Read Tzeltal Isaías 24 Bible Online

Isaías 24 - Tzeltal bible

Isaías 24

¹Ilawil, te Jehová ya sjohchobtes te lumq'uinal, mayuc bin ya xhil yu'un; ya syanijtesbe te sba te q'uinal soc ya spucticlan bahel te mach'atic nahinemic tey a.

²Pajal bin ya xc'oht ta stojol te pueblo soc te sacerdote, te a'bat soc te yajwal, te criada soc te yajwal, te jmambajel soc te jchombajel, te mach'a ya yac' ta majanel soc te mach'a ya smajan, te mach'a ay sbet soc te mach'a ya yac' ta betanel.

³Te q'uinal jc'axel jochol ya xhil, jc'axel pojbil sbiluc ya xhil, como hich yaloj te Jehová.

⁴Ya xtaquij te lumq'uinal soc ya sayub, ya sayub soc mayuc yip te bahlumilal, ya xlaj yipic te pueblohetic ta bahlumilal te ay sc'oblalic.

⁵Bohloben sc'oblal te q'uinal ta scaj te mach'atic nahinemic tey a, como la sc'axuntayic te mandariletic, la slajimbeyic sc'oblal te chahpambil mandariletic, la sjinic te chapbil-c'op te sbahtel q'uinal ay.

⁶Ha scuentahil te laj te q'uinal yu'un bohlob sc'oblal, soc te mach'atic nahinemic tey a ya xc'ax swocolic yu'un smulic. Ha scuentahil te lajinot te mach'atic nahinemic ta q'uinal, mayuc tsobol hil te ants-winiquetique.

⁷Laj te vino, taquij te ts'usubil, ahcanajic spisil te mach'atic tse'el yo'tanic a.

⁸Laj yutsil sc'op te c'ayobetic, ch'ab sc'opic te mach'atic tse'el yo'tanic, laj yutsil sc'op arpa.

⁹Ma ba ya yuch'iquix vino soc c'ayoj; ch'a ya xc'oht te uch'balil ta stojol te mach'atic ya yuch'ic.

¹⁰Jimbilix te pueblo te ma ba ich'apastay, macal spisil te nahetic yu'un mayuc mach'a ya x'och tey a.

¹¹Ay awetic ta callehetic yu'un mayuc vino; laj spisil te tse'el-o'tanil, la yich'ix loq'uesel te yutsil q'uinal ta bahlumilal.

¹²Jimbil hilel te pueblo, wuybil c'oht te yochibal.

¹³Hich ya xc'oht ta bahlumilal soc ta stojol nacionetic te bin ut'il ya yich' yuq'uel te olivo, te bin ut'il ya yich' xan lehel te sit ts'usub te c'alal tsobilix a.

¹⁴Ya stoy sc'opic, ya x'awonic yu'un yutsil q'uinal, c'alal ta smahlib c'ahc'al ya x'awonic yu'un te smuc'ul yutsilal te Jehová.

¹⁵Ha yu'un halbeya yutsil sc'oblal Jehová ta banti ya xloc' tal c'ahc'al, ta ti'ti'mar toybeya sc'oblal te sbihil Jehová, te Dios yu'un Israel.

¹⁶C'alal ta sti'il bahlumilal ya ca'iytic c'ayoj te hich ya yal: ¡Ay yutsil sc'oblal te mach'a toj yo'tan! xchi. Hich la jcal: ¡Ay me jwocol, ay me jwocol, ay yo'bolil jba! Te j'ac'awetic ta c'abal ya x'ac'awanic ta c'abal, ta scuenta schopolilic ya x'ac'awanic ta c'abal, xchihon.

¹⁷¡Xiwel, hotbil ch'en soc yaquil ya xc'ohtic ta atojol, ha'at te nahinemat ta q'uinal!

¹⁸Te mach'a ya x'ahn loq'uel ta scuenta te sc'op xiwel ya xch'ay cohel ta hotbil ch'en; te mach'a ya xloc' tal ta hotbil ch'en ya x'och ta yaquil; como ya xjahm te sventanahul ch'ulchan soc ya xnihquic te yich'o-ip te bahlumilale.

¹⁹Ya yich' jinel te q'uinal, ya xjahm te lumq'uinal, tulan ya xyuq'uilanot te q'uinale.

²⁰Hich ya xnihc te q'uinal te bin ut'il jyacubel, hich ya xyuc'ot te bin ut'il lehch-na; c'ax al te smule, ya xyahl cohel yu'un, mayuc bin ora ya xhahch xan.

²¹Ta hich ora te Jehová ya me ya'be castigo te bintic ay yipic ta ch'ulchan ta toyol soc te ajwaliletic ta bahlumilal.

²²Ya me yich'ic tsobel hich te bin ut'il ya yich'ic tsobel te jchuqueletic ta hotbil ch'en; tey macal ya xhilic a; c'alal c'axix bayel c'ahc'al a, ya me yich'ic castigo.

²³Ya xtsajub yu'un q'uexlal te u, ya xq'uexaw te c'ahc'al te c'alal ya x'och ta ajwalil ta wits Sión, ta Jerusalén te Jehová te scuentahinej spisil, soc te ya xtihl yutsilal ta stojol te mamaletic yu'une.