Read Tzeltal Isaías 63 Bible Online

Isaías 63 - Tzeltal bible

Isaías 63

¹¿Mach'a a ini te yac ta talel ta Edom, ta Bosra, te slapoj tsajal cu'ul? ¿Mach'a a ini te buen t'ujbil sc'u' slapoj, te yac ta behel soc smuc'ul yip? Ho'on me, te toj ya xc'opojon, te ay cu'el ta coltaywanej.

²¿Bin yu'un tsaj te ac'u' hich te bin ut'il sc'u' te mach'a ya sts'o' ta teq'uel sit ts'usub ta sp'e'ojibal?

³Jtuquel jts'o'oj ta teq'uel ta sp'e'ojibal; mayuc mach'atic ta pueblohetic te sjoquinejonic. La jts'o' ta teq'uel soc quilimba, la jtenticlan soc sc'ahc'al co'tan; te sch'ich'el la sts'itbon a te jc'u' jpac', hich la yatin spisil te jc'u'e.

⁴Como ay ta co'tan te sc'ahc'alel ya'beyel spacol; c'ohtix te ha'bil yu'un te ya cac' ta libre.

⁵La jquil, pero mayuc mach'a ya scoltayon, xcham co'tan yu'un te mayuc mach'a la scoltayon. Ha yu'un la ya'bon ca'iy tsalaw te jc'ab, soc la ya'bon quip te quilimba.

⁶Ta scuenta quilimba la jts'o' ta teq'uel te nacionetic, ta scuenta tulan quilimba la jyacubtes soc la jmalbe sch'ich'el ta lum, xchi.

⁷Ya calbe sc'oblal te sc'uxul yo'tan te Jehová, te yutsil sc'oblal te Jehová yu'un spisil bintic spasoj ta jtojoltic, te bintic bayel lec la spasbe te mach'atic yu'un Israel, te spasoj ta scuenta sna'beyel yo'bolil sbahic soc te smuc'ul sc'uxul yo'tane.

⁸Hich la yal: Melel ha pueblo cu'un, ha al-nich'anetic te ma xlo'loywanic, xchi. Hich Jcoltaywanej c'oht yu'unic.

⁹Ta spisil te swocolic, ha nix hich la ya'iy wocol, ha coltayotic yu'un te ch'ul a'bat te ay ta stojol. Ta scuenta sc'uxul yo'tan soc sna'beyel yo'bolil sbahic la yac'ticlan ta libre; la shachticlan, la speticlan bahel spisil ora c'alal ta namey.

¹⁰Pero la stoy sbahic soc la ya'be smel yo'tan te ch'ul espíritu yu'une; ha yu'un suht ta scontrahic soc ha nix la stsac sba ta guerra soc.

¹¹Pero la sna'ic bin ut'il ayic ta namey, ha te Moisés soc te pueblo yu'une, hich la yalic: ¿Banti ay te mach'a la yic'ticlan c'axel ta mar soc te jcanantaywanej yu'un te tuminchijetic yu'une? ¿Banti ay te mach'a la yac' te ch'ul espíritu yu'un ta yohlilic,

¹²te la stojobtes bahel ta swa'el-c'ab Moisés ta scuenta yutsil yu'el, te la sjam te ha' ta stojolic, yu'un hich ay ta na'beyel sbihil sbahtel q'uinal?

¹³¿Banti ay te mach'a la yac' c'axel ta sc'ubulil te mar, hich te bin ut'il cawu ta jochol taquin q'uinal, te ma ba la sc'ohchin yoquic?

¹⁴Te espíritu yu'un Jehová la ya'be scux yo'tanic, hich te bin ut'il wacaxetic te ya xcohic bahel ta spamlej. Hich la atojobtes bahel te pueblo awu'un yu'un yac awac' te ay yutsil te abihile.

¹⁵Ilawil c'alal ta ch'ulchan, c'alal ta ch'ul yutsil awilal te banti nahinemat. ¿Banti ay te xut'et awo'tan soc te awu'el, te yac ana' yo'bolil jbahtic soc te yac ac'uxultayotcotique? ¿Yu'un bal mayuc ta jtojolcotic?

¹⁶¡Pero ha'at tatilat cu'uncotic! Aunque ma sna' jbahcotic te Abraham, soc ma sna'otic te Israel, ha'at Jehová, tatilat cu'uncotic; J'ac'awat ta libre cu'uncotic, xchi te abihil c'alal ta namey.

¹⁷¿Bin yu'un, Jehová, te la awac' howiyotcotic ta behetic awu'un soc te la atulantes co'tancotic yu'un ma ba ya jxi'atcotic? ¡Suhtan talel, ta scuenta sc'uxul awo'tan ta stojol te a'batetic awu'un, suhtan talel ta scuenta te chahpalchahp te mach'atic awu'un!

¹⁸Te ch'ul pueblo awu'un ma ba hal c'ahc'al la yu'untay te ch'ul awilal awu'un, pero yo'tic te jcontratac sts'o'ojix ta teq'uel.

¹⁹Hich c'ohemotcotic te bin ut'il mach'atic mayuc bin ora la acuentahin, te mayuc bin ora la jquich'batcotic te abihile.