Read Tzeltal Isaías 23 Bible Online

Isaías 23 - Tzeltal bible

Isaías 23

¹Ha te sc'op jalwanej ta stojol te Tiro: ¡Awetan, barcohetic yu'un Tarsis! como jihnemix te Tiro, mayuquix na o yochibal barcohetic. C'alal ta sq'uinal Chipre halbotic sc'oblal.

²¡Ch'abanic, ha'ex te nahinemex ta ti'mar, ha'ex jchombajelex ta Sidón, te a'botex ac'ulejalic yu'un te mach'atic c'axic ta mar!

³C'ax tal ta muc'ul ha'etic te sit awal-ts'unubil yu'un Sihor, te sit awal-ts'unubil yu'un te Nilo ha atojolic c'oht; ha stsobomba jchombajeletic c'ohex yu'un te nacionetique.

⁴¡Q'uexawan, Sidón! como hich ya yal te yip te mar: Mayuc bin ora alajon, mayuc mach'a la jcalatay, mayuc la jcoltes queremetic soc mayuc la jcoltes ach'ixetic, xchihat.

⁵C'alal ya xc'oht ta Egipto te c'ope, c'ux me ya ya'iyic yu'un te bin halbil sc'oblal te Tiro.

⁶C'axanic bahel ta Tarsis, ahcanajanic, ha'ex te nahinemex ta ti'mar.

⁷¿Ma bal ha'uc te namey pueblo awu'un ini te ay yutsil q'uinal ya ya'iy, te behen bahel ta nahinel ta namal?

⁸¿Mach'a hich la schapbe sc'oblal te Tiro, te la spucticlan coronahetic, te jchombajeletic yu'un ha príncipaletic, soc ich'bilic ta muc' ta bahlumilal te jmambajeletic soc jchombajeltic yu'une?

⁹Ha la schap te Jehová te scuentahinej spisil, yu'un ya spehc'ambe stoybahil yu'un spisil yutsilal, soc yu'un ya spehc'an hilel spisil te mach'atic ay yipic ta q'uinal.

¹⁰C'axan bahel ta muc'ul-ha' te ay ta aq'uinal,[12] ha'at yantsil-nich'anat Tarsis, como mayuquix awip.[13]

¹¹Te Jehová la shach sc'ab ta stojol mar, la yac' nihcuc te nacionetic; la yal mandar ta stojol Canaán te ya me yich'ic jinel te joyob ts'ahquetic yu'une.

¹²Hich la yal: Ma me ayuquix stse'elil awo'tan, uts'imbil ach'ixat, yantsil-alat Sidón. Hahchan, c'axan bahel ta Chipre, pero ma ba yac ata cux-o'tan tey a, xchi.

¹³¡Ilawil te q'uinal yu'un te caldeohetique! Ma ba cuxulix te pueblo ini. Te Asiria la sutp'in ta yawil ti'awal chambahlametic yu'un jochol taquin q'uinal. La spasic toyol mohibal ts'ahquetic, la sjinticlanic te muc'ul nahetic, busul hil yu'unic.

¹⁴¡Awetan, barcohetic yu'un Tarsis! como jimbil te ats'ahquile.

¹⁵Ta hich ora te Tiro ya xch'ay ta o'tanil lajuneb schanwinic (70) ha'bil, hich te bin ut'il jayeb ha'bil ya xcuxaj jtuhl ajwalil. C'alal ya sts'acay te lajuneb schanwinic (70) ha'bil, hich ya xc'oht ta stojol Tiro te bin ya yal ta c'ayoj yu'un te j'antsinel ants, te hich ya yal:

¹⁶Ich'a te arpa, behentaya te pueblo, j'antsinel ants te ch'aybilat ta o'tanil. Tija lequil música, c'ayojtaya bayel c'ayojetic, scuenta yu'un ya xna'otat a, xchi.

¹⁷C'alal ts'acay lajuneb schanwinic (70) ha'bil, te Jehová ya me sna' xan te Tiro, te ha ya schon sba yan buelta ta antsinel ta stojol spisil te nacionetic ta bahlumilal.

¹⁸Pero te stojol ya'tel ya x'ac'ot ta stojol Jehová. Ma ba ya yich' q'uejel, ma ba ya yich' tsobel, como te stojol ya'tel ha yu'un ya xc'oht te mach'atic ayic ta stojol Jehová, scuenta yu'un ya xnoj sch'uhtic soc ya slap t'ujbil sc'u' spaq'uic a.