Read Tzeltal Cantares 6 Bible Online

Cantares 6 - Tzeltal bible

Cantares 6

¹Ha'at te c'ax t'ujbil antsat ta yohlil te antsetic, ¿banti bahem te mach'a c'ux ta awo'tan? ¿Banti baht te mach'a c'ux ta awo'tan yu'un ya joquinatcotic ta slehel?

²Te mach'a c'ux ta co'tan cohem bahel ta ts'umbil q'uinal yu'un, ta chohlochohl te bintic sumet yic', baht ta yaq'uel ta we'el ta ts'umbil q'uinal te tuminchijetic yu'un soc ta stsobel lirio-nichimetic.

³Ha yu'unon te mach'a c'ux ta co'tan soc ha cu'un te mach'a c'ux ta co'tane; yac ta yaq'uel ta we'el te tuminchijetic yu'un ta yohlil te lirio-nichimetique.

⁴Ha'at te c'uxultaybilat cu'un, t'ujbilat hich te bin ut'il Tirsa, hich jc'anojat te bin ut'il Jerusalén, hich smuc'ul awutsilal te bin ut'il soldadohetic ayic ta marcha.

⁵¡Ma xawilonix, yu'un ya stsalon te asite! Te stsotsel ajol pajal soc jchahp tentsunetic te ya xco tal ta witsiltic yu'un Galaad.

⁶Te sbaquel awe pajal soc jchahp tuminchijetic te loq'uesbil stsotselic, te ya xloq'uic tal ta atimal; spisilic ay wats yalatac, mayuc te ma x'alaj.

⁷Te acho te macbil yu'un smahquil pajal soc granada xet'bil ta ohlil.

⁸Ay oxwinic (60) ta tuhl ajwalil-antsetic, chanwinic (80) ta tuhl yantic antsetic, soc ach'ixetic te ma xhu' ta ahtayel;

⁹pero te stsuhmut cu'un stuquel ay soc c'ax lec, ha nax stuquel te yantsil-al te snan, te tsahbil yu'un te mach'a alatayot yu'un. C'alal ilot yu'un te ach'ixetic, halbot yutsil sc'oblal yu'unic; te ajwalil-antsetic soc te yantic antsetic halbot yutsil sc'oblal yu'unic.

¹⁰¿Mach'a a ini te hich yilel te bin ut'il te sacubel q'uinal, te t'ujbil hich te bin ut'il te u, te hich sts'anabul te bin ut'il te c'ahc'al, te hich smuc'ul yutsilal te bin ut'il soldadohetic ayic ta marcha?

¹¹Cohon bahel ta ts'umbil nogal te'etic ta yilel te bintic puhlinem ta spamlej, ta yilel teme pulinemic te ts'usubiletic, teme nichinemiquix te granadahetique.

¹²Mayuc bin yac jna'bel a, te mach'a jc'anoj la yac'on ta carretahetic yu'un Aminidab.[2]

¹³¡Suhtan tal, suhtan tal, sulamita; suhtan tal, suhtan tal, scuenta yu'un ya quilatcotic! ¿Bin yu'un yac awilic te sulamita? Ya jc'ancotic te yac awa'iy ahc'ot hich te bin ut'il ta campamentohetic.