Read Tzeltal Isaías 35 Bible Online

Isaías 35 - Tzeltal bible

Isaías 35

¹Ay yutsil q'uinal ya ya'iyic te jochol taquin q'uinal soc te taquin lum; tse'el yo'tan te jochol taquin q'uinal, hich ya xnichin te bin ut'il te tsajal nichime.

²Bayel ya xnichin, tse'el yo'tan soc ya xc'ayojin soc yutsil q'uinal. Ya x'a'bot te yutsilal te Líbano, te st'ujbilal te Carmelo soc Sarón. Ya me yilbeyic te yutsilal te Jehová, te st'ujbilal te Dios cu'untique.

³¡A'beyahic yip te sc'abic te mayuc yipic, a'beyahic yip sjol yacanic te ya xnihquique!

⁴Hich xawalbeyic te mach'atic ya xiw yo'tanic: ¡Ayuc me yip awo'tanic, ma me xiwex! Te Dios awu'unic ya xtal ya'be spacol; ha nix Dios ya xtal scoltayex, xchihan me.

⁵Hich ya xjahm sit te ts'o'sitetic soc ya xjahm schiquinic te cohquetique.

⁶Hich ya xwihl te coxo' te bin ut'il ha'mal chij, soc te yac' uma' ya x'awon yu'un yutsil q'uinal ya ya'iy. Ya xt'ohm loq'uel ha' ta jochol taquin q'uinal, snojel ha' ta taquin lum.

⁷Te taquin lum ya sutp'ij ta yawil ha', te q'uinal te mayuc ya'lel ya sutp'ij ta sloq'uib-ha'etic. Ta banti nahinemic ha'mal ts'i'etic, ya xcol jalaletic soc tuhtetic.

⁸Soc ay me muc'ul be tey a, ha Ch'ul Be ya xc'oht te sbihile. Ma ba ya xc'ax jtuhluc tey a te bohloben sc'oblal, ha nax te mach'atic st'unojic te behe, ma ba ya xbehenic tey a te mach'atic ma sna'ic q'uinal.

⁹Mayuc choj tey a, soc ma ba ya xmohic tey a ti'awal chambahlametic, ma ba ya xtahotic tey a, ha nax ya xbehenic tey a te mach'atic colemic ta libre.

¹⁰Te mach'atic colemic ta libre yu'un te Jehová yaquic ta c'ayoj a ya suhtic tal ta Sión; spisil ora tse'el yo'tanic. Ay yutsil q'uinal ya ya'iyic soc tse'el-o'tanil, ya x'ahn bahel te mel-o'tan soc ahcan.