Read Tzeltal Isaías 36 Bible Online

Isaías 36 - Tzeltal bible

Isaías 36

¹Ta schanlajunebal (14) ha'bil ay ta ajwalil a te Ezequías, te Senaquerib ajwalil yu'un Asiria tal ya'be guerra spisil te pueblohetic yu'un Judá te joybilic ta sts'ahc, soc la yich'ticlan.

²Te ajwalil yu'un Asiria la sticon bahel jtuhl capitan-soldado soc bayel soldadohetic te ayic ta Laquis, bahtic ta stojol te ajwalil Ezequías ta Jerusalén. La slahman sbahic ta be-ha' yu'un te yawil ha' ay ta ahc'ol, ta sbehlal te Jsac'omajel.

³Te Eliaquim snich'an Hilcías, te jcanan ta sna ajwalil, soc Sebna te jts'ihbajel, soc Joa snich'an Asaf, te secretario yu'un te ajwalil, loq'uic bahel ta stahel.

⁴Hich halbotic yu'un te capitan-soldado: Halbeyahic te Ezequías: Hich ya yal te muc'ul ajwalil, ha te ajwalil yu'un Asiria: ¿Bin a te smuc'ulinej awo'tan te ya scoltayat?

⁵Te bin anopoj yu'un yaq'uel guerra soc te awip ta spasel guerra ta ac'op, ha tojol c'opetic nax. ¿Mach'a a te smuc'ulinej awo'tan yu'un yac atoy aba ta jtojol?

⁶Ilawil, ha smuc'ulinej awo'tan te Egipto, te waq'uem nahbate'el; teme ay mach'a ya yich' yip a, ya xlowbot sc'ab yu'un. Hich ay te faraón te ajwalil yu'un Egipto ta stojol spisil mach'atic ha smuc'ulinej yo'tanic.

⁷Yan teme hich yac awalbonic: Ha smuc'ulinej co'tantic te Jehová te Dios cu'untic, teme xchihexe, ¿ma bal ha'uc yu'un te toyol awilaletic soc te scajtajib ta chiq'uel mahtaniletic te la sloq'ueslan te Ezequías, soc te hich la yalbe te Judá soc te Jerusalén: Ya me ach'uhuntayic ta stojol te scajtajib ini, te xchihe?

⁸Yo'tic, awocoluc chapa ac'op soc te ajwalil cu'un, ha te ajwalil yu'un Asiria: Ya ca'bat ho'bahc' (2,000) cawuhetic teme ya xweht awu'un mach'atic ya xmohic a.

⁹¿Bin ut'il c'an acom jtuhluc capitán te ha peq'uel yu'un te a'batetic yu'un te ajwalil cu'une, aunque smuc'ulinej awo'tan te Egipto soc te carretahetic soc jmoheletic yu'une?

¹⁰Soc ¿yu'un bal ho'on tal jin te q'uinal ini te ma ta scuentahuc Jehová? Hich la yalbon te Jehová: Mohan bahel ta q'uinal ini, lajina, xchi.

¹¹Hich te Eliaquim, Sebna soc te Joa la yalbeyic te capitan-soldado: Awocoluc, c'oponawotcotic ta arameo, como ya ca'iycotic. Ma xac'oponotcotic ta sc'op Judá como ya ya'iyic te mach'atic ayic ta ba ts'ahc, xchihic.

¹²Pero hich la yal te capitan-soldado: ¿Ha bal la sticonon tal te ajwalil cu'un scuenta yu'un ha nax ya calbat soc te ajwalil awu'un te c'op ini, te ma ba ya ya'iyic te mach'atic ayic ta ba ts'ahc, te ha'ic nix soc te ha'at yac awe' atsa'ic soc yac awuch' achuxic? xchi.

¹³Ha yu'un te capitan-soldado la stehc'an sba soc tulan awon ta sc'op Judá: A'iya awa'iyic te bin ya yal te muc'ul ajwalil, ha te ajwalil yu'un Asiria:

¹⁴Hich ya yal te ajwalil: Ma me xawac' slo'loyex te Ezequías, yu'un ma xhu' ya scoltayex.

¹⁵Ma me xawac' te ha ya ya'beyex smuc'ulin awo'tanic te Jehová te Ezequías, te hich ya yal: Ya me scoltayotic te Jehová; ma ba ya x'och ta sc'ab Asiria te pueblo ini, te xchihe.

¹⁶¡Ma me xawa'iybeyic sc'op te Ezequías! yu'un hich ya yal te ajwalil yu'un Asiria: Ac'ahic te ya xlahmaj q'uinal ta jtojoltic, soc loc'anic tal ta jtojol. Hich jujutuhl yac awe'ic te bin ya yac' te ats'usubic soc te higuera awu'unic, soc yac awuch'ic te ha' ta pozo awu'unic,

¹⁷ha to c'alal ya xtal quiq'uex bahel ta yan q'uinal te pajal soc te awu'unique, ha te q'uinal te ya yac' trigo soc vino, ha q'uinal yu'un pan soc ts'usubiltic.

¹⁸Ila me awilic te manchuc ya slo'loyex te Ezequías te hich ya yal: Ya scoltayotic te Jehová, te xchihe. ¿Ay bal te diosetic yu'un te nacionetic te la scoltayic loq'uel ta sc'ab te ajwalil yu'un Asiria?

¹⁹¿Banti ay te diosetic yu'un Hamat soc yu'un Arfad? ¿Banti ay te diosetic yu'un Sefarvaim? ¿La bal scoltayic ta jc'ab te Samaria?

²⁰¿Mach'a ta spisil te diosetic yu'un te q'uinaletic ini te hu' yu'unic scoltayel loq'uel ta jc'ab? ¿Ya bal xhu' yu'un te Jehová te ya scoltay loq'uel ta jc'ab te Jerusalén? xchi te ajwalile, xchi.

²¹Pero ch'abic ta c'op, ma ba la suhtic te c'ope, como te ajwalil yalojix mandar: Ma me xajaq'uic, xchi.

²²Hich te Eliaquim snich'an Hilcías, te jcanan ta sna ajwalil, soc Sebna te jts'ihbajel, soc Joa snich'an Asaf, te secretario yu'un te ajwalil, ch'i'em sc'u'ic a bahtic ta stojol te Ezequías, la yalbeyic te bin la yal te capitan-soldado.