Read Tzeltal Isaías 37 Bible Online

Isaías 37 - Tzeltal bible

Isaías 37

¹C'alal hich la ya'iy te ajwalil Ezequías, la sch'i' sc'u' yu'un, la slap ch'ixal-pac', baht ta templo yu'un Jehová.

²Soc la sticonlan bahel ta stojol te jalwanej Isaías snich'an Amoz te Eliaquim te jcanan yu'un te sna ajwalil, te Sebna te jts'ihbajel, soc te mamaletic yu'un te sacerdotehetic, spisil slapojic bahel ch'ixal-paq'uetic.

³Hich la yalbeyic: Hich yaloj te Ezequías: Te c'ahc'al ini ha sc'ahc'alel mel-o'tan, castigo soc q'uexlal, hich te bin ut'il yorahilix te ya x'ayin alal pero mayuc yip yu'un ya yayintes.

⁴Te Jehová te Dios awu'un la wan ya'iybe sc'op te capitan-soldado te ticombil yu'un te yajwal, ha te ajwalil yu'un Asiria, yu'un ya sbohlc'optay te cuxul Dios. Ya wan ya'be castigo yu'un te sc'op te la ya'iy te Jehová. Ha yu'un c'opombeya Dios ta scuenta te mach'atic ay to hilemic, xchihic.

⁵Hich te a'batetic yu'un Ezequías talic ta stojol Isaías.

⁶Te Isaías hich la yalbe: Hich me xawalbeyic te ajwalil awu'unique: Hich yaloj te Jehová: Ma me xiwat yu'un te bin la awa'iy, ha te la sbohlc'optayon te a'batetic yu'un te ajwalil yu'un Asiria.

⁷Ilawil, ya ca'be jun espíritu, ya me ya'iy c'op, hich ya suht bahel ta slumal yu'un, tey ya cac' te ya xlaj ta espada ta slumal, xchi.

⁸Suht bahel te capitan-soldado, la ya'iy te loq'uemix ta Laquis te ajwalil yu'un Asiria, baht ya'be guerra te Libna.

⁹Pero te ajwalil yu'un Asiria la ya'iy te hich halbot sc'oblal Tirhaca te ajwalil yu'un Etiopía: Loq'uemix tal ya'bat guerra, te xchihe. C'alal hich la ya'iy, la sticon bahel jal-c'opetic ta stojol Ezequías, hich la yal:

¹⁰Hich me xawalbe te Ezequías ajwalil yu'un Judá: Ma me xawac' slo'loyat te Dios awu'un, te ha smuc'ulinej awo'tan, te hich ya yalbat: Te Jerusalén ma ba ya x'a'bot ta sc'ab te ajwalil yu'un Asiria, te xchihe.

¹¹Awa'iyej te bin spasticlanej te ajwaliletic yu'un Asiria ta stojol spisil te pueblohetic, ha te la sjinticlanic. ¿Ya bal xcolat ha'at?

¹²¿Coltayotic bal yu'un te diosetic yu'un te nacionetic te jinotic yu'un te jme'jtat, ha te Gozán, Harán, Resef, soc te mach'atic yu'un Edén te nahinemic ta Telasar?

¹³¿Banti ay te ajwalil yu'un Hamat, yu'un Arfad, yu'un te pueblo yu'un Sefarvaim, yu'un Hena soc yu'un Iva? xchi.

¹⁴Te Ezequías la stsac soc la yil te carta te a'bot yu'un te jal-c'optique. Hich mo bahel ta sna Jehová, la slim te carta ta stojol.

¹⁵Hich la yal ta sc'oponel Dios:

¹⁶Jehová te acuentahinej spisil, Diosat yu'un Israel te huculat ta ahuctajib ta yohlil te querubinetic, ha'at nax Diosat atuquel ta stojol spisil te nacionetic ta bahlumilal; ha'at la apas te ch'ulchan bahlumilal.

¹⁷Ts'ehana achiquin, Jehová, a'iya awa'iy; jama asit, Jehová, ilawil; a'iya awa'iy spisil te c'opetic yu'un te Senaquerib te la sticon tal ta sbohlc'optayel te cuxul Dios.

¹⁸Melel, Jehová, te ajwaliletic yu'un Asiria la sjinic spisil te nacionetic soc te sq'uinalique,

¹⁹soc la sch'ojbeyic ta c'ahc' te diosetic yu'unic, como ma dioseticuc, ha ya'tel sc'ab winic te pasbilic ta te' soc ta ton; ha yu'un la sjinic.

²⁰Yo'tic, Jehová, Dios cu'untic, coltayawotcotic loq'uel ta sc'ab, scuenta yu'un spisil te nacionetic ta bahlumilal ya me sna'ic te ha'at nax atuquel te Jehová, xchi ta sc'oponel Dios.

