Read Tzeltal Isaías 27 Bible Online

Isaías 27 - Tzeltal bible

Isaías 27

¹Ta hich ora te Jehová ya me ya'be castigo ta espada yu'un te ha muc' soc te ay yip, ya me ya'be castigo te Leviatán, te chan te ya x'ahn bahel, te Leviatán, te chan te xotoj sba, ya me smil te dragón te ay ta mar.

²Ta hich ora c'ayojtaybeyahic sc'oblal t'ujbil ts'usubil.

³Ho'on, Jehovahon, ya jcanantay; spisil ora ya ca'be ya'lel. C'ahc'al ahc'abal ya jcanantay scuenta yu'un mayuc mach'a ya yuts'in.

⁴Ma ba ilinemon. Teme ya scontrahinon ta ch'ixileltic soc ch'ixetic, ya xc'axon bahel tey a, jc'axel ya jchic'ticlan.

⁵O teme tal snac' sba ta jtojol, ac'a lahmajuc yo'tan ta jtojol, hich, ac'a lahmajuc yo'tan ta jtojol, xchi.

⁶Ya sta yorahil te ya xloc' slohp' te Jacob, ya xpuhlin soc ya xnichin te Israel, ya xnoj te bahlumilal yu'un te site.

⁷Te Jehová ma ba hich la yehchentes te Israel te bin ut'il la yehchentes te scontratac; ma ba la yac' ta milel hich te bin ut'il la yac' ta milel te mach'atic la slajinic te Israel.

⁸La awa'be castigo te Israel ta scuenta sloq'uesel bahel ta yan q'uinal. La shu'xiy loq'uel ta yic'al ye, te bin ora tal ic' ta banti ya xloc' tal c'ahc'al.

⁹Hich ya xpasbot perdón yu'un smul te Jacob, soc ha ini ha spisil te sit yu'un te ya yich' loq'uesel te smule: Ha te spisil te tonetic yu'un te scajtajib ta chiq'uel mahtanil hich ya xc'oht te bin ut'il tonetic yu'un tan te juch'ticlambilic, soc te ma ba teq'uelix ya xhil te loc'ombahetic yu'un Asera o te loc'ombahetic yu'un te c'ahc'ale.[14]

¹⁰Jochol ya xhil te pueblo joytaybil ta ts'ahc, te pueblo te ay yajwal, ihquitaybil ya xhil hich te bin ut'il jochol taq'uin q'uinal; tey ya xwe'ic tut wacaxetic a, tey ya spahcan sbahic a soc ya slajimbe te sc'abc'ab te ha'maletic yu'une.

¹¹Te c'alal ya xtaquij te sc'abc'ab, ya yich'ic wac'ticlanel, soc ya xtal antsetic, ya stsumbeyic sc'ahc'al. Como ha pueblo te ma sna' q'uinal; ha yu'un te Jpaswanej yu'unic ma ba ya xna'bot yo'bolil sba yu'un, ma ba ya xc'uxultayot yu'un te Mach'a pasot yu'une.

¹²Ta hich ora te Jehová ya me swuy c'alal ta muc'ul-ha' Éufrates ha to c'alal ta be-ha' yu'un Egipto, soc te ha'ex israeletic, ta jujutuhl yac awich'ic tal tsobel.

¹³Soc ta hich ora ya me yich' oq'uesinel muc'ul corneta, te mach'atic ch'ayemic ta sq'uinal Asiria, soc te mach'atic la yich'ic loq'uesel bahel ta Egipto, ya xtal sch'uhuntayic te Jehová ta ch'ul wits ta Jerusalén.