Read Tzeltal Isaías 64 Bible Online

Isaías 64 - Tzeltal bible

Isaías 64

¹¡Ayuc bin ut'il yac ach'i' te ch'ulchan soc ya xcohat talel, scuenta yu'un yacuc xnihc ta atojol te witsiltique;

²hich te bin ut'il c'ahc' te ya schic' te ch'ixtiquil, te ha te ya sbuhlantes te ha'e! Hich yac awac' te ya sna'bat aba te acontratac soc te ya xnihquic ta atojol te nacionetique.

³C'alal la apas te bintic xiweltic sba, te mayuc bin ora la jna'cotic te hich ya xc'oht ta pasele, cohat talel, soc nihquic te witsiltic ta atojol.

⁴Mayuc mach'a la ya'iy, mayuc banti a'iybil soc mayuc banti ilbil yan Dios te bin ut'il ha'at, te ya scoltay te mach'atic ya xmahliyot yu'une.

⁵Ya xloc'at ta stahel te mach'a soc yutsil yo'tan ya spas te bin stojil ta pasel, te ya sna'bat te behetic awu'une. Pero ilinat yu'un la jta jmulcotic, como bayel ha'bil la jpasulancotic muliletic. ¿Ya bal xhu' ya xcolotcotic?

⁶Jpisilcotic hich ayotcotic te bin ut'il bin bohloben sc'oblal, spisil te bintic stojil jpasojcotic hich c'ohemic te bin ut'il bohloben pac'; jpisilcotic luhbajemotcotic cohel hich te bin ut'il ya'binal te', soc te bintic chopol jpasojcotic hich la stasotcotic bahel te bin ut'il ic'.

⁷Mayuc mach'a te ya sc'oponat ta abihil, o te ya spas tulan te ya sc'ambat coltayel; como la anac' asit ta jtojolcotic, soc la awac' te sayubotcotic yu'un te yip te jmulcotique.

⁸Pero ha'at jtatatcotic, Jehová; ho'otcotic ahch'alotcotic, ha'at jpac'ojomat, ta jpisilcotic ya'telotcotic ac'ab.

⁹Ma jc'axeluc x'ilinat, Jehová, soc ma staleluc xana'botic te jmulcotique. ¡Ilawotcotic, como pueblohotic awu'un ta jpisilcotic!

¹⁰Jochol taquin q'uinal c'ohem te ch'ul pueblohetic awu'un, te Sión ha jochol taquin q'uinal, te Jerusalén jc'axel jihnemix.

¹¹Te ch'ul awilal cu'uncotic te ay yutsil, te banti la yalbat yutsil ac'oblal te jme'jtatcotic, lajix ta c'ahq'uel, soc jihnemic spisil bintic mulantic sba cu'uncotique.

¹²Ta spisil ini, Jehová, ¿ma bal ayuc bin yac apas yu'un? ¿Ch'abalat bal soc jc'axel bal yac awa'botcotic castigo?