Read Tzeltal Isaías 45 Bible Online

Isaías 45 - Tzeltal bible

Isaías 45

¹Te Jehová hich ya yalbe te Ciro, te mach'a tsahbil yu'un, te la jtsac ta swa'el-c'ab yu'un ya cac' scuentahin te nacionetic soc yu'un ya spojbe ya'tejibic yu'un guerra te ajwaliletic; yu'un ya jambe puertahetic ta stojol, puertahetic te ma ba ya yich'ic maquel:

²Ho'on ya xnahilijon bahel awu'un soc ya jpaman te witsiltic, ya jwuyticlan puertahetic pasbilic ta bronce, soc ya jsesen te sc'atal taq'uinetic pasbilic ta hierro.

³Ya ca'bat te c'ulejalil te nac'bilic, te c'ulejalil q'uejbilic ta muquen, scuenta yu'un yac ana' te ho'on Jehovahon, te Dioson yu'un Israel, te ya quic'at ta abihile.

⁴Ta scuenta sc'uxul co'tan ta stojol te ca'bat Jacob, ta stojol te Israel te tsahbil cu'un, la jquic'at ta abihil, la jca'bat yan abihil aunque ma xana'bon jba.

⁵Ho'on Jehovahon, mayuc yan; mayuc yan dios ay ta jtojol. La jca'bat awip, aunque ma xana'bon jba,

⁶scuenta yu'un ya xna'ot c'alal ta banti ya xloc' tal c'ahc'al c'alal ta smahlib c'ahc'al te mayuc yan Dios, ho'on jtuquel. Ho'on Jehovahon, mayuc yan ay ta jtojol.

⁷Ya jchahpan te sacal q'uinal soc ya jchicnajtes te yihc'al q'uinal, ya cac' lahmajuc q'uinal soc ya cac' taluc wocol. Ho'on Jehovahon ya jpas spisil ini.

⁸Ha'at, ch'ulchan, ac'a cohuc tal ha'al c'alal ta toyol, te tocaletic ac'a cohuc tal te bin toj ta pasele; ac'a jahmuc te lumq'uinal, ac'a sitinuc te colel, pajal ac'a coluc soc te bin toj ta pasele. Ho'on Jehovahon la jpas ini.

⁹¡Obol sba te mach'a ya stsal sba soc te Jpaswanej yu'une, te bin ut'il ha nax xeht'elul oxom ta yohlil te xeht'eluletic ta lumq'uinal! Te ahch'al ¿hich bal ya yalbe te jpac'ojom: ¿Bin yacat ta spasel? xchi bal, o te hich ya yal: Te bin pasbil awu'un, mayuc sc'ab, xchi bal?

¹⁰Obol sba te mach'a hich ya yalbe te stat: ¿Bin a te la anich'antay? te xchihe, o te ya yalbe te snan: ¿Bin a te la awalatay? te xchihe.

¹¹Hich ya yal te Jehová, te Ch'ul Dios yu'un Israel, te Jchahpanwanej yu'une: ¿Ya bal ajoc'obonic sc'oblal te jnich'nabe, o ya bal apason ta mandar yu'un te ya'tel te jc'abe?

¹²Ho'on la jpas te lumq'uinal soc tey la jpas a te ants-winic. Ho'on ta jc'ab la jlim bahel te ch'ulchan, soc ya calbe mandar spisil bintic ay yu'un.

¹³La jtij hahchel te Ciro ta scuenta bin stojil ta pasel, soc ya jtojobtesbe spisil te behetic yu'une. Ha ya scha'pasbon te pueblo cu'un soc ya yac' ta libre te mach'atic cu'un te bahemic ta chuquel, ma ha'uc ta scuenta stojol o ta scuenta mahtaniletic, xchi te Jehová te scuentahinej spisil.

¹⁴Hich ya yal te Jehová: Te stojol ya'tel te Egipto, te jchombajeletic yu'un Etiopía, soc te sabeohetic, ha te nahtil winiquetic, ya xc'axic tal ta atojol, awu'un ya xc'ohtic; ya st'unat bahel, chuculic ta cadena, ya me squejan sbahic ta atojol soc hich me ya yalbat wocol: Melel sjoquinejat te Diose, mayuc yan dios, xchihic.

¹⁵Melel ha'at Diosat te yac anac' aba, Diosat yu'un Israel, te ya xcoltaywanat.

¹⁶Spisil te mach'atic ya spasic loc'ombahetic ya me xq'uexawic soc ya me xpehc'anotic; pajal pehc'ambilic ya xc'axic bahel.

¹⁷Pero te Israel ya xcoltayot yu'un Jehová ta scuenta colel te sbahtel q'uinal ay; mayuquix bin ora ya xq'uexawex o ya xpehc'anex.

¹⁸Como hich ya yal te Jehová, te la spas te ch'ulchan, te ha Dios stuquel, te la spas te lumq'uinal soc la schahpan, la ya'be yich' yip. Ma tojoluc la spas, ha la spas scuenta yu'un ay mach'atic ya xnahinic tey a: Ho'on Jehovahon, mayuc yan.

¹⁹Ma ba muquen c'opojon, ma c'opojon ta banti ihc' q'uinal; ma ba hich la jcalbe te sts'umbal Jacob: Lehawonic ta banti mayuc bin ay, ma xchihucon. Ho'on Jehovahon, smelelil ya xc'opojon, ha ya cal te bin stojile.

²⁰Tsoba abahic, la'ic me, tsoba abahic apisilic te cuxul hilex ta yohlil te nacionetique. Mayuc bin ya sna'ic te mach'atic ya sbehentesic loc'ombahetic pasbilic ta te', te mach'atic ya sc'oponic jun dios te ma xhu' ya xcoltaywan.

²¹C'opojanic, ac'a ta ilel pruebahetic, ac'a snopic ta comon. ¿Mach'a la yal ini c'alal ta shahchibal? ¿Mach'a la yalbe sc'oblal ta namey? ¿Ma bal ho'ucon, Jehovahon? Mayuc yan Dios ta jtojol, ha Dios te toj soc te ya xcoltaywan, mayuc yan ta jtojol.

²²Suhtanic tal ta jtojol, hich ya xcolex apisilic ta sti'il te bahlumilale; como ho'on Dioson, mayuc yan.

²³Ho'onix hich la jcal ta jamal, loc' tojil-c'op ta que te ma xlajimbot sc'oblal: Ya me squejan sbahic ta jtojol spisilic, spisilic ya me yalic ta jamal ta jcuenta, xchihon.

²⁴Hich me ya yalbonic jc'oblal: Ha nax ta scuenta Jehová te ay ta pasel te bin toj soc te ay yip, xchihic. Spisil mach'atic c'ahc'ubic ta scontrahinel ya me xtalic ta stojol soc ya me xq'uexawic.

²⁵Ta scuenta Jehová toj ya xc'ohtic soc ya yich' yutsilalic spisil te sts'umbal Israel.