Read Tzeltal Isaías 28 Bible Online

Isaías 28 - Tzeltal bible

Isaías 28

¹¡Ay me swocol te corona[15] yu'un toybahil yu'un te jyacubeletic yu'un Efraín, soc te snich te yac ta taquijel, ha te t'ujbil yutsilal, te ay ta shahchibal te spamlej te lec slumil, ha te mach'atic tsalbilic yu'un te vino!

²Ilawil, te Jehová ay mach'a ay yu'un te ay yip soc ay yu'el: hich te bin ut'il ic'al ha'al te ay sbatul, hich te bin ut'il sutu-ic' te ya xlajinwan, hich te bin ut'il tulan ic'al ha'al te soc yip ya xmahl loq'uel. Tulan me ya sch'oj cohel ta lum,

³ya me yich' ts'o'ts'o' teq'uel te corona yu'un toybahil yu'un te jyacubeletic yu'un Efraín.

⁴Te snich te yac ta taquijel, ha te t'ujbil yutsilal, te ay ta shahchibal te spamlej te lec slumil, hich ya xc'oht te bin ut'il sba sit higuera te ma to yorahiluc ta tsobel: teme ay mach'a ya yile, ya stul, ya slo' ta ora.

⁵Ta hich ora te Jehová te scuentahinej spisil ha corona ya xc'oht te ay yutsilal, ha ch'albil corona yu'un te mach'atic hilemic yu'un te pueblo yu'une.

⁶Ha espíritu yu'un stojil chahpanel ya xc'oht yu'un te mach'atic ya xchahpanwan, soc ha yipic ya xc'oht yu'un te mach'atic ya stenic bahel ta guerra te ay ta ochibal.

⁷Ha nix hich ini xhanlajan ya xbehenic yu'un te vino soc ya sschucticlan sba yoc yu'un te tulan uch'abil; te sacerdote soc te jalwanej xhanlajan ya xbehenic yu'un te tulan uch'abil, soc ya sonsohubic ta scaj te vino; ya schucticlan sba yoquic yu'un te tulan uch'abil, ya xhowiyic te c'alal ya yilic snahalsitic, ma xtojob sc'opic te c'alal ya ya'iyic chahpanwanej.

⁸Spisil te mesahetic nojelic ta xehil soc abac, mayuc banti lec.

⁹¿Mach'a a te ya snohptes? ¿Mach'a a te ya ya'be sna' te bin ya ya'iy? ¿Ha bal alaletic te hilemix schu'ic, te hilel to te schu'ique?

¹⁰Como hich ya yalic: Tsaw latsaw, tsaw latsaw, caw lakaw, caw lakaw,[16] jtebuc li'i, jtebuc lume, xchihic.

¹¹Ha yu'un ta xha'hon c'op soc ta yan c'opil Dios ya sc'opon te pueblo ini,

¹²ha te mach'atic hich la yalbe: Ha te cux-o'tanil ini, ac'a scux yo'tan te mach'a luhben. Li' ay te cux-o'tanil, xchi, pero ma ba la sc'an la ya'iyic.

¹³Ha yu'un te sc'op Jehová hich ya xc'oht ta scuentahic: Tsaw latsaw, tsaw latsaw, caw lakaw, caw lakaw, jtebuc li'i, jtebuc lume, xchi; ha to c'alal ya xyahlic ta spatic c'alal yaquic ta behel a, ya x'ehchenajic, ya x'ochic ta yaquil, soc ya xchucotic.

¹⁴Ha yu'un a'iya awa'iy te sc'op Jehová, ha'ex jlabanwanejex te yac acuentahinic te pueblo ini te ay ta Jerusalén.

¹⁵Hich la awalic: Jchapoj jc'optic soc te lajele, jchapoj jc'optic soc te muquenale. Te c'alal ya xtal tulan wocol ma ba ya stahotic; como ha cac'ojtic ta ahnibal cu'untic te lote, ya jnac' jbahtic ta stojol te bin ma meleluque, xchihex.

¹⁶Ha yu'un hich ya yal te Cajwaltic Jehová: Ilawil, ho'on cac'oj yich'o-ip ton ta Sión, ha tsahbil ton, ha t'ujbil ton yu'un xuhc scuenta yich'o-ip te tulan aye. Te mach'a ya yac' smuc'ul yo'tan ta stojol ma ba ya xpehc'aj yo'tan.

¹⁷Ya cac' te ha sp'isojibal ya xc'oht te stojil chahpanel, soc ha tojobtesel ta plomo ya xc'oht te bintic toj ta pasel. Ya xmesot bahel ta bat te ahnibal yu'un lot, soc ya xmulot ta ha' te nac'ombahil.

¹⁸Ya xlajimbot sc'oblal te c'op achapojic soc te lajele, mayuc yip ya xc'oht te chapbil c'op awu'un soc te muquenal; c'alal ya xtal te tulan wocol, ha ya sts'o'ts'o'teq'uex.

¹⁹Te jayeb buelta ya xtal, ya me yiq'uex bahel; jujun c'ahc'al ya xc'ax bahel, c'ahc'al, ahc'abal; mero xiweltic sba ta a'iybeyel sc'oblal te c'op ini.

²⁰Com te wayibal, ma xhu' ya xach' sba tey a, soc com te spac'al, ma spas ya spots sba a.

²¹Te Jehová ya xhahch hich te bin ut'il la spas ta wits Perazim, ya x'ilin hich te bin ut'il ta spamlej Gabaón; yu'un ya spas te ya'tel, ha ya'tel te yan ta ilel, soc yu'un ya shu'tes te ya'tel, ha ya'tel te yan ta ilele.

²²Ha yu'un yo'tic ma me xawa'iyic labanwanej, scuenta yu'un ma ba tulan xan yax xc'oht te bin ya schuquex a; como la jca'iy ta stojol Jehová te scuentahinej spisil te halbilix mandar te ya xc'oht jinel ta stojol spisil te nación.

²³A'iya awa'iyic, a'iybon awa'iyic te jc'ope; a'iya awa'iyic te bin ya cal:

²⁴Te mach'a ya stop' lum yu'un ya sts'umbaj, ¿ya bal stop' lum spisil ora? ¿Ya bal stop' soc ya bal stuc te q'uinal spisil ora?

²⁵C'alal pamalix a te sba, ¿ma bal yacuc slihlin te eneldo soc te comino, ya schol ta ts'unel te trigo ya slihlin te cebada ta lugar yu'un soc te avena ta sti'il?

²⁶Como te Dios yu'un ya snohptes soc ya ya'be sna' te bin ya sc'an pasel.

²⁷Te eneldo ma ba ya yich' wuyel ta swuyojibal, soc ma ba ya xc'ax carreta ta sba te comino; te eneldo ya yich' majel ta tut te', te comino ya yich' majel ta te'.

²⁸Te sit trigo ya yich' juch'el, pero ma ba ya yich' juch'el ta c'axel; ya xc'ax carreta ta sba soc te cawuhetic yu'un, pero ma ba ya swuyticlan ta jc'axel.

²⁹Ha nix ini te loq'uem tal ta stojol Jehová te scuentahinej spisil, bayel yutsil te bin snopoj, c'ax lec te sp'ijil yo'tan.