Read Tzeltal Isaías 10 Bible Online

Isaías 10 - Tzeltal bible

Isaías 10

¹Ay me swocolic te mach'atic ya spasic leyetic te ma stojiluc, te mach'atic ya sts'ihbayic mandariletic yu'un uts'inwanej,

²te mayuc ta cuenta yu'unic te stojil chahpanel te pobrehetic, te ma stojiluc ya schahpanic te pueblo cu'un te ay ta uts'inel, te ya spojbeyic bintic ay yu'un te me'ba' antsetic soc ya yelc'anic te me'ba' alaletique.

³¿Bin yac apasic ta yorahil ich'el ta c'op, te c'alal namal ya xtal te jinele? ¿Mach'a yac ac'ambe coltayel? ¿Banti yac awaq'uic hilel te ac'ulejalique?

⁴Mayuquix bin yan ay ta pasel, ha xanix te yac ac'ol abahic ta yohlil te jchuqueletic, te ya xyahlex bahel ta yohlil te mach'atic lajic ta milel. Ta spisil ini, ma ba lahmaj yilimba, shachoj to te sc'ab ta yaq'uel castigo.

⁵¡Ay me swocol te Asiria! te xul yu'un quilimba, ay ta sc'ab te nahbate' yu'un te quilimbahe.

⁶Ya jticon ta contrahinel jun jmulawil nación, ya jticon bahel ta stojol te pueblo te ya shachbon quilimba, yu'un ya spojbe sbiluc soc ya yich'be bintic ay yu'un, soc yu'un ya sts'o' ta teq'uel hich te bin ut'il ahch'al ta calle.

⁷Pero ma hichuc snopoj, ma hichuc ay ta yo'tan, te bin snopoj, ha te ya xjinawan, te ya slajin tsobol nacionetic.

⁸Como hich ya yal: Te príncipaletic cu'un ¿ma bal spisiluc ajwaliletic?

⁹Te Calno ¿ma bal pajaluc soc te Carquemis, te Hamat pajal soc te Arfad, soc te Samaria pajal soc te Damasco?[8]

¹⁰Hich te bin ut'il la sta c'ohel jc'ab ta banti cuentahimbil yu'un te loc'ombahetic, te c'ax hich a te sloc'ombahic te bin ut'il yu'un Jerusalén soc Samaria;

¹¹hich te bin ut'il la jpasbe te Samaria soc te loc'ombahetic yu'un, ¿ma bal hichuc nix ya jpasbe te Jerusalén soc te loc'ombahetic yu'une? xchi.

¹²Te c'alal pasbilix yu'un Jehová spisil te bin ya spas ta wits Sión soc ta Jerusalén, ya me ya'be castigo te ajwalil yu'un Asiria yu'un te toybahil ta yo'tan soc te stoybahil te site.

¹³Yu'un hich yaloj: Ho'on la jpas ta scuenta yip jc'ab soc ta scuenta sp'ijil co'tan, como ya jna' q'uinal. La jloq'ues te mojonetic yu'un te pueblohetic, la jpojbe te sc'ulejalic, soc hich la jin cohel ajwaliletic te bin ut'il mach'a ay yip.

¹⁴La jtsacbe te sc'ulejalic te pueblohetic hich te bin ut'il mach'a ya yotses sc'ab ta spechech mut. Hich te bin ut'il ya yich' tsobel tomut te ch'ayemic hilel, hich la jcu'untay spisil te q'uinal, mayuc mach'a la stij xic', o la sjam ye yu'un ya x'awon, xchi.

¹⁵¿Ya bal stoy sba te echej ta stojol te mach'a ya xtuhunot yu'une? ¿ya bal stoy sba te sierra ta stojol te mach'a ya xtuhunot yu'une? ¡Ma spas te bastón ya shach te mach'a tsacbil yu'une! ¡Ma spas te xul ya slic mohel te mach'a ma si'uc!

