Read Tzeltal Isaías 42 Bible Online

Isaías 42 - Tzeltal bible

Isaías 42

¹Ha ini te a'bat cu'un, te jtsacoj ta jc'ab, te mach'a tsahbil cu'un te lec co'tan yu'une. Cac'oj ta stojol te espíritu cu'un, ha ya yac' c'ohtuc ta pasel ta stojol te nacionetic te bin toj ta pasele.

²Ma ba ya x'awon, ma ba ya stoy sc'op, ma ba ya yac' ta a'iyel sc'op ta callehetic.

³Ma ba ya slajin swaq'uel te jalal te cuts'bil, ma ba ya stup' te smechahil c'ahc' te c'un yac ta tihlele; ya me yac' chicnajuc stojil chahpanel.

⁴Ma ba ya xluhb, ma ba ya xlaj yip yo'tan ha to c'alal ya yac' chicnajuc te bin toj ta pasel ta bahlumilal. Te mach'atic ayic ta ti'ti'mar ya smahliyic te ley yu'une, xchi.

⁵Te Jehová Dios, te la schicnajtes te ch'ulchan soc te la slim bahel, te la slim bahel te bahlumilal soc te bintic ya xcol tey a, te ya ya'be yich' ic' te mach'atic ya xnahinic tey a, soc ya ya'be scuxlejal te mach'atic ya xbehenic tey a, hich ya yal:

⁶Ho'on te Jehovahon ta stojil la jquic'at, ya jtsacat ta jc'ab; ya jcanantayat soc ya cac'at scuenta chapbil c'op yu'un te pueblo, scuenta sacal q'uinal ta stojol te nacionetic,

⁷yu'un yac ajambe sit te jts'o'sitetic, yac aloq'ues ta libre te mach'a ayic ta cárcel, soc yac aloq'ues ta chucojibal te mach'atic nahinemic ta yihc'al q'uinal.

⁸¡Ho'on Jehovahon, ha me te jbihile! mayuc mach'a ya ca'be te cutsilale, ni ma ba ya ca'be te loc'ombahetic te yutsil jc'oblal te ya yich' halele.

⁹Ilawil, c'ohtix ta pasel te bintic ay ta nahilal, soc ya calbe sc'oblal te bintic yach'ile; te c'alal ma to ba c'ohem ta pasel a ya calbeyex sc'oblal, xchi te Jehová.

¹⁰C'ayojtayahic te Jehová ta yach'il c'ayoj, halbeyahic yutsil sc'oblal c'alal ta sti'il bahlumilal, ha'ex te ya xcohex bahel ta mar soc spisil bintic ay tey a, te ti'ti'mar soc te mach'atic nahinemic tey a.

¹¹Ac'a tohyuc sc'opic te jochol taquin q'uinal soc te pueblohetic yu'un, te tut pueblohetic banti nahinem Quedar. Ac'a c'ayojinuc soc yutsil yo'tanic te mach'atic nahinemic ta Sela; c'alal ta ba witsiltic ac'a awonuquic yu'un yutsil q'uinal ya ya'iyic.

¹²Halbeyahic yutsil sc'oblal te Jehová soc pucbeyahic yutsil sc'oblal ta ti'ti'mar.

¹³Te Jehová ya xloc' tal hich te bin ut'il soldado, hich te bin ut'il jtuhl winic yu'un guerra ya shachbe xut'et yo'tan; ya stoy sc'op, ya x'awon yu'un guerra, ya stsal te scontrataque.

¹⁴Bayel c'ahc'al mayuc bin la jcal, ma ba c'opojon soc la jcom jba; pero yo'tic ya x'awonon hich te bin ut'il ants te ya x'ayin yal, ya x'ahcanajon soc ya jac' co'tan.

¹⁵Ya jin te witsiltic soc te tsehletic, ya jtaquijtes spisil te ha'mal yu'une; te muc'ul-ha'etic ya jc'atp'un ta q'uinaletic joybilic ta ha', soc ya jtaquijtes te yawilic te ha'etique.

¹⁶Ya jtojobtes bahel te ts'o'sitetic ta be te ma ba sna'ojic, ya cac' behenuquic ta be te ma ba yilojique. Ya jc'atp'un ta sacal q'uinal te yihc'al q'uinal ta stojolic, soc te chuhcul q'uinal ya jc'atp'un ta spamlej. Ha ini te ya jpase, ma ba ya jpiteslan.

¹⁷Ya me suht ta spatic soc q'uexlal te mach'atic smuc'ulinej yo'tanic te loc'ombahetique, te hich ya yalbeyic te loc'ombahetic te uhltesbilic: Ha'ex diosex cu'uncotic, te xchihique.

¹⁸¡Cohquetic, a'iya awa'iyic; ha'ex ts'ositetic, ilawilic ta lec!

¹⁹¿Mach'a a te ts'o'sit, ma bal ha'uc te ca'bate? ¿Mach'a a te cohc hich te bin ut'il te jal-c'op te ticombil cu'une? ¿Mach'a a te ts'o'sit hich te bin ut'il te mach'a tsahbil cu'un, hich te bin ut'il te ya'bat te Jehová?

²⁰Bayel bintic ya yil, pero ma ba ya stsahtay; jamal schiquin, pero mayuc bin ya ya'iy.

²¹Te bin ut'il c'ux ta yo'tan te bin stojil ta pasel, lec la ya'iy te Jehová te ya smuc'ubtesbe sc'oblal te Ley soc te ya stoybe yutsilal.

²²Pero ha te pueblo ini te la yich' elc'anel soc pojbeyel sbiluquic, spisilic macbilic ta ch'en soc otsesbilic ta cárceletic. Elc'ambil sbiluquic, mayuc mach'a ya x'ac'otic ta libre yu'un; pojbil sbiluquic, mayuc mach'a hich ya yal: Suhteslanahic bahel, te xchihe.

²³¿Mach'ahex a te yac awa'iyic ini? ¿Mach'a ya ya'iy ta lec sc'oblal bin ya xc'oht ta pasel ta patil?

²⁴¿Mach'a la yac' ta sc'ab j'eleq'utic te Jacob soc te la yac' ta sc'ab jpoj-biluquetic te Israel? ¿Ma bal ha'uc te Jehová te jtahoj jmultic ta stojole? Ma ba la sc'anic te behenic ta behetic yu'un soc ma ba la sch'uhumbeyic te Ley yu'une.

²⁵Ha yu'un la smal cohel ta stojolic te sc'ahc'al yilimba soc te yip te guerra. La ya'be sc'ahc'al ta bayuc, pero ma ba c'oht ta yo'tanic; lajinotic yu'un, pero ma ba la yich'ic ta cuenta.