Read Tzeltal Isaías 46 Bible Online

Isaías 46 - Tzeltal bible

Isaías 46

¹¡La squejan sba te Bel, la snijan sba te Nebo! Te loc'ombahetic yu'unic cuchbilic bahel ta chambahlametic, ta chambahlametic yu'un ihcatsijel. Al te bintic ya yich'ic cuchel, al ihcatsil yu'un te chambahlametic te luhbenique.

²Ya snijan sbahic, pajal ya xyahlic ta lum, ma xhu' yu'un scoltaybel sbahic a tey ta ihcatsil, ha'ic nix ya me x'ic'ot bahel ta chuquel.

³A'iybon awa'iyic jc'op, ha'ex yu'unex Jacob, apisilic te hilemex yu'un Israel, ha'ex te ic'bilex cu'un c'alal wolbilex to a, te petbilex c'alal bin ora ayinex.

⁴Ha to c'alal ya xmamalubex, stalel ayon, ha to c'alal ya sacub ajolic ya ca'beyex awipic. Ho'on la jpasex soc ya jcuchex bahel, ya ca'beyex awipic soc ya caq'uex ta libre.

⁵¿Mach'a yac apajonic soc a, te pajal ya xc'ohon awu'unic soc?

⁶Ay mach'atic ya sloq'uesic oro ta yawil yu'un soc ya slicbeyic yalal te plata; ya schap sc'opic soc jten-taq'uin yu'un ya xpasbotic jun dios a, ya squejan sbahic ta stojol soc ya sch'uhuntayic.

⁷Ya sq'uechic bahel, ya yaq'uic ta yawil; tey ya xhil a, ma stij sba ta yawil. Aunque ya yawtayic, ma ba ya sjac', ma ba ya scoltaylan loq'uel ta swocolic.

⁸¡Na'ahic me ini, nopahic ta lec, ac'a ta awo'tanic, jtoybahex!

⁹Na'ahic me te bintic c'ohem ta pasel ta namey; ho'on Dioson, mayuc yan; ho'on Dioson, mayuc yan pajalon soc.

¹⁰Ya calbe sc'oblal te shahchibal c'alal ta slajibal, c'alal ta namey, te bin ma to ba c'ohem ta pasel; hich ya cal: Ya xc'oht ta pasel te bintic jnopoj, ya jpas spisil te bintic ya sc'an co'tan.

¹¹Ya quic' tal mut c'alal banti ya xloc' tal c'ahc'al, ya quic' tal ta namal jtuhl winic te ya spas te bintic chapal cu'une. Ho'on c'opojon, soc ya jc'ohtes ta pasel; te bin jnopoj, hich ya jpas.

¹²A'iybon awa'iyic, ha'ex te tulan awo'tanic, te namal ayex yu'un te bin stojil ta pasele.

¹³Ya me cac' te ya xnohpoj tal te bin stojil ta pasel cu'un, ma ba namal ay, soc ma ba ya xhalajix te colel cu'une. Ya cac' te colel ta Sión soc te cutsilal ta Israel.