Read Tzeltal Isaías 26 Bible Online

Isaías 26 - Tzeltal bible

Isaías 26

¹Ta hich ora ya me yich' c'ayojtayel te c'ayoj ini ta sq'uinal Judá: Tulan pueblo ay cu'untic; Dios la yac' te ha ts'ahquetic soc smahquil ts'ahquetic c'oht te colele.

²Jamahic te ochibaletic scuenta yu'un ya x'och bahel tey a te nación te toj yo'tan, te stalel jun yo'tan.

³Ha'at yac awac' te lamal q'uinal ya ya'iy te mach'a spisil ora yac sna'belat, como ha smuc'ulinejat yo'tan.

⁴Ha'uc me smuc'ul awo'tanic spisil ora te Jehová, como ha ahnibal sbahtel q'uinal te Cajwaltic Jehová.

⁵Como la sjin cohel te mach'atic nahinemic ta toyol, la spehc'an te pueblo te toyol ay, la sjin cohel c'alal ta lum.

⁶Ya yich' ts'o'ts'o' teq'uel yu'un te mach'atic ayic ta uts'inel, yu'un te jujujihm yoquic te pobrehetique, xchi te c'ayoje.

⁷Ha toj te be yu'un te mach'a toj yo'tan, ha'at te toj awo'tan, yac apamambe te sbe te mach'a toj yo'tan.

⁸Ya jmahliyatcotic, Jehová, ta be yu'un te chahpanel awu'une; te abihil soc te ana'ojibal, ha te bin ya sc'an te co'tantique.

⁹Ta ahc'abal ya sc'anat te jch'uhlele, ta spisil jch'uhlel ya jlehat ta sab. Te c'alal yac awa'iy chahpanwanej ta bahlumilal, te mach'atic nahinemic ta bahlumilal ya snopic te bin stojil ta pasele.

¹⁰Aunque ya xna'bot yo'bolil sba te mach'a chopol, ma ba ya snop te bin stojil ta pasele; ha ya spas te bin chopol ta banti toj bin ya yich' pasel, soc ma ba ya yil te smuc'ul yutsilal te Jehová.

¹¹Jehová, atoyoj ac'ab, pero ma ba ya yilic. Ac'a yilic te xut'et awo'tan ta stojol te pueblo awu'un, ac'a q'uexawuquic; ac'a lajuquic ta c'ahc' te chapal awu'un ya xc'oht ta stojol te acontrataque.

¹²Jehová, ha'at yac awa'botic lamal q'uinal, como ha'at la awac' c'ohtuc ta pasel spisil bintic la jpascotic te ho'otcotique.

¹³Jehová, Diosat cu'untic, ay yantic ajwaliletic te la scuentahinotcotic, pero ha nax ay ta co'tancotic te abihile.

¹⁴Chameniquix, ma ba ya xcuxajiquix; ha axinaletic, ma ba ya scha'cuxajic, como la awa'be castigo, la ajinticlan, la alajimbe spisil te sna'ojibal.

¹⁵La ap'ohltes te nación, Jehová, la ap'ohltes te nación; la awac' tohyuc awutsilal; la awac' muc'ubuc spisil te mojonetic yu'un te q'uinale.

¹⁶La slehat, Jehová, te c'alal ayic ta wocol a, ta sajsaj-c'op la sc'oponat te c'alal la awac'ticlambe castigo.

¹⁷Hich te bin ut'il ants te swoloj yal te nopol ya x'ayin, te ya x'ahcanaj soc ya x'awon yu'un sc'uxul, hich ayotcotic ta atojol, Jehová.

¹⁸Jwolojcotic, la jca'iybecotic sc'uxul, pero la jcayintescotic ic'. Ma ba la jcac'cotic colel ta bahlumilal, mayuc mach'atic ayinic ta bahlumilal.

¹⁹Pero ya xcuxajic te mach'atic chamenic awu'un; ya xcha'cuxajic te schamen baq'uetalique. ¡Hahchanic, c'ayojinanic, ha'ex te nahinemex ta ts'ubilum! como te ats'ujulel pajal soc te ts'ujul ta sahb; soc te q'uinal ya yac' loq'uel te mach'atic chamenic tey a.

²⁰Bahan, pueblo cu'un, ochan bahel ta ana, maca te ti'nahiletic awu'un; nac'a aba jts'ihnuc, ha to c'alal ya xc'ax te yilimba.

²¹Ilawil, te Jehová ya xloc' tal ta banti nahinem yu'un ya ya'be castigo yu'un smulic te mach'atic nahinemic ta bahlumilal. Te lumq'uinal ya yac' ta ilel te ch'ich' malbil tey a; ma ba ya smuquix xan te mach'atic la yich'ic milel tey a.