Read Tzeltal Isaías 65 Bible Online

Isaías 65 - Tzeltal bible

Isaías 65

¹Hich ya yal te Jehová: La jcac' jba ta lehel yu'un te mach'atic ma ba yac sjoc'obelonic, ha la stahonic te mach'atic ma ba la slehonic. Hich la jcalbe te nación te ma ba la sc'opononic ta jbihil: Li' ayoni, li' ayoni, xchihon.

²Sjunal c'ahc'al la jach jc'ab ta yiq'uel tal jun toyba pueblo te yac ta behel ta be te ma lecuc, te ya st'unic bahel te snopojibal yu'unique;

³jun pueblo te ta mero jsit ya yac' ilinucon spisil ora, ya yac' milbil mahtaniletic ta ts'umbil nichimetic soc ya schic' pom ta sba ladrillohetic;

⁴ya shuhcan sbahic ta yohlil te muquenaletic soc ya xc'ax ahc'abal yu'unic ta banti muquen ay; ya sti'ic chitam, soc ay ta oxom yu'unic ya'lel te bin bohloben sc'oblal;

⁵hich ya yalic: Hilan tey a, ma me xnohpojat tal, como c'ax hich ch'ultesbilon a te bin ut'il te ha'ate, xchihic. Te ants-winiquetic ini ha ch'ahil ta jni', ha c'ahc' te ya xtihl sjunal c'ahc'al.

⁶Ilawil, ha ts'ihbabil ta jtojol, ma ba ya xch'abon, ya me ca'be stojic hich te bin ut'il ya sc'an, ya ca'be stojic tey nix ta stojolic,

⁷ta scaj amulic soc smul te ame'atatic, xchi te Jehová, Yu'un la schiq'uic pom ta witsiltic soc la sbohlc'optayonic ta tsehletic; ha yu'un ya cac' ta stojolic te stojol bintic la spasic ta nahil, xchi.

⁸Hich ya yal te Jehová: C'alal ay mach'a ya sta ya'lel ta jchej sit ts'usub, hich ya yal: Ma me xawixtalan, como ay bendición tey a, xchi, hich nix ya jpas ho'on ta stojol te a'batetic cu'un, ma ba ya jin spisilic.

⁹Ya cac' ya xloc' sts'umbal Jacob, soc te ayuc mach'atic ta Judá te ya yich'beyic te witsiltic cu'une; te mach'atic tsahbilic cu'un ya me yu'untayic te q'uinale, tey ya xnahinic a te a'batetic cu'une.

¹⁰Te Sarón ha yawil tuminchijetic ya xc'oht, soc te sjuclej yu'un Acor ha yawil wacaxetic ya xc'oht yu'un te pueblo cu'un te ya slehonique.

¹¹Yan te ha'ex te yac awihquitayic te Jehová soc te ya xch'ay ta awo'tanic te ch'ul wits cu'un, te yac awa'beyic we'elil te dios Fortuna soc te yac achahpambe capbil vino te dios Destino,

¹²ho'on ya cac' te ya xlajex ta espada, soc apisilic yac aquejan abahic ta stojol te lajele. Como la jquiq'uex, pero ma ba la ajac'bonic, c'opojon, pero ma ba la awa'iybonic; ha la apasic te bin chopol ta jtojol soc la atsahic te bin ma jmulan, xchi te Jehová.

¹³Ha yu'un hich ya yal te Cajwaltic Jehová: Te a'batetic cu'un ya me xwe'ic, yan te ha'exe ay awocolic ta wi'nal; te a'batetic cu'un ya me x'uch'ic, yan te ha'exe ayex ta taquinti'il; te a'batetic cu'un tse'el yo'tanic, yan te ha'exe ya xhilex ta q'uexlal;

¹⁴te a'batetic cu'un ya xc'ayojinic soc yutsil yo'tanic, yan te ha'exe ya x'awonex yu'un sc'uxul swocol te awo'tanic soc ya x'ahcanajex yu'un pich'il-o'tanil.

¹⁵Te mach'atic tsahbilic cu'un ya me stuhumbeyex abihilic ta scuenta sc'anel castigo. Te Cajwaltic Jehová ya me smilex, yan te a'batetic yu'un ya yac'ticlambe yan sbihilic.

¹⁶Mach'ahuc a te ya yac' bendición, ha ya spas ta scuenta te Dios yu'un te bin smelelil; soc mach'ahuc a te ay bin ya yal ta jamal, ha ya spas ta scuenta te Dios yu'un te bin smelelil; como te wocoletic te c'axemiquix ya xch'ay ta o'tanil soc ma ba chicanix ta ilel cu'un.

¹⁷Ilawil, ya jpas yach'il ch'ulchan soc yach'il bahlumilal. Te bin ay ta nahil mayuquix ta na'el, jc'axel ma xna'otix.

¹⁸Ay me yutsil awo'tanic soc stse'elil awo'tanic spisil ora yu'un te bintic ya jpasticlan, yu'un ya cac' te ha yutsil-o'tanil ya xc'oht te Jerusalén soc te ha yutsil q'uinal ya xc'oht te ants-winiquetic yu'une.

¹⁹Bayel me yutsil co'tan ya ca'iy yu'un te Jerusalén soc tse'el me co'tan yu'un te pueblo cu'une; mayuquix bin ora ya x'a'iyot oq'uel o aw tey a.

²⁰Ma me ayuquix alal te jun cheb nax c'ahc'al ya xcuxaj, soc ma me ayuquix mamal te ma ba ya sts'acay yorahil; como ya xcuyot ta alal to teme ya xcham ta ho'winic (100) ya'bilal, soc te mach'a ma sta ho'winic (100) ya'bilal ya xcuyot ta ma lecuc sc'oblal.

²¹Ya spasic nahetic soc ya xnahinic tey a, ya sts'unic ts'usubiltic soc ya slo'beyic sit.

²²Ma ba ya spasic nahetic te yan mach'atic ya xnahinic tey a, soc ma ba ya ya'iy ts'umbajel te yan mach'a ya swe'. Como te yorahil te pueblo cu'un hich ya xc'oht te bin ut'il jtehc' te', te mach'atic tsahbilic cu'un ya me ya'iybe yutsilal te ya'tel sc'abique.

²³Ma ba tojol nax ya x'a'tejic, soc ma ba ya yalatay alaletic te ma lecuc sc'oblal ya xc'ohtic; como ha sts'umbalic te mach'atic yich'ojic bendición yu'un Jehová, ha'ic nix soc te sts'umbalique.

²⁴Ma to x'awonic a te ya jac'be sc'opic; c'alal yaquic ta c'op a ya ca'iybe te sc'opique.

²⁵Te ha'mal-ts'i' soc te alal-tuminchij ya me sjoquin sbahic ta we'el, te choj ya me swe' ac hich te bin ut'il j'a'tel-wacax, yan te chane ya me swe'elin ts'u'lum. Ma ba ya yuts'inic soc ma ba ya sjinic ta spisil te ch'ul wits cu'un, xchi te Jehová.