba ya xnahtij scuxlejal, te hich ay te bin ut'il axinal, ta scaj te ma ba ya xiw ta stojol Dios.

¹⁴Ay bin tojol nax te ya yich' pasel ta ye'tal ch'ulchan: Ay mach'atic toj yo'tanic te ya xc'oht ta stojolic te bin ya sc'an ya xc'oht ta stojol te mach'atic chopol ya'telic, soc ay mach'atic chopolic te ya xc'oht ta stojolic te bin ya sc'an ya xc'oht ta stojol te mach'atic toj yo'tanique. Ho'on ya cal te ha nix hich tojol nax.

¹⁵Ha yu'un ya cal te ha lec te yutsil-o'tanil, como mayuc bin lec xan ya spas te winic ta ye'tal ch'ulchan, ha te ya xwe' ya x'uch' soc te ay yutsil q'uinal ya ya'iy. Ha ya xjoquinot yu'un te jayeb c'ahc'al te scuxlejal ta ye'tal ch'ulchan te ya x'a'bot yu'un te Diose.

¹⁶Hich la jcac' co'tan ta sna'el te p'ijil-o'tanil soc ta stsahtayel te bintic yac ta pasel ta bahlumilal, (yu'un ay mach'a ma ba ya xway c'ahc'al ahc'abal);

¹⁷la jquil spisil te ya'tel Dios, soc te winic ma xhu' ya sna'be scuentahil spisil te bintic ya xc'oht ta pasel ta ye'tal ch'ulchan. Aunque bayel ya sle, ma xhu' ya sna'be scuentahil. Te mach'a ay sp'ijil yo'tan, aunque ya yal te ya sna'e, ma xhu' ya sna'be scuentahil.