Read Tzeltal Isaías 6 Bible Online

Isaías 6 - Tzeltal bible

Isaías 6

¹Ta ha'bil te cham te ajwalil Uzías, la jquil ta jnahalsit te Cajwaltic hucul ta huctajibal te toyol soc toybil sc'oblal, soc noj te templo ta sti'il snahtil-c'u'.

²Ay serafínetic ta yahc'olal. Ay waqueb xic' jujutuhl: ta cheb ya smac yelawic a, ta cheb ya smac yoquic a, soc ta cheb ya xwihlic a.

³Hich talel c'axel yacalic ta yalel: ¡Ch'ul Dios, Ch'ul Dios, Ch'ul Dios, Jehová te scuentahinej spisil; nojel ta swohlol bahlumilal te yutsilale! xchihic.

⁴C'alal c'opojic, nihc te yich'o-ip te puertahetic soc noj ta ch'ahil te templohe.

⁵Ha yu'un hich la jcal: ¡Ay jwocol, ya xchamon! como ho'on winicon te bohloben sc'oblal que soc nahinemon ta yohlil te pueblo te bohloben sc'oblal yehic, la jquil ta jsit te Ajwalil, te Jehová te scuentahinej spisil, xchihon.

⁶Hich wihl tal ta jtojol jtuhl serafín, yich'oj ta sc'ab tsumbil ac'al te la yich' tal soc tenaza ta scajtajib ta chiq'uel mahtanil.

⁷La stahbon que a, hich la yal: Ilawil, la stahbat awe ini; la yich'ix loq'uesel te bintic chopol apasoj soc pocbilix amul, xchi.

⁸Patil la jca'iybe sc'op te Jehová, hich yac ta yalel: ¿Mach'a ya jticon bahel? ¿Mach'a ya xbaht cu'untic? xchi. La jac'be sc'op: Li' ayon, ticonawon bahel, xchihon.

⁹Hich la yal: Bahan, hich me yac awalbe te pueblo ini: Yac awa'iyic ta lec, pero ma xc'oht ta awo'tanic; yac awilic ta lec, pero ma xana'beyic scuentahil, xchihan me.

¹⁰Tulantesbeya yo'tan te pueblo ini; macbeya schiquinic soc macbeya sitic, scuenta yu'un ma ba ya yil ta sitic, ma ba ya ya'iy ta schiquinic, ma ba ya xc'oht ta yo'tanic, ni ha'uc hich ya suhtes yo'tanic soc ya xlecubic yu'un, xchi.

¹¹Hich la jcal: ¿Jayeb xan c'ahc'al, Cajwal? xchihon. La sjac'bon jc'op: Ha to c'alal jihnemix a te pueblohetic soc mayuquix yajwal a; ha to c'alal mayuquix ants-winic ta nahetic soc te jochol taquin q'uinal ya xc'oht te q'uinale;

¹²ha to c'alal te Jehová ya sloq'ues ta namal te ants-winiquetic soc ay bayel q'uinal te ihquitaybil.

¹³Teme ay ya xhil jun ta slajunebal, ya me yich'ic jinel; pero hich te bin ut'il te jihte' soc te sac-jihte' ya xhil schumante'el c'alal ya yich' ts'etel, ha nix hich schumante'el ya xc'oht te ch'ultesbil ts'umbalil, xchi.