Read Tzeltal Levítico 11 Bible Online

Levítico 11 - Tzeltal bible

Levítico 11

¹Te Jehová la yalbe te Moisés soc Aarón:

²Halbeyahic te snich'nab Israel: Ta spisil te chambahlametic cuxajtic ta q'uinal, hich ay te ya xhu' yac awe'ic:

³te chambahlametic te xalal slots'ic soc te ya scha'jach' xan swe'elic, ya xhu' yac awe'ic.

⁴Pero ma me xawe'ic te chambahlametic te ya scha'jach' xan swe'elic o te xalal te slots'e: ha te camello, como ya scha'jach' xan swe'el pero ma ba xalal slots'; ma me lecuc sc'oblal awu'unic.

⁵Soc te cohtom, como ya scha'jach' xan swe'el pero mayuc slots'; ma me lecuc sc'oblal awu'unic.

⁶Te liebre,[4] como ya scha'jach' xan swe'el pero mayuc slots'; ma me lecuc sc'oblal awu'unic.

⁷Te chitam, aunque xalal slots', ma ba ya scha'jach' xan swe'el; ma me lecuc sc'oblal awu'unic.

⁸Ma me xawe'beyic sbaq'uetal, soc ma xapicbeyic te schamen baq'uetal; ma me lecuc sc'oblal awu'unic.

⁹Ta spisil te chambahlametic te cuxajtic ta ha' ya xhu' yac awe'ic te ay stut xiq'uic soc te ay suhlil.

¹⁰Pero spisil te bin cuxajtic ta mar o ta muc'ul-ha'etic te mayuc stut xic' soc te mayuc suhlil, spisil te ya xbehenic o te cuxajtic ta ha'etic, ihlaybiluc me awu'unic.

¹¹Ihlaybiluc me awu'unic, ma me xawe'beyic te sbaq'uetalic, soc ya me awihlayic te schamen baq'uetalique.

¹²Spisil bintic ay ta ha' te mayuc stut xic' soc te mayuc suhlilic, ihlaybiluc me awu'unic.

¹³Hich ay te mutetic te ihlaybiluc awu'unic; ma me xawe'ic, ihlaybiluc me awu'unic: ha te jxic, quebrantahueso-jxic, xicul-ha',

¹⁴muc'ul ihc'al-hos, spisil ta chahp milano-mutetic,

¹⁵spisil ta chahp jojetic,

¹⁶te avestruz-mut, muc'ul xcuj, saquil pechul-ha', spisil ta chahp jxiquetic,

¹⁷tut xcuj, sjojmutil-ha', nahtil-ni'-mut,

¹⁸c'anal-oc-pech, muc'ul-e'-mutil-ha', c'anal t'axjol-hos,

¹⁹nahtil-oc-mut, soc spisil ta chahp garza-mutetic, t'ohts-jol-mut, soc sots'.

²⁰Spisil bic'tal chambahlametic te ya xwihlic soc te ya xbehenic ta chaneb yoc, ihlaybiluc me awu'unic.

²¹Pero te bic'tal chambahlametic ini te ya xwihlic soc te ya xbehenic ta chaneb yoc ya xhu' yac awe'ic teme jun ay soc ya'ic te yoquic yu'un xluht'lon ya xwihlic ta lum a.

²²Ha ya xhu' yac awe'ic ini: spisil ta chahp c'ulubetic, muc'ul c'ulubetic, xet o chichmut.

²³Pero spisil yantic bic'tal chambahlametic te ya xwihl soc te ay chaneb yoc, ihlaybiluc me awu'unic stuquel.

²⁴Ha ini te ya xbohlob ac'oblalic yu'un: Mach'ayuc a te ya spic te schamen baq'uet yu'un te chambahlametic ini ma me lecuc sc'oblal ya xhil yu'un c'alal ta yihc'ubel q'uinal.

²⁵Mach'ayuc a te ya yich' bahel te schamen baq'uetalic ya me sac' sc'u' spac' soc ma me lecuc sc'oblal ya xhil c'alal ta yihc'ubel q'uinal.

²⁶Spisil chambahlam te ay slots', pero teme ma ba xalal soc ma ba ya scha'jach' xan swe'el, ma me lecuc sc'oblalic awu'unic. Mach'ayuc a te ya spic ma me lecuc sc'oblal ya xhil c'alal ta yihc'ubel q'uinal.

²⁷Ta spisil te chambahlametic te ya xbehenic ta chaneb yoc, ma me lecuc sc'oblal awu'unic biluc chambahlamil te c'unic stahn yoc. Mach'ayuc a te ya spic te schamen baq'uetalic ma me lecuc sc'oblal ya xhil c'alal ta yihc'ubel q'uinal.

²⁸Te mach'a ya yich' bahel te schamen baq'uetal, ya me sac' sc'u' spac' soc ma me lecuc sc'oblal ya xhil c'alal ta yihc'ubel q'uinal. Ma me lecuc sc'oblal awu'unic.

