Read Tzeltal Isaías 62 Bible Online

Isaías 62 - Tzeltal bible

Isaías 62

¹Ta scuenta te c'ux ta co'tan te Sión ma ba ya xch'abon ta c'op; ta scuenta te c'ux ta co'tan te Jerusalén ma ba ya jcux co'tan, ha to c'alal ya xtihl bahel te bin stojil ta pasel yu'une, soc te colel yu'un hich ya xtihl te bin ut'il tsumbil c'ahc'.

²Hich me ya yilic te nacionetic te bin stojil yac apasic, soc spisil te ajwaliletic ya yilbat awutsilal; ya x'a'botat yach'il abihil te ya yalbat te Jehová.

³Ha coronahat yu'un utsilal ya xc'ohat ta sc'ab te Jehová, ha corona yu'un ajwalil ya xc'ohat ta sc'ab te Dios awu'une.

⁴Ma ba hich ya yalbatix xan abihil: Ihquitaybil, te xchihe, soc ma ba hich ya yalbeyiquix xan sc'oblal aq'uinal: Jihnem, ma xchihuquic; ha ya x'a'botat abihil: Hefzi-bá,[23] xchi, soc: Beula,[24] xchi sbihil te aq'uinale; como mulambilat yu'un te Jehová, soc ha smamalal te aq'uinal ya xc'oht.

⁵Hich te bin ut'il jtuhl querem ya xnuhpun soc ach'ix, hich te aquerem-nich'nab[25] ya me yic' yihnaminat; hich te bin ut'il ay yutsil yo'tan te querem ta stojol te slecol, hich ay yutsil yo'tan Dios ta atojol.

⁶Ta ba ts'ahquetic awu'un, Jerusalén, cac'oj j'il-q'uinaletic, c'ahc'al ahc'abal ma ba ya xch'abic ta c'op. ¡Ha'ex te yac awa'be sna' te Jehová, ma me xacux awo'tanic,

⁷soc ma me xawa'beyic scux yo'tan ha to c'alal ya scha'pas te Jerusalén soc ya yac' te ha ya xhalbot yutsil sc'oblal yu'un ta bahlumilal!

⁸Te Jehová, ta scuenta swa'el sc'ab te ay bayel yu'el, hich la yal ta jamal: Ma ba ya caq'uix te ha swe'el acontratac ya xc'oht te trigo awu'un, soc te jyanlumetic te ya yuch'beyic te vino te ha sit te awa'tele;

⁹pero te mach'atic ya stsobic ha nix ya swe'ic, soc ya me yalbeyic yutsil sc'oblal te Jehová; soc te mach'atic ya stulbeyic sit ts'usubil ya me yuch'ic ta amaq'uetic yu'un te ch'ul awilal cu'une, xchi te Jehová.

¹⁰¡C'axanic, c'axanic bahel ta ochibaletic yu'un te pueblo; chahpanahic te sbehlal te pueblo; pasahic, pasahic te muc'ul be, loq'uesahic te tonetic, toyahic bandera ta stojol te nacionetique!

¹¹Ilawil, te Jehová hich la spuc ta halel c'alal ta sti'il te bahlumilal: Halbeyahic te yantsil-nich'an Sión: Talix te Jcoltaywanej awu'un; ilawil, yich'oj tal mahtanil, ay ta stojol te mahtanile, xchi.

¹²Ya x'a'bot sbihilinic: Ch'ul Pueblo, xchi, te mach'atic ac'otic ta libre yu'un Jehová, xchi me sc'oblal. Soc ya x'a'botat abihilin: C'ambil Pueblohat, Pueblo te ma ba ihquitaybil, xchi me ac'oblalic.