Read Tzeltal Isaías 47 Bible Online

Isaías 47 - Tzeltal bible

Isaías 47

¹Cohan, huhcana aba ta ts'ubil lum, ha'at yantsil-nich'anat Babilonia. Huhcana aba ta lum ta banti mayuc huctajibal, yantsil-nich'anat caldeohetic, yu'un ma ba ya xhalotix ac'oblal te uhnenat soc jteb atahel.

²Tsaca te molino, juch'a harina; loq'uesa te smuhquil ajol; nita mohel ac'u', chicnajuc awa', c'axan ta muc'ul-ha'etic.

³Jamal ya xchicnaj te watalat, ya x'ilot aq'uexlal. Ya ca'be castigo, mayuc mach'a ya xcol,

⁴xchi te J'ac'aw ta libre cu'untic: te Jehová te scuentahinej spisil te sbihile, te Ch'ul Dios yu'un Israel.

⁵Hich ya yal: Huhcana aba, ch'aban, ochan ta yihc'al q'uinal, yantsil-nich'anat te caldeohetic, yu'un ma ba hich ya xhalotix ac'oblal: ajwalil-antsat yu'un nacionetic, ma xchihuc ac'oblal.

⁶Ilinon ta stojol te pueblo cu'un, la jbohlobtesbe sc'oblal te bintic ay cu'un, la jcac' ochuc ta ac'ab, ma ba la ana'be yo'bolil sbahic; la awa'be ta stojol mamaletic te yugo awu'un te mero al.

⁷Hich la awal: Sbahtel q'uinal ajwalil-antson, xchihat, pero ma ba la ana' ini ma ba la anop bin ut'il ya xc'ohat ta loq'uel.

⁸Ha yu'un, a'iya awa'iy yo'tic, ha'at antsat te ay schijil awo'tan, te jun awo'tan huculat, te hich yac awal ta awo'tan: Ho'on jtuquel, mayuc yan; ma ba ya xhilon ta me'ba' ants soc mayuc bin ora te mayuc calatac, te xchihate.

⁹Ta schebal ini ya xc'oht ta atojol, ta ora nax, ta junax c'ahc'al: ya xch'ay awalatac soc ya xhilat ta me'ba' ants. Soc yip ya xtalic ta atojol, aunque bayel yac apas na'ojel soc te bayel yipic te jmonawetic awu'une.

¹⁰Como ha la smuc'ulin awo'tan te achopolil, hich la awal: Mayuc mach'a ya yilon, xchihat. La slo'loyat te ap'ijil soc te bintic ana'oj, soc la awal ta awo'tan: Ho'on nax, mayuc yan, xchihat.

¹¹Ya xtal wocol ta atojol te ma xhu' awu'un scomel; ya xtal jinel ta atojol te ma xhu' yac acom; ora nax ya xtal tulan jinel ta atojol te ma ba ana'oj a.

¹²Pasulana te ya xmonawanex soc te na'ojeletic awu'un te la apasulan c'alal to ta awalalil. ¡Ay wan bin ya xloc' awu'un a! ¡Ay wan ya xhu' awu'un yac awac' xiwel!

¹³Luhbenat yu'un te bayel tojobtesel awich'oj. Ac'a tal scoltayat te mach'atic ya stsahtay yilic te ch'ulchan, te mach'atic ya yilulanic eq'uetic, ta jujun yach'il u ya yalic bin ya xc'oht ta pasel ta atojol.

¹⁴Ilawil, hich ya xc'ohtic te bin ut'il taquin ac: ya xchic'ot yu'un c'ahc'; ma xhu' ya scoltay sbahic yu'un te yip te yat c'ahc'. Mayuc ya xhil yac'alel yu'un c'atimal, mayuc c'ahc' te ya xhuhcajat ta sc'atinel.

¹⁵Hich ya xc'ohtic ta atojol te jna'ojeletic awu'un, te bayel bintic la apas soc c'alal ta awalalil to. Jujutuhl ya st'unic bahel te be yu'unic, mayuc mach'a ya scoltayat.