Read Tzeltal Isaías 3 Bible Online

Isaías 3 - Tzeltal bible

Isaías 3

¹Como te Cajwaltic, te Jehová te scuentahinej spisil, ya me sloq'ues ta Jerusalén soc ta Judá spisil te bintic ya xtuhun soc te bintic ya xcoltaywan, spisil te we'elil soc spisil te ha',

²te mach'a ay yip yo'tan soc te soldado, te juez, jalwanej, jna'ojel, soc te mamal,

³te capitán yu'un lajuneb yoxwinic (50) soc te winic ich'bil ta muc', te j'ac'-o'tanil, te mach'a ya sna' sch'ahlel ta lec te bin ya spas, soc te mach'a ya sna' monaw ta lec.

⁴Ya me yotses queremetic scuenta príncipaletic yu'unic; ya xcuentahinotic yu'un alaletic.

⁵Talel c'axel me ya yuts'in sbahic, jtuhlultuhl ya scontrahin te spat-xuhc; te ach'ix-querem ya scontrahin te me'el-mamal, te mach'a peq'uel ya scontrahin te mach'a ich'bil ta muc'.

⁶Teme ay mach'a ya stsacbe sc'ab te yermano ta sna stat, soc te hich ya yalbe: Ha'at ay ac'u', ha'at jcuentahinwanejat cu'untic ya xc'ohat, cuentahina te bin jihnem ini, te xchihe,

⁷ha me ya yal: ¡Ma ba ya x'ochon ta jpoxtaywanej; mayuc jwe'el ta jna soc mayuc jc'u' ya jlap! ¡Ma me xawotseson ta jcuentahinwanej yu'un te pueblo! xchi.

⁸Como jihnemix te Jerusalén, yahlemix te Judá; como te sc'opic soc te ya'telic scontrahinejic te Jehová, la stsal sba soc te smuc'ul yutsilale.

⁹Ha nix ya xchicnaj ta sit yelawic te smulique; hich te bin ut'il Sodoma ya spuquic ta halel te smulique, ma ba ya smuquic. ¡Ay me swocolic! Ha nix ta scuentahic te ay swocolique.

¹⁰Halbeya te mach'a toj te lec ya xc'oht ta loq'uel, como ya me swe'be sit te ya'tel sc'ab.

¹¹¡Ay me swocol te mach'a chopol! Ma ba lec ya xc'oht ta loq'uel, como ya x'a'bot stojol sc'ab ha chican te bin spasojique.

¹²Ha queremetic te ya yuts'inic te pueblo cu'un, ya xcuentahinotic yu'un antsetic. Pueblo cu'un, ya slo'loyex te mach'atic ya stojobtesex bahel, ya syanijtesbeyex te behetic awu'unique.

¹³Te Jehová chapalix yu'un ya ya'iy ich'aw ta c'op, teq'uelix ta schahpanel te pueblo yu'une.[1]

¹⁴Te Jehová ya xtal schahpan te mamaletic soc te príncipaletic yu'un te pueblo: Ha'ex te la alajinic te ts'usubil cu'un, soc ay ta anahic te bin la apojbeyic te pobre.

¹⁵¿Bin anopojic a te yac atenic ta uts'inel te pueblo cu'un soc te yac atec'beyic yelaw te pobrehetic? xchi te Jehová te scuentahinej spisil.

¹⁶Soc ha nix hich ya yal te Jehová: Te antsetic yu'un Sión stoyoj sbahic, stoyoj snuq'uic a ya xbehenic, ya xmonawan ta sitic, ya x'ahc'otajic ta behel, yac ta stijel sch'ahlel yoquic a.

¹⁷Ha yu'un te Cajwaltic ya me ya'be chin ta sjolic te antsetic yu'un Sión, te Jehová ya me schicnajtesbe sq'uexlalic, xchi.

¹⁸Ta hich ora te Cajwaltic ya sloq'uesbe te sch'ahlel yoquic, sch'ahlel sjolic soc sch'ahlel snuq'uic te yach'il u yilel,

¹⁹te staq'uinal schiquinic, sch'ahlel snuc' sc'abic soc smuhquil sjolic,

²⁰te sbehch'il sjolic soc sch'ahlel snuc' yoquic, te schuhquil ch'uhtic, yawil perfume, soc te smahquil bintic chopol,

²¹te ch'ocowetic soc sch'ocowil sni'ic,

²²te t'ujbil c'u'uletic, snahtil c'u'uletic, srebosohic soc sbolsahic,

²³te espejohetic soc lequil paq'uetic, te spohtsil sjolic soc te schuhquilique.

²⁴Te sumet yic' perfume ya sutp'ij ta bin tu; te schuhquil ch'uhtic ya sutp'ij ta lazo; te buen ch'albil sjolic ya sutp'ij ta t'axjol; te t'ujbil sc'u'ic ya sutp'ij ta ch'ixal pac'; te st'ujbilalic ya sutp'ij ta bin c'ahq'uem.

²⁵Te winiquetic awu'unic ya me xlajic ta espada, te soldadohetic awu'unic ya me xlajic ta guerra.

²⁶Te ochibaletic yu'un Sión ya me x'oq'uic soc ya me smel yo'tanic, te bin ut'il ch'aybil ta o'tanil, ya shuhcan sba ta lum.