²⁹Ma me lecuc sc'oblal awu'unic te chambahlametic te staslajan ya xbehenic ta lum: ha te sahbín, ch'o, soc spisil ta chahp xch'uch',

³⁰te saquil t'ohloc, ina'tan, ahyin, t'ohloc, soc o'ochan.

³¹Ta spisil te chambahlametic te staslajan ya xbehenic ta lum, ha'ic ini te bohloben sc'oblalic awu'unic. Mach'ayuc a te ya spicbe te schamen baq'uetal, ma me lecuc sc'oblal ya xhil c'alal ta yihc'ubel q'uinal.

³²Soc bohloben sc'oblal ya xhil spisil biluquetic teme ay chamen ya xch'ayic cohel tal ta sba, aunque pasbil ta te', c'u'ul, nuhcul, costal, o biluc a'tejibalul yu'un a'tel, ya me yich' otsesel ta ha', ma me lecuc sc'oblal ya xhil c'alal ta yihc'ubel q'uinal, hich me lecubenix sc'oblal ya xhil a.

³³Teme ay ch'ay ochel ta pac'bil oxom, ma me lecuc sc'oblal ya xhil, soc ha nix hich spisil te bintic ay ta yutil. Ya me yich' top'el te oxome.

³⁴Spisil we'elil te ya xtahot yu'un ya'lel te oxom, ma me lecuc sc'oblal ya xhil; soc spisil bin ya yich' uch'el te ay ta oxom ini, ma me lecuc sc'oblal ya xhil.

³⁵Spisil te biluquetic te tey ya xch'ay cohel ta sba a te bin chamene, ma me lecuc sc'oblal ya xhil; teme horno o banti ya yich' nup'el c'ahc', ya me yich' jinel, ma me lecuc sc'oblal, ma me lecuc sc'oblal ya xc'oht awu'unic.

³⁶Pero te sloq'uib-ha' o stsobojbil ha' stalel me lec sc'oblal ya xhil stuquel. Yan te mach'a ya spic te schamen baq'uetal, ma me lecuc sc'oblal ya xhil.

³⁷Te chamen chambahlametic ini, teme ay ya xch'ay cohel te schamen baq'uet ta sba sbac' ts'unubil te quechel ya yich' ts'unel, stalel me lec sc'oblal ya xhil;

³⁸pero teme yich'ojix ahts'esel te sbac' ts'unubil, teme tey ya xch'ay cohel ta sba a te schamen baq'uet, ma me lecuc sc'oblal ya xc'oht awu'unic.

³⁹Teme ay ya xcham chambahlametic te lec ta we'el, teme ay mach'a ya spicbe te sbaq'uetal, ma me lecuc sc'oblal ya xhil c'alal ta yihc'ubel q'uinal.

⁴⁰Te mach'a ya swe'be te schamen baq'uet ya me sac' sc'u' spac' soc ma me lecuc sc'oblal ya xhil c'alal ta yihc'ubel q'uinal; ha nix hich te mach'a ya sloq'ues te bin chamene, ya me sac' sc'u' spac' soc ma me lecuc sc'oblal ya xhil c'alal ta yihc'ubel q'uinal.

⁴¹Spisil chambahlametic te staslajan ya xbehenic ta lum, ha ihlaybil, ma me xawe'ic.

⁴²Spisil te bin ya sjoch sba ta sch'uht, soc te ya xbehen ta chaneb yoc o c'axem a, spisil te bin staslajan ya xbehen ta lum, ma me xawe'ic, como ihlaybil.

⁴³Ma me xawac' abahic ta ihlayel soc ta bohlobtesel ac'oblalic ta scuenta te chambahlametic te ya stas sbahic ta behel ta lum,

⁴⁴como ho'on Jehovahon te Dioson awu'unique. Ha yu'un ya me ach'ultes abahic, ch'ultesbilex me ya xc'ohex, como ho'on ch'ul Dioson; ha yu'un ma me xabohlobtes ac'oblalic ta scuenta biluc chambahlamil te staslajan ya xbehen ta lumq'uinal.

⁴⁵Ho'on Jehovahon te la jloq'uesex tal ta sq'uinal Egipto scuenta yu'un ho'on Dioson ya xc'ohon awu'unic; ha yu'un ch'ultesbiluquex me, como ho'on ch'ul Dioson, xchi.

⁴⁶Ha mandariletic ini sc'oblal te chambahlametic, mutetic, spisil bintic cuxajtic te ya xbehenic ta ha', soc spisil chambahlametic te staslajan ya xbehenic ta lumq'uinal,

⁴⁷scuenta yu'un hich ya xhu' ta na'el a te bin lec sc'oblal soc te bin bohloben sc'oblal, soc te chambahlametic te lec ta we'el soc te ma lecuc ta we'ele.