Read Tzeltal Isaías 31 Bible Online

Isaías 31 - Tzeltal bible

Isaías 31

¹¡Ay me swocolic te mach'atic ya xcohic bahel ta Egipto ta slehel coltayel, te ha smuc'ulinej yo'tanic te cawuhetic, te ya smuc'ulin yo'tanic te bin ut'il ay bayel carretahetic yu'unic, soc te bin ut'il ay yipic te jmoheletic ta cawu, te ma ba ya yac' sitic ta stojol te Ch'ul Dios yu'un Israel, ma ba ya slehic te Jehová!

²Ha nix hich ay sp'ijil soc ya yac' tal wocol, ma ba ya sut sc'op. Ya xhahch scontrahimbe sna te mach'atic chopolic, soc ya scontrahin te mach'atic ya scoltayic te mach'atic chopol bin ya spasique.

³Te egipciohetic winiquetic nax, ma ha'uc Dios; baq'uet nax te cawuhetic yu'unic, ma ha'uc espíritu. Te c'alal ya shach sc'ab te Jehová ya xyahl te mach'a ya xcoltaywan soc ya xyahl te mach'a coltaybil; ta spisilic pajal ya xlajic.

⁴Hich la yalbon te Jehová: Hich te bin ut'il choj o tut choj te ya x'awon yu'un te bin stsacoj, ma ba ya xi' te sc'opic tsobol jcanan-tuminchijetic te ya stsob sbahic ta scontrahinel, ma ba ya xnihc yo'tan yu'un, hich te Jehová te scuentahinej spisil ya xco tal ta yaq'uel guerra ta wits Sión soc ta tsehl yu'un.

⁵Hich te bin ut'il mutetic te ya sjoyobtay ta wihlel te spechechic, hich te Jehová te scuentahinej spisil ya me scanantay te Jerusalén; ya scanantay soc ya yac' ta libre, ya xc'opoj yu'un soc ya scoltay loq'uel ta c'abal, xchi.

⁶Yal-snich'nab Israel, ¡suhtanic bahel ta stojol te mach'a tulan atoyoj abahic ta stojole!

⁷Como ta hich ora apisilic yac ach'ojic bahel te loc'ombahetic awu'unic te pasbilic ta plata soc ta oro te apasojic ta amulawil-c'abique.

⁸Te Asiria ya xlaj ta espada te ma ha'uc espada yu'un winic, ya xlajinot yu'un espada te ma ha'uc espada yu'un winic. Ya me x'ahnic loq'uel ta stojol te espada, soc te queremetic yu'unic ya x'ac'otic ta tulan a'tel.

⁹Ta scaj xiwel ya xloc' ta ahnel te tulan ahnibal yu'unic, te capitanetic yu'unic ya me yihquitayic hilel te bandera yu'unic ta scaj xiwel, xchi te Jehová te ay ta Sión te c'ahc' yu'un soc te ay ta Jerusalén te horno yu'une.