Read Tzeltal Isaías 19 Bible Online

Isaías 19 - Tzeltal bible

Isaías 19

¹Ha te bin halbot sc'oblal te Egipto: Ilawil te Jehová mohem ta sba tocal te ya x'ahnimaj bahel, ya x'och bahel ta Egipto. Te loc'ombahetic yu'un Egipto ya xnihquic ta stojol, soc xcham yo'tanic te egipciohetique.

²Ya yal te Jehová: Ya cac' te ya scontrahin sbahic te egipciohetic, jujutuhl ya stsac sbahic soc yermano, jujutuhl soc te spat-xuhc, te pueblohetic ya scontrahinic yan pueblohetic, soc ajwalil ya scontrahin yan ajwalil.

³Ya xlaj yip yo'tanic te egipciohetic, ya jlajimbe te bin schapojique. Ha yu'un ya sjoc'obeyic te yahcananic soc te mach'atic ya sc'oponic ch'uhlelaletic, te jwoyawetic soc te jna'ojeletique.

⁴Ya cac' te Egipto ta sc'ab yajwal te mero tulan, ya xcuentahinotic yu'un jtuhl ajwalil te ya x'uts'inwan, xchi te Jehová te scuentahinej spisil.

⁵Ya xtup' te ya'lel te muc'ul-ha', ya xtup' soc ya xtaquij te muc'ul-ha'e.

⁶Ya xtuhub te pasbil be-ha'etic, ya xtup' soc ya xtaquij te be-ha'etic ta Egipto, te jalaletic soc te aquiltic ayic ta ha' ya xtaquijic.

⁷Te ha'maletic ta ti' muc'ul-ha', ta ti' muc'ul-ha' Nilo, soc spisil te bintic ts'umbilic ta ti' muc'ul-ha' ya xtaquijic, jc'axel ya xch'ayic bahel.

⁸Ya smel yo'tanic te jtsac-chayetic, ya x'oq'uic spisil mach'atic ya yotsesic sluco-chayic ta muc'ul-ha'; ya xch'ay yo'tanic te mach'atic ya sch'ojic ochel stsaco-chayic ta ha'.

⁹Te mach'atic ya x'a'tejic ta spasel lino soc te mach'atic ya sjalic stsaco-chay, ya sch'ay smuc'ul yo'tanic,

¹⁰te jal-paq'uetic ya me xpehc'aj yo'tanic, soc spisil te j'a'teletic ya me smel yo'tanic.

¹¹Ma sna'ic q'uinal te príncipaletic yu'un Zoán, te bintic schapojic te p'ijil j'ac'-o'taniletic yu'un faraón mayuc scuentahil ya xc'ohtic. ¿Bin ut'il te hich yac awalbe te faraón: Ho'on yal-snich'anon te p'ijil winiquetic, ho'on yal-snich'anon te antiguo ajwaliletic, te xchihexe?

¹²¿Banti ay yo'tic te p'ijil winiquetic awu'une? Ac'a yalbat, ac'a ya'bat ana' bin a te schapoj ta stojol Egipto te Jehová te scuentahinej spisil.

¹³Sonsohetic te príncipaletic yu'un Zoán, te príncipaletic yu'un Menfis la yich'ic lo'loyel; te mach'atic te ha ton yu'un xuhc na c'ohem yu'un te pueblo yu'unic, la slo'loyic te Egipto.

¹⁴Te Jehová la yac'ticlambe espíritu yu'un ma sna'ic bin ya spasic; ha la showiytesic te Egipto ta spisil bin ya spas, hich te bin ut'il jyacubel te xbahlawet ta xe.

¹⁵Mayuc bin ya xhu' ya scoltay te Egipto chican teme sjol o sne, xahn o jalal.

¹⁶Ta hich ora te egipciohetic hich ya xc'ohtic te bin ut'il antsetic; ya me xnihc yo'tanic yu'un xiwel ta stojol te sc'ab Jehová te scuentahinej spisil te ya stoy ta stojolic.

¹⁷Soc te sq'uinal Judá ya ya'be xiwel te egipciohetic; spisil mach'atic te ya xhalbotic sc'oblal Judá ya me xiwic yu'un, ta scaj te bin schapoj te Jehová te scuentahinej spisil.

¹⁸Ta hich ora ay ho'eb pueblohetic ta Egipto te ya xc'opojic ta sc'op Canaán soc te ya yalic ta jamal te jun yo'tanic ta stojol te Jehová te scuentahinej spisil. Te jun pueblo ya x'a'bot sbihilin Pueblo yu'un Herez.[10]

¹⁹Ta hich ora ay me scajtajib ta chiq'uel mahtanil yu'un Jehová ta yohlil te sq'uinal Egipto soc ay me pasbil sna'ojibal yu'un Jehová ta smojonil te sq'uinale.

²⁰Ha seña soc testigo ta sq'uinal Egipto ya xc'oht ta stojol Jehová te scuentahinej spisil, yu'un ya me yawtayic te Jehová ta scaj te ayic ta uts'inel, hich te Jehová ya me sticon tal jcoltaywanej soc jcanan te ya x'ac'otic ta libre yu'une.

²¹Te Jehová ya yac' sba ta na'el yu'un te egipciohetic, soc ta hich ora ya me sna'beyic sba te Jehová. Ya me yaq'uic milbil mahtaniletic soc yantic mahtaniletic; ya schap sc'opic ta stojol Jehová soc ya sc'ohtesic ta pasel.

²²Te Jehová ya me yehchentes te Egipto: ya yehchentes soc ya spoxtay. Ya me suhtes yo'tanic ta stojol Jehová, soc te Jehová ya me sna'be yo'bolil sbahic soc ya me spoxtaylan.

²³Ta hich ora ay me muc'ul be c'alal Egipto c'alal ta Asiria; te asiriahetic ya x'ochic bahel ta Egipto soc te egipciohetic ya x'ochic bahel ta Asiria. Te egipciohetic soc te asiriahetic pajal ya sch'uhuntayic te Jehová.

²⁴Ta hich ora te Israel yoxebal ya xc'oht soc Egipto soc Asiria scuenta bendición ya xc'ohtic ta stojol te bahlumilal,

²⁵como te Jehová te scuentahinej spisil ya me yac'ticlambe bendición, hich ya yal: Bayel me yutsil te Egipto te pueblo cu'un; soc te Asiria, ha te ya'tel jc'ab; soc te Israel, ha te bin ya xc'oht ta jcuenta, xchi.