Read Tzeltal Isaías 38 Bible Online

Isaías 38 - Tzeltal bible

Isaías 38

¹Ta hich ora tsacot ta tulan chamel te Ezequías, yu'un ya xcham. Te jalwanej Isaías snich'an Amoz tal ta stojol, hich la yalbe: Hich ya yal te Jehová: Hala mandar te slajibal ac'op ta stojol mach'atic awu'un, yu'un ya xchamatix. Ma xc'ax awu'un, xchi.

²Hich te Ezequías la sut bahel sit ta pahc', la sc'opon te Jehová, hich la yal:

³Jehová, na'a me te bin ut'il smelelil soc jun co'tan behenon ta atojol, soc la jpas te bin lec awo'tan yu'un, xchi. Bayel oc' te Ezequías.

⁴Ha yu'un tal sc'op te Jehová ta stojol Isaías, hich la yal:

⁵Bahan, halbeya te Ezequías: Hich ya yal te Jehová, te Dios yu'un atat David: La jca'iybat ac'op soc la jquilbatix te ya'lel asit. Ya ca'bat ho'lajuneb (15) xan ha'bil te ya xcuxajate.

⁶Soc ya jcoltay loq'uel te pueblo ini ta sc'ab te ajwalil yu'un Asiria. Ya jcanantay te pueblo ini, xchi.

⁷Ha me seña yu'un Jehová ini te hich ya spas te bin yaloj:

⁸Ta reloj yu'un Acaz ya cac' suhtuc lajuncaj yaxinal c'ahc'al, xchi te Jehová, xchi te Isaías. Hich suht lajuncaj te axinal ta c'ahc'alel te cohemix bahel a.

⁹Hich yich'oj ts'ihbayel yu'un Ezequías ajwalil yu'un Judá c'alal ay ta chamel soc te lecube:

¹⁰Hich la jcal: Ta ohlil jcuxlejal a ya xc'axon bahel ta puertahetic yu'un te yawil mach'atic chamenic; ma ba ya quilix te jayeb xan te jcuxlejal te sc'oblal ya quich'e, xchihon.

¹¹Hich la jcal: Ma ba ya quilbe xan sit Jehová ta q'uinal yu'un mach'atic cuxulic ta q'uinal; ma ba ya quilix xan ants-winiquetic te nahinemic ta bahlumilale.

¹²La yich' bulel te jna soc la yich' ich'el bahel hich te bin ut'il snahilpac' jcanan-tuminchij. Hich te bin ut'il jtuhl jalabil, la jbal a te jcuxlejal, pero ha ya set'bon loq'uel ta banti yac ta jalel; ¡Ta junax c'ahc'al yac ajinon!

¹³Ya x'awonon c'alal ta sacubel q'uinal ta sc'anel coltayel, pero ha ya swuybon spisil te jbaquel hich te bin ut'il choj; ta junax ahc'abal yac ajinon.

¹⁴Ya x'oc'on hich te bin ut'il grulla o ulich, ya x'ahcanajon hich te bin ut'il stsuhmut. Ya xluhb jsit ta yilel te ch'ulchane. Jehová, ayon ta uts'inel, coltayawon.

¹⁵Pero ¿bin ya xhu' ya cal? Te mach'a hich la yalbon, ha nix ya spas. Peq'uel ya xbehenon ta spisil jcuxlejal, ta scaj sch'ahal te jch'uhlele.

¹⁶Cajwal, ya xcuxaj ants-winiquetic ta scuenta spisil ini, ha nix te jch'uhlel ya sta scuxlejal ta scuentahic. Ha'at yac awac' lecubucon soc yac awac' cuxajucon.

¹⁷Yu'un cutsil jlequil te c'ax ta jtojol te bin ch'a. Ta scuenta sc'uxul awo'tan ma ba la awac' te cohon bahel ta xahab yu'un lajel, como la awac' ta apat spisil te jmule.

¹⁸Como te yawil mach'atic chamenic ma ba ya stoybat ac'oblal, te lajel ma ba ya yalbat yutsil ac'oblal; te mach'atic ya xcohic bahel ta muquenal ma ba ya smuc'ulin yo'tanic te bin ut'il stalel jun awo'tane.

¹⁹Te mach'a cuxul, te mach'a cuxul, ha ya yalbat lec ac'oblal, hich te bin ut'il yacon ta spasel ta ora ini. Te tatiletic ya yalbeyic te snich'nabic sc'oblal te stalel jun awo'tane.

²⁰¡Jehová ya me scoltayon! Ha scuentahil te ya jtijtic bintic ya yich' tijel cu'untic soc ya xc'ayojinotic ta sna Jehová te jayeb c'ahc'al cuxulotic.

²¹Hich yalojix te Isaías: Ich'a tal juch'bil higohetic, a'beya ta banti yac ta uhlel, hich ya xlecub a, xchi.

²²Yu'un hich sjoc'oyej te Ezequías: ¿Bin señahil ya ya'bon jna' te ya xmohon bahel ta sna Jehová? xchi.