¹⁶Ha yu'un te Cajwaltic Jehová te scuentahinej spisil, ya me sticon bahel chamel ta stojol te mach'atic ay yipic; ya xtsacot ta c'ahc' te sbaq'uetalic hich te bin ut'il c'ahc' te yac ta tihlele.

¹⁷Te sacal q'uinal yu'un Israel ya sutp'ij ta c'ahc', te Ch'ul Dios yu'unic ya sutp'ij ta yat c'ahc' te ta junax c'ahc'al ya schic' soc ya slajin te pimil ch'ixetic soc te ch'ixetic yu'une.

¹⁸Te yutsilal te tohyem te'etic soc te lequil q'uinal yu'un jc'axel ya xlajic, hich ya xc'oht te bin ut'il mach'a ay ta chamel te ya xlaj bahel te yipe.

¹⁹Te te'etic te ya xhilic ta tohyem te'etic yu'un, mayuquix bayel, ya xhu' ta ahtayel yu'un alal.

²⁰Ya xc'oht ta pasel ta hich ora, te mach'atic hilemic ta Israel, te mach'atic hilemic yu'un te sna Jacob ma ba ya smahliyiquix coltayel yu'un te mach'a ehchentesot yu'une, ha ya smahliy coltayel yu'un te Jehová, te Ch'ul Dios yu'un Israel.

²¹Te mach'atic hilemic, ya suhtic tal, te mach'atic hilemic yu'un Jacob ya suhtic tal ta stojol Dios te ay yip.

²²Te pueblo awu'un, Israel, aunque hich yipal te bin ut'il shi'al mar, ha nax ya suhtic tal te mach'atic hilemique. Halbilix te ay jinel, mero stojil bin ya yich' pasel.

²³Te Cajwaltic, te Jehová te scuentahinej spisil, ya me sc'ohtes ta pasel te lajinel spisil te q'uinal hich te bin ut'il chapale.

²⁴Ha yu'un hich ya yal Cajwaltic, te Jehová te scuentahinej spisil: Pueblo cu'un te nahinemex ta Sión, ma xaxi'ic te Asiria. Ya smajat ta xul soc ya shach snabate'ic ta atojol hich te bin ut'il la spas te Egipto;

²⁵pero nopol ya xlahmaj te sc'ahc'al co'tan ta atojol, te quilimba ya xc'oht ta stojolic yu'un ya xlajinotic yu'un.

²⁶Te Jehová te scuentahinej spisil ya me smajticlan ta xul, hich te bin ut'il la slajin te Madián ta muc'ul ton Oreb; soc ya me stoy snahbate' ta stojol te mar, hich te bin ut'il la spas ta Egipto.

²⁷Ta hich ora ya xcohtesbot yihcats ta anehquelic soc te yugo yu'unic ta anuc'; ya xwac' te yugo yu'un ha'at tsahbilat cu'un.

²⁸Te jcontra c'oht c'alal ta Ajat, c'ax bahel ta Migrón, la yihquitay hilel ihcatsil ta Micmas.

²⁹C'axic bahel ta tec'o-ha', la spas scampamentohic ta Geba; nihc yo'tan te Ramá, loc' ta ahnel te Gabaa yu'un Saúl.

³⁰¡Tulan awonanic, yantsil-nich'an Galim! ¡A'iya awa'iy, Laisa! ¡C'ux obol sba te Anatot!

³¹Te Madmena loc' ta ahnel, te mach'atic nahinemic ta Gebim la snac' sbahic.

³²Yo'tic nix ya xquehchaj ta behel ta Nob, ya shach sc'ab ta scontrahinel te wits yu'un te yantsil-nich'an Sión, ta scontrahinel te wits yu'un Jerusalén.

³³Ilawil, te Cajwaltic, te Jehová te scuentahinej spisil, ya sloq'uesbe te sc'abc'ab te' ta scuenta tulan yip; te tohyem te'etic ya yich'ic ts'eticlanel, te banti c'ax toyemic ya yich'ic pehc'anel.

³⁴Ya sts'eticlan ta echej te tohyem te'etic, ya xyahlic te t'ujbil te'etic yu'un Líbano.