Read Tzeltal Levítico 10 Bible Online

Levítico 10 - Tzeltal bible

Levítico 10

¹Te Nadab soc Abiú, te snich'nab Aarón, ta jujutuhl la stsaquic te schic'ojibal pom yu'unic, la ya'beyic sc'ahc'al soc spomil, la ya'beyic smahtanin Jehová yan c'ahc' te ma hichuc halbibilic ya spasique.

²Loc' tal c'ahc' ta stojol Jehová te la schic'ticlan, hich chamic ta stojol Jehová.

³Ha yu'un te Moisés la yalbe te Aarón: Hich ay te bin yaloj te Jehová: Te mach'atic ya xnohpojic ta jtojol, ya ca'be yil te ho'on Ch'ul Dioson; ta stojol spisil te pueblo ya me x'ich'oton ta muc', xchi. Mayuc bin la yal yu'un te Aarón.

⁴Te Moisés la yic' tal te Misael soc Elzafán, te snich'nab Uziel, te stajun Aarón, hich la yalbe: La', q'uechticlanahic loq'uel ta ch'ul awilal te awermanotac, loq'uesahic bahel ta fuera yu'un te campamento, xchi.

⁵Hich nohpojic tal, la sloq'uesic bahel soc smuc'ul-c'u'ic ta fuera yu'un te campamento, hich te bin ut'il halbotic yu'un te Moisés.

⁶Te Moisés hich la yalbe te Aarón soc te snich'nab, ha te Eleazar soc Itamar: Ma me xaloq'ues te smuhquil ajolic, soc ma me xach'i' ac'u'ic scuenta seña mel-o'tan, scuenta yu'un ma ba ya xchamex soc ma ba ya xtal ilimba ta stojol te pueblo. Yan te awermanotac, ta spisil sna Israel, ya xhu' ya smel yo'tanic stuquel yu'un te c'ahc' te la stihltes te Jehová.

⁷Soc ma me xloq'uex bahel ta yochibal te Nahilpac' Templo yu'un tahojibal, scuenta yu'un ma xchamex a, como awich'ojic te aceite scuenta ch'ultesel yu'un Jehová, xchi sc'oblalic. Hich nix la spasic te bin ut'il halbotic yu'un te Moisés.

⁸Te Jehová la sc'opon te Aarón, hich la yalbe:

⁹Ha'at soc anich'nab te sjoquinejat, ma me xawuch'ic vino o yan bin pajuben te bin ora ya x'ochex bahel ta Nahilpac' Templo yu'un tahojibal, scuenta yu'un ma ba ya xchamex. Ha mandaril te ma xlaj sc'oblal yu'un cajalcaj ats'umbal,

¹⁰scuenta yu'un yac ana'ic stsahtayel te bin ch'ultesbil soc te bin ma ba ch'ultesbil, te bin lec soc te bin bohloben sc'oblale;

¹¹soc scuenta yu'un yac awa'beyic snop te snich'nab Israel spisil te mandariletic halbotic yu'un Jehová ta scuenta Moisés, xchi.

¹²Te Moisés la yalbe te Aarón soc te snich'nab te hilemic, ha te Eleazar soc Itamar: Ich'ahic te mahtanil harina te hilem yu'un te mahtaniletic la yich' chiq'uel ta stojol Jehová, mayuc slevadurahil a ya me awe'ic ta nopol scajtajib ta chiq'uel mahtanil, como mero ch'ultesbil.

¹³Ya me awe'ic ta lugar te ch'ultesbil, como ha'ex awu'unic soc anich'nab te mahtaniletic ya yich'ic chiq'uel ta stojol Jehová; yu'un hich halboton.

¹⁴Ha'at soc te aquerem-nich'nab soc awantsil-nich'nab te sjoquinejat, tey ta lugar te lec sc'oblal yac awe'ic te stahn la yich' tuchilanel soc te ya' te a'bibil, como ha te bin ac'bil ta acuentahic soc anich'nab te loq'uem ta milbil mahtanil scuenta lamal q'uinal te ya yaq'uic te snich'nab Israel.

¹⁵Te ya' te ya yich' aq'uel soc te stahn te ya yich' tuchilambeyel ya me yich'ic tal soc te sjuhp'el te mahtanil ya yich' chiq'uel, ya me yich' tuchilanel scuenta tuchilambil mahtanil ta stojol Jehová; spisil ora ha'at me awu'un soc anich'nab, hich te bin ut'il yaloj ta mandar te Jehová, xchi.

¹⁶Te Moisés la sjoc'oy banti ay te tat tentsun yu'un te mahtanil yu'un mulil. C'alal la ya'iy te la yich'ix chiq'uel, ilin ta stojol te Eleazar soc Itamar, te snich'nab Aarón te hilemique, hich la yalbe:

¹⁷¿Bin yu'un ma ba la awe'ic te mahtanil yu'un mulil ta lugar te ch'ultesbil? Mero ch'ultesbil, soc Dios la ya'beyex scuenta yu'un yac aloq'uesbeyic a te smulic te pueblo, scuenta yu'un ya stahic perdón yu'un smulic ta stojol Jehová.

¹⁸Ilawil, ma ba la yich' ich'el ochel te sch'ich'el ta yutil te ch'ul awilal, ha yu'un la sc'an te la awe'ic te mahtanil ta lugar te ch'ultesbil, hich te bin ut'il la jcal ta mandar, xchi.

¹⁹Te Aarón hich la sjac'be sc'op te Moisés: A'iya awa'iy, nax to la yaq'uic ta stojol Jehová te milbil mahtanil yu'un mulil soc te scohtol chic'bil mahtanil yu'unique, pero te ho'one ay bin c'ohemix ta pasel ta jcuenta; te lajuc jwe' nax te mahtanil yu'un mulil, ¿lec bal yo'tan yu'un hiche te Jehová? xchi.

²⁰C'alal hich la ya'iy te Moisés, lecub yo'tan yu'un.