Read Tzeltal Cantares 5 Bible Online

Cantares 5 - Tzeltal bible

Cantares 5

¹Talemon ta ts'umbil q'uinal cu'un, quihts'inat, jlecolat; La jtsobix te mirra soc te perfumehetic cu'un, la jlo'ix te chab soc te schabec'al, la jcuch'ix te vino soc te leche cu'un. We'anic, ha'ex te jun co'tan jbahtic soc, uch'anic ta ban c'alal yac ac'anic.

²Wayon, pero ma ba way stuquel te co'tane. La jca'iy yac ta ic'aw ta puerta te mach'a c'ux ta co'tan: Jama, quihts'inat, jlecolat, stsuhmutat cu'un, te lecat cu'un. Ahch'em jol ta ts'ujul, te stsotsel jol ahch'em ta sts'ujulel ahc'abal, xchi.

³Hich la jcal: La jloq'uesix te jc'u' jpac'; ¿ya to bal jcha'lap xan? La jpoquix coc; ¿bin ut'il ya c'an yich' xan abac? xchihon.

⁴Te mach'a c'ux ta co'tan la yotses sc'ab ta ban jamal te puerta, la snihc sba co'tan yu'un.

⁵Hahchon ta sjambeyel puerta te mach'a c'ux ta co'tan, xt'uhlajan cohel mirra ta jc'ab, te yalatac jc'ab yatinej mirra te mahl cohel ta sba te sjamojibal puerta.

⁶La jambe te puerta te mach'a c'ux ta co'tan, pero loq'uemix bahel a te mach'a c'ux ta co'tane; c'alal c'opoj, la yic'bon co'tan. La jle, pero ma ba la jta; la jcawtay, pero ma ba la sjac'bon jc'op.

⁷La stahonic te jcananetic c'alal yac sbehentaybelic te pueblo; la smajonic, la yehchentesonic; la sloq'uesbonic jnahtil-c'u' te jcanan-ts'ahquetique.

⁸Ach'ixetic yu'un Jerusalén, tulan ya calbeyex, teme yac atahbonic te mach'a c'ux ta co'tan, halbeyahic te ayon ta chamel yu'un sc'uxul-o'tanil.

⁹¿Bin ut'il ay a te c'ax hich lec a te mach'a c'ux ta awo'tan te bin ut'il yan, ha'at te c'ax t'ujbil antsat yu'un spisil antsetic? ¿Bin ut'il ay a te c'ax hich lec a te mach'a c'ux ta awo'tan te bin ut'il yan, te hich yac awac' calcotic ta jamal?

¹⁰Te mach'a c'ux ta co'tan ha t'ujbil winic, na'bil sba ta yohlil lajunmil ta tuhl;

¹¹puro oro yilel te sjole; morotic te stsotsel sjol soc buen ihc' hich te bin ut'il joj-mut.

¹²Te sit pajal soc stsuhmutetic ta sti'il uc'umetic, pocbil ta leche, lec ac'bil ta yawil.

¹³Te scho, pajal soc jchohl nichimaltic te sumet yic'; te sti'il ye, pajal soc lirio-nichim te ya xt'uhlaj loq'uel mirra tey a.

¹⁴Te sc'ab, ha xotbil oro ch'albil ta c'anal topacio; te sbaq'uetal pajal soc huxbil marfil te yich'oj ch'alel ta zafiro.

¹⁵Te ya' ha oyetic pasbilic ta mármol te nahcambil ta yich'o-ip pasbilic ta puro oro; hich yilel stalel te bin ut'il Líbano, tsahbil hich te bin ut'il te cedrohetic yu'une.

¹⁶Te spa'jaj, mero chi', ta scohtol mulantic sba. ¡Hich ay te mach'a c'ux ta co'tan, hich ay te mach'a jun co'tan soc, ach'ixetic yu'un Jerusalén!