Read Tzeltal Isaías 14 Bible Online

Isaías 14 - Tzeltal bible

Isaías 14

¹Te Jehová ya me sna'be yo'bolil sba te Jacob, ya stsa yan buelta te Israel soc ya yac' ayinuc xan ta sq'uinalic. Ya xjoquinotic yu'un jyanlumetic te junax ya xc'ohtic soc te sts'umbal Jacob.

²Te nacionetic ya me yiq'uic bahel ta slumalic, soc ha a'batetic soc criadahetic ya xc'ohtic yu'un te sna Israel ta sq'uinal Jehová. Ya schuquic te mach'atic chucotic bahel yu'unic soc ya scuentahinic te mach'atic uts'inotic yu'unique.

³Te bin ora te Jehová ya ya'beyex acux awo'tanic yu'un awocolic, yu'un c'ux obol abahic soc yu'un tulan mosohinel la awich'ic,

⁴yac awalic te tsahbil c'op ini ta scontrahinel te ajwalil yu'un Babilonia: ¡Ilawil bin ut'il laj te j'uts'inwanej, bin ut'il lahmaj te sc'ahc'al yilimba![9]

⁵Te Jehová la swac'be xul te mach'atic chopolic, te sbastón te ajwaliletic,

⁶te la yehchentesic pueblohetic ta scuenta yilimba, spisil ora la smajticlanic, te la scuentahinic nacionetic soc yilimba, ma ba la scom sbahic ta yuts'inel.

⁷Spisil te q'uinal ya scuxix yo'tan soc lamal q'uinal ya ya'iy; ya xhahchic ta c'ayoj.

⁸Ha nix hich te tajalaltic soc te cedrohetic ta Líbano tse'el yo'tanic awu'un, hich ya yalic: Te c'alal jinat, mayuquix mach'a ya xtal sts'etcotic, xchihic.

⁹Te stsobojibal mach'atic chamenic te ay ta ye'tal ya stij sba yu'un ya xloq'uic tal stahat; ya stij hahchel te mach'atic chamenic yu'un ya xtal stahat, ya stij hahchel ta shuctajibic spisil te príncipaletic yu'un te bahlumilal, spisil te ajwaliletic yu'un te nacionetique.

¹⁰Spisilic ya xc'opojic, hich ya yalbat: ¡Ha nix hichat, laj awip hich te bin ut'il te ho'otcotic; hich c'ohat te bin ut'il te ho'otcotique! xchihic.

¹¹Co bahel ta stsobojibal mach'atic chamenic te atoybahil soc te sc'op te arpahetic awu'une. Ha awayib ya xc'oht te yal ha, soc ya smucat te yal hahetique.

¹²¡Ilawil bin ut'il ch'ayat cohel tal ta ch'ulchan, ha'at te sacubel ec', yal-snich'anat sacubel q'uinal! La awich' ch'ojel cohel tal ta lumq'uinal, ha'at te la alajimbe yip te nacionetique.

¹³Hich la awal ta awo'tan: Ya xmohon bahel ta ch'ulchan, ya cac' juctajib ta sba te eq'uetic yu'un Dios; ya juhcan jba ta wits yu'un tsoblej, ta stojol norte;

¹⁴ya xmohon bahel ta stoyolil tocal, pajal ya xc'ohon soc te Mach'a Mero Toyol, xchihat.

¹⁵Pero la awich' ch'ojel cohel c'alal ta stsobojibal mach'atic chamenic, c'alal ta sc'ubulil xahab.

¹⁶Te mach'atic ya yilat, t'ojol sitic ta atojol, ya xc'opoj yo'tanic ta acuenta, hich ya yalic: ¿Ha bal te winic ini te la snihc te bahlumilal, te la yac' nihcuc te nacionetic,

¹⁷te la yac' c'atp'ujuc ta jochol q'uinal te bahlumilal, te la sjinticlan te pueblohetic yu'un, te ma ba la scoltay bahel te jchuqueletique?

¹⁸Spisil te ajwaliletic yu'un te nacionetic soc yutsilalic ya scux yo'tanic, jujutuhl ta muquenal yu'un.

¹⁹Yan te ha'ate, ch'ojbilat loq'uel ta amuquenal hich te bin ut'il te bin ihlaybil, hich te bin ut'il sc'u' te mach'atic chamenic te lowbilic ta espada, te cohic bahel ta sc'ubulil te muquenal, hich te bin ut'il chamen baq'uet te ts'o'ts'o'tec'bil.

²⁰Ma ba pajal yac awich' muquel soc, como la ajin te aq'uinal soc la amilticlan te pueblo awu'une. Te sts'umbalic te mach'atic chopolic ma ba ya xhalbotiquix sbihilic.

²¹Chahpana jmilaw yu'un te yal-snich'nab ta scaj smul te sme'statique; ma me xhahchic, ma me xyich'ic te q'uinal, soc ma me snojesic ta pueblohetic te bahlumilale.

²²Ya xhahchonix ta scontrahinel, xchi te Jehová te scuentahinej spisil, ya jlajimbe sbihil soc te mach'atic hilemic yu'un Babilonia, te yal-snich'nab soc smamatac, xchi te Jehová.

²³Ya jc'atp'un ta yawil jch'ix-j'uchetic soc pampam-ha'etic. Ya jmes ta mes yu'un jinel, xchi te Jehová te scuentahinej spisil.

²⁴Te Jehová te scuentahinej spisil hich la yal ta jamal: Ya me xc'oht ta pasel hich te bin ut'il chapalix cu'un, hich ya xc'oht te bin ut'il jnopoj:

²⁵Ya jin te Asiria ta jlumal, ya jts'o'ticlan ta teq'uel ta witsiltic cu'un; ya xloc' ta stojol te pueblo cu'un te yugo yu'une, ya xloc' te yihcats ay ta snehquel, xchi.

²⁶Hich ay te bin jnopoj ta scontrahinel swohlol te bahlumilal; soc ha te c'abal ini te hachbil ta stojol spisil te nacionetique.

²⁷Como hich snopoj te Jehová te scuentahinej spisil, ¿mach'a ya xhu' ya scom? Shachoj sc'ab, ¿mach'a ya yac' suhtuc bahel?

²⁸Ta ha'bil te cham te ajwalil Acaz, chicnaj ta halel te c'op ini:

²⁹Apisilic, filisteohex, ma me tse'eluc awo'tanic yu'un te waq'uix te xul te la yehchentesat; como ta slohp' te chan ya xloc' tal ti'awal chan, te sit ya yac' ha c'ahc'al chan te ya xwiluntaywan.

³⁰Te mach'atic mero pobrehetic ya sta swe'elic, te mach'atic mayuc bin ay yu'unic jun yo'tan ya xwayic; pero ya cac' lajuc ta wi'nal te alohp', soc ya jlajin te mach'atic hilemic awu'un.

³¹¡Awetan, puertahat! ¡awonan, pueblohat! ¡Uhlan bahel yu'un xiwel, ha'at filisteohat! como ya xtal ch'ahil ta stojol norte, mayuc jtuhluc te ya xloc' ta banti scholoj sbahic.

³²¿Bin ya sutbe te jal-c'opetic yu'un te nación? Ha te Jehová la shach te Sión, tey ya snac' sbahic a te mach'atic ay swocolique.