Read Tzeltal Isaías 57 Bible Online

Isaías 57 - Tzeltal bible

Isaías 57

¹Ya xlaj te mach'a toj yo'tan, pero mayuc mach'a ay ta cuenta yu'un. Ya xlajic te mach'atic jun yo'tanic ta stojol Dios, pero mayuc mach'a c'ohem ta yo'tan te ta scaj te bin chopol ya yich' loq'uesel te mach'a toj yo'tan.

²Pero te mach'a toj yo'tan ya x'och ta lamal q'uinal; ya scux yo'tanic ta smuquenalic spisil mach'atic toj ya xbehenic ta stojol Dios.

³¡Yan te ha'exe, nohpojanic talel, ha'ex te snich'nabex jna'ojel, sts'umbalex j'antsiwej soc j'antsinel ants!

⁴¿Mach'a a te yac alabanic? ¿Mach'a a te yac ajam awe ta scontrahinel soc te yac aloq'ues tal awac' yu'une? ¿Ma bal ha'uc yal-snich'nabex jtoybahetic, ha sts'umbalex jlotetic

⁵te u'untaybil awo'tanic ta spasel mulil ta ye'tal te jihte'etic soc spisil te'etic te pimic ya'binal; te yac awaq'uic ta chic'bil mahtaniletic te awal-anich'nabic ta sjuclejetic soc ta lehch tontiquil?

⁶Te sch'ulet tonetic[20] ta sjuclej ha te bintic awu'un ya xc'oht, ha te bintic yac awich'ique; la awaq'uic malbil mahtanil ta stojolic soc la awa'beyic smahtanin harina. ¿Ma bal yacuc ca'be castigo yu'un spisil ini?

⁷La awac' awayib ta sba toyol wits, soc tey mohat bahel a ta yaq'uel milbil mahtaniletic.

⁸Ta spat te sti'il ana soc smarohil la awac' te seña yu'un lotil dios awu'un. La ach'ayon hilel, la awahtan aba, mohat ta awayib te la achahpan; la achap ac'op soc, la amulan te swayib ta bayuc te yac awile.

⁹C'ohat ta stojol Mélec[21] soc aceite, soc la ap'ohltes perfumehetic awu'un; namal la aticon bahel jal-c'opetic awu'un, cohat bahel c'alal ta sc'ubulil yawil mach'atic chamenic.

¹⁰Luhbat yu'un bayel behetic banti behenat, pero ma ba la awal: Mayuc stuc, ma xchihucat. La ata xan awip, hich ma ba laj te awipe.

¹¹¿Mach'a yac axi', mach'a la xiwtesat, te la alo'loyon, te ma ba la ana'on, ni ma ba tal ta awo'tan? ¿Ma bal ha'uc yu'un te ch'abon ta namey tal, te hich ma ba axi'ojon?

¹²Ya jpuc ta halel te ma lecuc te bintic toj yac apas ta ac'op soc te awa'tele, te mayuc bin ya scoltayat a.

¹³C'alal ya x'awonat, ¡ac'a scoltayat te loc'ombahetic awu'un! Ta spisilic ya xlicotic bahel ta ic', ta scuenta nax hu'xiyel ya xlicot bahel. Yan te mach'a ya smuc'ulinon yo'tan, ya me x'a'bot yich' te q'uinal soc ya me yu'untay te ch'ul wits cu'un.

¹⁴Soc hich ya yich' halel: ¡Pasa, pasa, chahpana te behe! Loq'uesahic te bintic ya xmacawan ta be yu'un te pueblo cu'une, xchi.

¹⁵Como hich ya yal te Mach'a toyol ay, te mach'a stalel cuxul, te Ch'ul Dios te sbihile: Ho'on nahinemon ta banti toyol soc ch'ultesbil, pero ha nix hich nahinemon soc te mach'a pich'il yo'tan soc peq'uel yo'tan, yu'un ya ca'be xan yip yo'tanic te mach'atic peq'uelic soc yu'un ya ca'be xan yip yo'tanic te mach'atic pich'il yo'tanique.

¹⁶Como ma spisiluc ora ya jtij ta c'op, ma spisiluc ora ya x'ilinon, yu'un ya xlaj yip yo'tanic ta jtojol te hichuque, te sch'uhlelic te jpasoje.

¹⁷Ilinon yu'un schopolil te sbic'tal yo'tan, la jca'be castigo, la jnac' jba ta stojol soc ilinon; pero te jtoybahil la st'un bahel te be te la sc'an yo'tan stuquel.

¹⁸Quilojbe te behetic yu'unic, pero ya jlecubtes soc ya jtojobtes bahel; ya jmuc'ubtesbe q'uinal ya'iy soc te mach'atic ayic ta oq'uel yu'une.

¹⁹Ya ca'be yalic te yutsil c'oblalil ini: Lamaluc me q'uinal ta stojol te mach'a namal ay, lamaluc me q'uinal ta stojol te mach'a nopol ay, xchihic, soc ya jlecubteslan, xchi te Jehová.

²⁰Pero te mach'atic chopolic hich ayic te bin ut'il mar te xyuq'uinaj yu'un ic', te ma xhu' ya xlahmaj, te ya sch'oj loq'uel ahch'al soc c'a'pal te yip te ha'e.

²¹Mayuc lamal q'uinal yu'un te mach'atic chopolic, xchi te Dios cu'une.