Read Tzeltal Isaías 33 Bible Online

Isaías 33 - Tzeltal bible

Isaías 33

¹¡Ay me awocol, ha'at te ya xjinawanat, te mayuc bin ora la awich' jinele; te yac awac' ta c'abal, aunque mayuc mach'a la yac'at ta c'abal! C'alal ya xlaj awo'tan ta jinaw, ya me awich' jinel; c'alal ya xlaj awo'tan ta ac'aw ta c'abal, ya me x'ac'otat ta c'abal.

²Jehová, na'botic yo'bolil jbahtcotic, ha smuc'ulat co'tancotic. Ha'uc quipat ta jujun sab, ha'uc jcoltaywanejat cu'uncotic ta yorahil wocol.

³Ahnic bahel te pueblohetic te c'alal la ya'iyic xjuyet, la spuc sbahic te nacionetic c'alal hahchat ha'at.

⁴Ya yich'ic stsobel te bintic spojticlanejic, hich te bin ut'il ya stsobot yu'un yaxal yoletic; ya xwihlic cohel ta sbahic hich te bin ut'il c'ulubetic.

⁵Ya xtoybot sc'oblal te Jehová te nahinem ta toyol; ha ya snojes te Sión ta stojil chahpanel soc ta bin toj ta pasel.

⁶Ha ya xc'oht te mach'a ya yac' jun-o'tanil ta aworahil, ha bayel coltayel ya xc'oht, soc p'ijil-o'tanil soc bintic ay ta na'el; te yich'el ta muc' te Jehová ha c'ulejalil yu'un te Sión.

⁷Ilawil, ya x'awonic ta calle te mach'atic ma xiwic, tulan ya x'oq'uic te mach'atic ticombilic bahel scuenta lamal q'uinal.

⁸Te muc'ul behetic jochol ayic, mayuc mach'a ya xbehenic tey a; lajix sc'oblal te chapbil c'op, p'ajbil te pueblohetic, ma xyich' ta cuenta winiquetic.

⁹Te lumq'uinal ya smel yo'tan soc ya xlaj yip, ya xq'uexaw te Líbano soc ya sayub; te Sarón sutp'ij ta jochol taquin q'uinal, te Basán soc Carmelo ya slihlinic cohel ya'binalic.

¹⁰Ya xcha'hahchonix, xchi te Jehová; yo'tic ya xtoyot jc'oblal, yo'tic muc' jc'oblal ya xc'oht.

¹¹Yac awolic taquin ha'mal, yac awalatayic c'ajben; te sc'ahc'al te yic'al que ya slajinex.

¹²Te pueblohetic hich ya xc'ohtic te bin ut'il chic'bil tan; ya xlaj ta chiq'uel hich te bin ut'il bojbil ch'ixetic.

¹³Ha'ex te namal ayex, a'iya awa'iyic te bin jpasoje; ha'ex te nopol ayex, na'ahic te ay cu'el.

¹⁴Te jmulawiletic ta Sión ya xiwic, ya xnihquic te mach'atic ma tojuc yo'tanic, hich ya yalic: ¿Mach'ahotic a te ya xhu' ya xnahinotic soc te c'ahc' te ya xlajinwan? ¿Mach'ahotic a te ya xhu' ya xnahinotic soc te yat c'ahc' te sbahtel q'uinal ay? xchihic.

¹⁵Te mach'a toj ya xbehen soc te toj ya xc'opoj, te ya sp'aj te taq'uin yu'un uts'inwanej, te ma ba ya yich' taq'uin ta schonel sba, te ya smac schiquin yu'un ma ba ya ya'iy te ya xchapbot sc'oblal ta malel ch'ich', soc te ya smuts' sit scuenta yu'un ma ba ya yil te bin chopol,

¹⁶ha ya xnahin ta toyol, ha ahnibal yu'un te ch'entiquil; ya x'a'bot swe'el, soc ma ba ya spas falta te ya'ale.

¹⁷Ya me awil ta asit te ajwalil soc te st'ujbilal, ya me yil te lumq'uinal te namal ya slim bahel.

¹⁸Yac ana'ulan ta awo'tan te xiwel ta nahil to, hich yac awal: ¿Banti ay te mach'a la yahtay? ¿Banti ay te mach'a la yilbe yalal te patane? ¿Banti ay te mach'a la stsahtay yil te ilo-q'uinaletique? xchihex.

¹⁹Ma ba yac awiliquix te jtoyba pueblo, te pueblo te wocol ta a'iybeyel sc'op, te ma xna'bot bin ya yal, te mayuc mach'a ya sna'be scuentahil.

²⁰Ilawil te Sión, te pueblo yu'un te q'uinetic cu'untique. Ya me awil ta asit te Jerusalén, ha te lugar yu'un lamal q'uinal, ha nahilpac' te ma ba ya yich'ix loq'uesel, soc ma ba ya yich' tuch'el junuc te bin chucul a.

²¹Tey ya ya'botic quiltic yu'el a te Jehová. Ha yawil muc'ul-ha'etic ya xc'oht soc be-ha'etic te muc' sjamalilic, te banti ma ba ya x'och barco te ay stijojbil, soc ma ba ya xc'ax tey a te muc'ul barco.

²²Como ha juez cu'untic te Jehová, ha jpas-ley cu'untic te Jehová, ha Ajwalil cu'untic te Jehová; ha nix ya scoltayotic.

²³Choyajemic te achuhquile; ma xhu' ya ya'beyic yip te ste'el spac'al te barco, soc ma xhu' ya slimic bahel te paq'ue. Ya yich' pucticlanel bayel te bintic pojticlambil. ¡Te coxo'etic ya me yich'ic bahel te bintic pojbile!

²⁴Mayuc mach'a te nahinem ta Sión te hich ya yal: Ayon ta chamel, te xchihe. Ya xpasbot perdón yu'un smulic te mach'atic nahinemic tey a.