Read Tzeltal Isaías 25 Bible Online

Isaías 25 - Tzeltal bible

Isaías 25

¹Jehová, ha'at te Diosat cu'un; ya jtoybat ac'oblal soc ya calbat yutsil abihil, como bayel yutsil bintic la apas, ha melel soc stalel ay te bintic achapoj ta namey.

²Como la ac'atp'un ta busambil ton te pueblo, la ajin te pueblo te joybil ta sts'ahc, te muc'ul nahetic yu'un te jyanlumetic ma pueblohuquix, mayuc bin ora ya yich' cha'pasel xan.

³Ha scuentahil te ya me yalbe yutsil ac'oblal te pueblo te ay yip, ya me xi'at te pueblo te ya x'uts'inwanic.

⁴Como ha'at ahnibalat yu'un te pobre, ahnibalat ta yorahil swocol te mach'a mayuc bin ay yu'un, ahnibalat yu'un te tulan ic'al ha'al soc axinalat yu'un te sq'uixinal c'ahc'al. Como te sahb ye te j'uts'inwanej hich c'ohem te bin ut'il tulan ic'al ha'al ta yorahil sic,

⁵hich te bin ut'il sq'uixinal c'ahc'al ta jochol taquin q'uinal; hich yac acom te xjuyetic te jyanlumetic te bin ut'il ya xlahmaj sq'uixinal c'ahc'al ta yaxinal tocal, hich ya xch'ab te c'ayoj yu'un te j'uts'inwaneje.

⁶Ta wits ini te Jehová te scuentahinej spisil ya me schahpambe bayel lequil we'elil yu'un spisil te nacionetic, bayel lequil vino, tsahbil lequil ti'bal soc tsahbil lequil vinohetic.

⁷Ta wits ini ya sjin te pac' te smucoj spisil te pueblohetic, te pac' te spotsoj spisil te nacionetique.

⁸Ya me slajin scuenta sbahtel q'uinal te lajele, te Cajwaltic Jehová ya scusticlambe ya'lel sitic ta spisilic, ya sloq'ues ta spahmal bahlumilal te bin q'uexlaltic sba yu'un te pueblo yu'une; yu'un hich yaloj te Jehová.

⁹Ta hich ora hich me ya yalic: ¡Ilawil, ha Dios cu'untic ini! La jmahliytic, hich ya scoltayotic. ¡Ha te Jehová ini te la jmahliytic! Tse'eluc me co'tantic soc ayuc me yutsil co'tantic yu'un te coltayel yu'une, xchihic.

¹⁰Te sc'ab Jehová ya xhil ta wits ini; yan te Moab ya me yich' ts'o'ts'o' teq'uel ta slumal hich te bin ut'il ya yich' teq'uel te ac ta yawil c'a'pal.

¹¹Te Moab tey ya shach sc'ab a, hich te bin ut'il ya shach sc'ab te mach'a yac ta nuxel. Dios ya xpehc'ambot stoybahil yu'un soc te bin ya xhu' yu'unic spasel ta sc'abic.

¹²Ha ya sjin cohel te toyol ts'ahquetic awu'un, ya spehc'an, ya sch'oj cohel ta lum, c'alal ta ts'ubilum.