Read Tzeltal Isaías 52 Bible Online

Isaías 52 - Tzeltal bible

Isaías 52

¹¡Wic'a asit, wic'a asit, ich'a awip, Sión! Lapa at'ujbil c'u', ha'at Jerusalén, te ch'ul pueblo; como mayuc bin ora ya xtal xan ta atojol te mach'a ma ba yich'oj circuncisión o te bohloben sc'oblal.

²Lihlina loq'uel te tan, hahchan, huclan ta ahuctajib, Jerusalén; coltaya loq'uel te schuhquil anuc', ha'at jchuquel yantsil-nich'anat Sión.

³Como hich ya yal te Jehová: Mayuc atojol la awich' chonel, hich ma ta scuentahuc taq'uin ya xcolat ta libre, xchi.

⁴Como hich ya yal te Cajwaltic Jehová: Ta namey te pueblo cu'un co bahel ta Egipto yu'un ya xnahinic tey a; ta patil mayuc scuentahil uts'inot yu'un Asiria.

⁵Yo'tic hich ya yal te Jehová: ¿Bin ya jpas li'i te bin ut'il mayuc scuentahil te ic'ot bahel te pueblo cu'une? ¡Te mach'atic ya sc'abinic ya x'awonic, soc sjunal c'ahc'al ya sbohlc'optaybonic te jbihile! xchi te Jehová.

⁶Ha yu'un ta hich ora te pueblo cu'un ya me sna'beyic sba te jbihile, como ho'onix te hich la jcal: Li' ayoni, xchi.

⁷¡Buen t'ujbil ta witsiltic te yoc te mach'a ya yich' tal lec yach'il c'op, te ya spucbe sc'oblal lamal q'uinal, te ya yich' talel lequil c'op, te ya spucbe sc'oblal colel, te hich ya yalbe te Sión: ¡Te Dios awu'un ay ta Ajwalil! te xchihe!

⁸¡A'iya awa'iy! Ya stoy sc'opic te j'il-q'uinaletic awu'une; junax ya x'awonic yu'un yutsil q'uinal ya ya'iyic; como ya yilic ta sitic te ya suht tal ta Sión te Jehová.

⁹¡Pajal hahchanic ta aw yu'un yutsil q'uinal, ha'ex te bintic jimbilex yu'un Jerusalén, como te Jehová la smuc'ubtesbe q'uinal ya'iy te pueblo yu'une, la yaq'uix ta libre te Jerusalén!

¹⁰Te Jehová la yac' ta ilel te sch'ul c'ab ta stojol sit spisil te nacionetique; spisil te mach'atic ayic ta sti'il te bahlumilal ya me yilic te colel yu'un te Dios cu'untique.

¹¹¡Loc'anic, loc'anic bahel tey a, ma me xapiquic te bin bohloben sc'oblale! ¡Loc'anic bahel ta yohlil, poca abahic, ha'ex te yac awich'ic bahel te bintic ay yu'un te Jehová!

¹²Como ma ba ahnimal ya xloq'uex bahel, ma ba ya xloq'uex bahel ta ahnel; como te Jehová ya xnahilij bahel awu'unic, ya scanantayex bahel ta apatic te Dios yu'un Israel.

¹³Ilawil, lec ya xc'oht ta loq'uel te ca'bat, toyol ya xc'oht soc ya xtoybot sc'oblal, mero toyol sc'oblal ya xc'oht.

¹⁴Hich te bin ut'il tsobol xiw yo'tanic yu'un te la yilique, (yu'un c'ax hich yanij te sit yelaw te ma hichuc yilel te bin ut'il sit yelaw winic),

¹⁵ha nix hich ya xiw yo'tanic yu'un bayel nacionetic; te ajwaliletic ya me smac yehic ta stojol, como ya me yilic te bin mayuc bin ora halbotic sc'oblal, soc ya me xc'oht ta yo'tanic te bin mayuc bin ora ya'iyejique.