²¹Hich te Isaías snich'an Amoz la sticon bahel c'op ta stojol te Ezequías: Te Jehová, te Dios yu'un Israel, hich yalbeyej sc'oblal te bin la awalbon wocol ta stojol Senaquerib te ajwalil yu'un Asiria.

²²Hich ay te bin la yal Jehová ta scontrahinel: Te ach'ix yu'un Sión ya sp'ajat, ya slabanat; te ach'ix yu'un Jerusalén ya sjimulan sjol ta apat.

²³¿Mach'a a te la alaban? ¿Mach'a a te la abohlc'optay? ¿Mach'a a te la atoy ac'op ta stojol ta scontrahinel soc te la atoy asit yu'un toybahil? ¡Ha te Ch'ul Dios yu'un Israel!

²⁴Ta scuenta te a'batetic awu'un la alaban te Muc'ul Ajwalil, hich la awal: Mohon bahel ta sba witsiltic soc te ipal carretahetic yu'un guerra cu'un, ta jaxal coheletic yu'un Líbano; la jts'eticlambe te toyol cedrohetic yu'un, te mero lequil tajaltic yu'une; la jta c'ohel c'alal ta stoyolil te witsetic yu'un, ta tohyem te'etic te bayel ya'binal.

²⁵La joticlan yawil ha'etic soc la jcuch'be ya'lel; soc ta stahn coc la jtaquijtes spisil te ha'etic yu'un Egipto, xchihat.

²⁶¿Ma bal awa'iyejuc te nameyix hich la jchahpan? Nameyix chahpambil cu'un, ta ora yo'tic la jc'ohtes ta pasel. Ha te la ajinticlan pueblohetic te joybilic ta sts'ahc, te busul hilic ta jinel.

²⁷Te mach'atic nahinemic tey a mayuc yipic, laj yip yo'tanic soc q'uexawic; hich c'ohemic te bin ut'il ha'mal ta q'uinal, hich te bin ut'il yaxal ha'mal, hich te bin ut'il ha'mal te ya xcol ta ba na, te ya xtaquij te ma to muc'uben a.

²⁸Ya jna' te banti huculat, te c'alal ya xloc'at soc te ya x'ochat talel, soc te tulan yac awilintayon.

²⁹Te bin ut'il ilinemat ta jtojol soc te c'ohem ta jchiquin te toybahil awu'une, ya ca'bat ta ani' te xotbil taq'uin cu'un soc te freno cu'un ta awe, soc ya cac' te ya suhtat bahel ta be te banti nix talate, xchi te Jehová.

³⁰Ha me seña ya xc'oht awu'un ini, Ezequías: Ta ha'bil ini yac awe'ic te bintic hich nax ya xcol, ta schebal ha'bil te bintic ya xcol yu'un, yan ta yoxebal ha'bil yac ats'unic soc yac atsobeyic sit, yac ats'unic ts'usubiltic soc yac alo'beyic sit.

³¹Te mach'atic yu'un te sna Judá te hilemic ya xcha'ac' xan slohp' ta ye'tal soc ya sitin ta ahc'ol.

³²Como ta Jerusalén ya xloq'uic tal te mach'atic hilemic, soc ta wits Sión te mach'atic cuxul hilemic. Ha ya spas te Jehová te scuentahinej spisil te bin ut'il xut'et yo'tan.

³³Ha yu'un hich ya yal te Jehová sc'oblal te ajwalil yu'un Asiria: Ma ba ya x'och ta pueblo ini, soc ma ba ya st'im tal ya'tejibalul st'ihmalte' tey a. Ma ba ya xtal soc smahquil soc ma ba ya spas smohib ta spat ts'ahc yu'un.

³⁴Ta banti behil tal tey nix ya suht bahel a; ma ba ya x'och ta pueblo ini, xchi te Jehová.

³⁵Yu'un ho'on ya jcanantay te pueblo yu'un ya jcoltay ta jcuenta soc ta scuenta te ca'bat David, xchi.

³⁶Hich te ch'ul a'bat yu'un Jehová baht smil oxeb scha'winic ta pic soc lajunwinic yoxbahc' (185,000) ta tuhl ta scampamento te asiriahetique. C'alal hahchic ta sab, tey ayic a spisil te chamen-baq'uetetic.

³⁷Ha yu'un te Senaquerib ajwalil yu'un Asiria suht bahel, baht ta nahinel ta Nínive.

³⁸Ay jun c'ahc'al, c'alal yac ta sch'uhuntayel ta templo yu'un Nisroc te dios yu'une, te snich'nab, ha te Adramelec soc Sarezer, la smilic ta espada, patil ahnic bahel ta sq'uinal Ararat. Ha la sjelolin ta ajwalil te Esarhadón te snich'ane.