Read Tzeltal Cantares 1 Bible Online

Cantares 1 - Tzeltal bible

Cantares 1

¹Te c'ayoj yu'un Salomón te c'ax lec yu'un yantic c'ayojetic.

²¡Te yacuc awuhts'uyon soc te uts'uyel awu'un! como te sc'uxul awo'tan c'ax hich lec a te bin ut'il vino.

³Mero sumet yic' te perfumehetic awu'un, te abihile hich c'ohem te bin ut'il malem perfume. Ha yu'un te c'uxat ta yo'tanic te ach'ixetique.

⁴¡Ic'awon bahel ta ora! Te ajwalil la yic'on ochel ta stsalul sna. Tse'el me co'tancotic soc bayel me yutsil co'tancotic ta atojol; c'ax me hich ya jna'cotic a te sc'uxul awo'tan te bin ut'il te vino. ¡Ha scuentahil te c'uxat ta yo'tanic!

⁵Yantsil-nich'nabex Jerusalén, ihc'al antson, pero t'ujbilon hich te bin ut'il te nahilpaq'uetic yu'un Cedar, hich te bin ut'il spac'al snahilpac' Salomón.

⁶Ma me ha'uc xawilon yu'un te ihc'one, como ha la schic'on te c'ahc'ale. Te yalatac te jnan ilinic ta jtojol, la yac'onic ta scanantayel te ts'usubiletic, pero te ts'usubil cu'un ma ba la jcanantay.

⁷Halbon ca'iy, ha'at te c'uxat ta co'tan, banti yac acanantay te tuminchijetic awu'un, banti yac awa'be scux yo'tanic ta ohlil c'ahc'al. ¿Bin yu'un te hich ayon te bin ut'il jbehyom ta sts'ehl te jtsohb chambahlametic yu'un amohloltac?

⁸Teme ma ba yac ana', ha'at te c'ax t'ujbilat ta yohlil yantic antsetic, t'una bahel te yoc ta schahpal te chambahlametic, ac'a ta we'el te tut tentsunetic awu'un ta sts'ehl te nahilpaq'uetic yu'un te jcanan-tuminchijetique.

⁹Ha'at te c'uxat ta co'tan, hichat ta co'tan te bin ut'il te yegua yu'un te scarreta faraón.

¹⁰Buen t'ujbil te acho ta yohlil ach'ahlel, soc te anuc' ta yohlil te uhaliletic.

¹¹Ya jpasbatcotic ch'ahlelaletic pasbilic ta oro, capalic ta plata.

¹²Te c'alal ay ta ti'mesa te ajwalil, puhc bahel sumet yic' te nardo cu'une.

¹³Te mach'a c'ux ta co'tan hich c'ohem cu'un te bin ut'il jtohm mirra te jipil ta yohlil schebal jchu'.

¹⁴Te mach'a c'ux ta co'tan hich c'ohem cu'unte bin ut'il jchej alheña-nichim ta ts'usubiletic yu'un En-gadi.

¹⁵¡Mero t'ujbilat! ha'at te c'uxultaybilat cu'un, ¡c'ax t'ujbilat! Te asit pajal soc stsuhmutetic.

¹⁶¡Mero t'ujbilat! ha'at te c'uxultaybilat cu'un, ¡mero lecat! Ha nichimetic te jwayibtique;

¹⁷ha cedro-te' te sts'amte'el te jnatic, ha q'uisis-te' te limbil tabla cu'untique.