Read Tzeltal Cantares 4 Bible Online

Cantares 4 - Tzeltal bible

Cantares 4

¹¡Buen t'ujbilat, ha'at te c'uxat ta co'tan, mero t'ujbilat! Te asit te macbil yu'un smahquil, hich te bin ut'il stsuhmut. Te stsotsel ajol hich te bin ut'il jchahp tentsunetic te ya xco tal ta witsiltic yu'un Galaad.

²Te sbaquel awe pajal soc jchahp tuminchijetic te loq'uesbil stsotselic, te ya xloq'uic tal ta atimal; spisilic ay wats yalatac, mayuc te ma x'alaj.

³Te sti'il awe pajal soc tsajal hilera; soc t'ujbil ta a'iyel te ac'ope. Te acho te macbil yu'un smahquil pajal soc granada xet'bil ta ohlil.

⁴Te anuc' pajal soc te bahlal ts'ahc yu'un David te pasbil scuenta yawil a'tejibal yu'un guerra; johc'ambil lajunwinic yoxbahc' (1,000) mahquilaletic tey a, spisilic ha smahquil soldadohetic te ay yip yo'tanic.

⁵Te schebal achu' pajal soc wats yal ha'mal chij, pajal soc wats yal ha'mal chij te yac ta we'el ta yohlil lirio-nichimetic.

⁶Ha to c'alal ya sacub q'uinal soc te ya x'ahn bahel te axinal, ya xbohon ta wits yu'un mirra, ta tsehl yu'un pom.

⁷¡C'ax t'ujbilat, ha'at te c'uxultaybilat cu'un! mayuc banti jihnem awu'un.

⁸Joquinawon cohel ta Líbano, jlecolat, joquinawon cohel ta Líbano. Ilawil c'alal ta sba te wits Amana, c'alal ta sba wits Senir soc Hermón; c'alal ta ch'entiquil yu'un chojetic, c'alal ta wits yu'un c'an bo'olay choj.

⁹La awu'untaybon te co'tan, ha'at quihts'inat, jlecolat; la awu'untaybon co'tan te junax buelta la awilon, ta jlihc nax awu ta anuc'.

¹⁰¡C'ax t'ujbil te sc'uxul awo'tan, ha'at quihts'inat, jlecolat! c'ax hich t'ujbil a te sc'uxul awo'tan te bin ut'il vino, soc te perfume awu'un, c'ax hich sumet yic' a te bin ut'il spisil yantic te sumet yiq'ue.

¹¹Jlecolat, ya x'oquin chab ta sti'il awe hich te bin ut'il schabec'al chab; chab soc leche ay ta ye'tal awac'. Te sumet yic' te ac'u' apac' pajal soc yic' te Líbano.

¹²Macbil nichimaltic c'ohemat, quihts'inat, jlecolat; macbil sloq'uib-ha' c'ohemat, sloq'uib-ha' te yich'oj sello;

¹³ha sts'unubil granado te ay spuhl, te ay slequil sit, ha snich alheña-nichim soc nardo,

¹⁴nardo soc azafrán, jalal te sumet yic' soc canela, spisil ta chahp te'etic yu'un pom, yu'un mirra soc áloe; soc spisil ta chahp te bintic sumet yic'.

¹⁵Ha'at sloq'uib-ha' yu'un nichimaltic, hotbil cuxul ha' te ya x'oquin tal ta Líbano.

¹⁶¡Hahchan, ic' ta stojol norte! ¡La', ic' ta stojol sur! Hu'xiya te ts'umbil q'uinal cu'un, pucbeyahic bahel yic' te perfume yu'une. ¡Ac'a taluc ta ts'umbil q'uinal te mach'a c'ux ta co'tan, ac'a slo'be sit te bin chi'e!