Read Tzeltal Cantares 2 Bible Online

Cantares 2 - Tzeltal bible

Cantares 2

¹Ho'on rosa-nichimon yu'un Sarón, lirio-nichim yu'un te spamlejetique.

²Hich te bin ut'il lirio-nichim ta yohlil ch'ixetic, hich ay ta yohlil te ach'ixetic te mach'a c'ux ta co'tan.

³Hich te bin ut'il ste'el manzana ta yohlil te te'etic, hich ay ta yohlil te queremetic te mach'a c'ux ta co'tan. Bayel ya jmulan te ya juhcan jba ta yaxinal, soc buen chi' ya ca'iy te site.

⁴La yic'on bahel ta na banti ay bayel we'eliletic, soc te bandera yu'un te ay ta jtojol, ha te c'uxul-o'tanil.

⁵A'bon quich' quip ta pasas, a'bon xan yip co'tan ta manzanahetic, como ayon ta chamel ya ca'iy yu'un c'uxul-o'tanil.

⁶Te ha'uc ay ta ye'tal jol te sq'uexam-c'ab, soc te yacuc smech'on ta swa'el-c'ab.

⁷¡Ach'ixetic yu'un Jerusalén, tulan ya calbeyex, ta scuenta te gacela-chijetic soc te chijetic ta ha'mal, ma me xatijbeyic swayel te c'uxul-o'tanil ha to c'alal ya sc'an stuquel!

⁸¡Ha sc'op te mach'a c'ux ta co'tan! ¡Ilawil, yac ta talel, yac ta wihlel tal ta baba witsiltic, yac ta wihlel tal ta sba tsehletic!

⁹Te mach'a c'ux ta co'tan hich c'ohem te bin ut'il gacela-chij, o te bin ut'il jcolel tat chij. Ilawil, ay ta pat ts'ahc, yac ta yilel tal ta ventana, yac shu'sitaybel ta banti jamajtic.

¹⁰Te mach'a c'ux ta co'tan hich la yalbon: Hahchan, ha'at te c'uxultaybilat cu'un, te t'ujbilat cu'un, conic;

¹¹c'axix te yorahil sic, quechajix te ha'ale.

¹²T'ohmenix nichimetic ta lumq'uinal, c'ohtix yorahil c'ayoj, chicnajix ta a'iyel ta jlumaltic te sc'ayoj te xpuliwoc.

¹³Ayix sit te higuera, te jts'usubiltic te yac ta nich puhquix bahel te sumetal yic'. Hahchan, ha'at te c'uxultaybilat cu'un, te t'ujbilat cu'une, conic.

¹⁴Tsumut cu'un te ayat ta banti sc'ub tonetic, ta nac'ombahiletic ta witsiltic, a'bon quilbat asit awelaw, a'bon ca'iybat ac'op; como t'ujbil te ac'ope soc t'ujbil te asit awelaw, xchi.

¹⁵Jtsactic te waxetic, te tut waxetic te ya yixtalanic te ts'usubiletic, te ts'usubiletic cu'untic te yac ta nich.

¹⁶¡Te mach'a c'ux ta co'tan, ho'on cu'un, soc ha yu'unon! Yac ta we'el ta yohlil te lirio-nichimetique.

¹⁷C'alal yac ta sacubel q'uinal soc ya x'ahn bahel te axinale, suhtan talel, ha'at te c'uxat ta co'tan, hichucat te bin ut'il gacela-chij o te bin ut'il jcolel tat chij ta witsiltic yu'un Beter. [1]