Read Tzeltal Isaías 56 Bible Online

Isaías 56 - Tzeltal bible

Isaías 56

¹Hich ya yal te Jehová: Stojil me xawa'iy chahpanwanej soc pasahic te bintic toj ta pasele, como nopol ya xtal te colel cu'un soc te ya xchicnaj te bin stojil ta pasel cu'une.

²Bayel me yutsil te mach'a ya spas ini, te hich yo'tan ya spas, te ya scanantay te sc'ahc'alel cux-o'tan, te ma ba ya sbohlobtesbe sc'oblal, soc te ya scom sba ta spasel te bin chopol, xchi.

³Te jyanlum te yac'oj sba ta stojol Jehová ma me hichuc ya yal: Te Jehová ya me sloq'ueson ta yohlil te pueblo yu'une, ma me xchihuc. Soc ma me hichuc ya yal te eunuco: Ho'on taquin te'on, ma me xchihuc.

⁴Como hich ya yal te Jehová: Te eunucohetic te ya scanantaybon te sc'ahc'alel cux-o'tan, te ya stsahic te bin ya sc'an co'tan soc te jun yo'tanic yich'ojic ta cuenta te chapbil c'op cu'une,

⁵ya ca'be lugar ta jna soc ta yutil te ts'ahquetic cu'un, ya ca'be sbihil te lec xan a te bin ut'il sbihil ach'ix-querem nich'aniletic; ya ca'be sbihil te stalel ya xhil, te mayuc bin ora ya xch'ay.

⁶Soc te jyanlumetic te ya yac' sbahic ta stojol te Jehová yu'un ya yac' sbahic ta a'batinel yu'un, te c'ux ta yo'tanic te sbihil te Jehová, soc te ha a'batetic ya xc'ohtic yu'une, spisil te mach'atic ya scanantayic te sc'ahc'alel cux-o'tan te ma ba ya sbohlobtesbe sc'oblal soc te ya yich'ic ta cuenta te chapbil c'op cu'une,

⁷ha'ic me ya quic' tal ta ch'ul wits cu'un soc ya ca'be yutsil yo'tanic ta jna te banti ya quich' c'oponele. Ya jtsacbe te scohtol chic'bil mahtaniletic soc te yantic milbil mahtaniletic ya ya'bonic ta scajtajib cu'un, como hich ya x'a'bot sbihil te jna: ha te na yu'un sc'oponel Dios yu'un spisil pueblohetic, xchi.

⁸Hich ya yal te Cajwaltic Jehová, te mach'a ya stsobticlan te mach'atic yu'un Israel te puhquemic bahele: Ya to jtsob xan tal yantic, soc te mach'atic stsobojix sbahique, xchi.

⁹Spisil te chambahlametic ta q'uinal, spisil te chambahlametic ta tohyem te'etic, la'ic, lajinahic ta we'el.

¹⁰Ha ts'o'sitetic te j'il-q'uinaletic yu'unique, spisilic ma sna'ic q'uinal; spisilic uma' ts'i'etic, ma xhu' yu'unic wohwonel; metselic a ya ya'iyic wayich, ya smulanic te wayele.

¹¹Ha ts'i'etic te ay bayel swi'nalic, ma xnoj sch'uhtic; ha jcanan-tuminchijetic te ma sna'beyic scuentahil, spisilic ya st'unic te be yu'unic, jujutuhl ya sle yutsil slequilic.

¹²Hich ya yalic: Conic, ya cuch'tic vino, ya xyacubotic yu'un tulan uch'balil. Hich nix ya jpastic pajel, o c'ax lec to xan a, xchihic.