Read Tzeltal Isaías 55 Bible Online

Isaías 55 - Tzeltal bible

Isaías 55

¹¡Ha'ex te taquin awo'tanic, la'ic, la'ic ta banti ay te ha'e; ha'ex te mayuc ataq'uinic, la'ic, manahic soc we'anic! ¡La'ic, ma ta taq'uinuc yac amanic, mayuc stojol te vino soc te leche!

²¿Bin yu'un yac alajin ataq'uinic yu'un te bin ma we'eliluc? ¿Bin yu'un yac alajin stojol awa'tel yu'un te bin ma xnoj ach'uhtic yu'une? ¡A'iybon awa'iyic ta lec, we'anic te bin lec, ya me amulan te bintic buhts'an ta we'el!

³Jama achiquin, la'ic ta jtojol; a'iya awa'iyic yu'un hich ya xcuxaj ach'uhlelic a. Ya jpas chapbil c'op ta atojolic te sbahtel q'uinal ay, ha te sc'uxul co'tan ta stojol David te stalel ay.

⁴Ilawil, la jcac' te ha testigo ya xc'oht ta stojol te pueblohetic, ha jtsobaw soc jp'ijubteswanej ta stojol te nacionetique.

⁵Ya me awic' tal nacionetic te ma na'biluc awu'un, soc pueblohetic te ma sna'bat aba, ahnimal ya xtalic ta atojol, ta scaj te Jehová, te Dios awu'un, te Ch'ul Dios yu'un Israel, te la yac'at ta ich'el ta muc'.

⁶¡Lehahic te Jehová te ya to xhu' ta tahel, c'oponahic te bin ut'il nopol to ay!

⁷Te mach'a chopol yo'tan ac'a yihquitay te be yu'une, te mach'a ay mulil ta yo'tan, ac'a yihquitay te snopojibal yu'une; suhtanic tal ta stojol Jehová, hich me ya xc'uxultayot yu'un, suhtanic tal ta stojol te Dios cu'untic, te ha ya spas bayel perdón.

⁸Como te snopojibal cu'un ma pajaluc soc te snopojibal awu'unic, soc te behetic awu'unic, ma pajaluc soc te behetic cu'un, xchi te Jehová.

⁹Hich te bin ut'il toyol yiloj sba soc te bahlumilal te ch'ulchan, hich te behetic cu'un c'ax toyol yiloj sba soc te behetic awu'unic, soc te snopojibal cu'un c'ax hich a te bin ut'il te snopojibal awu'unique.

¹⁰Hich te bin ut'il te ha'al soc te me'sic ya xcohic tal ta ch'ulchan, soc ma ba ya suhtic xan mohel, pero ya ya'be ya'lel te lumq'uinal soc ya yac' ch'ihyuc soc sitinuc, ya ya'be sts'unub te mach'a ya xts'umbaj soc ya ya'be we'elil te mach'a ya xwe',

¹¹hich ay te jc'op te ya xloc' ta que: ma ba jochol ya suht tal ta jtojol, ha ya spas te bin ya sc'an co'tan, soc ha ya sc'ohtes ta pasel te bin scuentahil te la jticon bahele.

¹²Soc yutsil q'uinal ya xloq'uex bahel, soc lamal q'uinal ya suhtex talel. Te witsiltic soc te tsehletic ya xhahchic ta c'ayoj ta atojolic, soc spisil te te'etic ta q'uinal ya smaj sc'abic.

¹³Ta banti ay jpeht ch'ix, ya xcol tal ciprés, ta banti ay ch'ixetic, ya xcol tal mirto-te'; ha ya ya'be bayel yutsil te sbihil Jehová, jun seña te sbahtel q'uinal ma xjihn.