Read Tzeltal Levítico 13 Bible Online

Levítico 13 - Tzeltal bible

Levítico 13

¹Te Jehová la yalbe te Moisés soc Aarón:

²Teme ay mach'a ay bin siht'em ta snuhculel, o ay chin o saclep'lep', te hich yilel te bin ut'il c'a'el-chamel, ya me yich' iq'uel bahel ta stojol te sacerdote Aarón o te snich'nab ay ta sacerdotehil.

³Te sacerdote ya me yil te c'a'el ay ta snuhculel, teme sacuben te stsotsel ta banti ay te c'a'ele, soc teme hich yilel te bin ut'il lohmajemix cohel yu'un te snuhculel, ha me c'a'el-chamel[5] abi. Teme la stsahtayix yil ta lec te sacerdote ya me yalbe te bohloben sc'oblal.

⁴Teme saclep'lep' te banti snuhculel, pero teme hich yilel te bin ut'il ma ba lohmajem cohel yu'un te snuhculel, soc teme ma ba sacuben te stsotsele, te sacerdote ya me smac huqueb c'ahc'al te mach'a ay schamele.

⁵Ta shuquebal c'ahc'al te sacerdote ya me stsahtay xan yil ta lec; teme stalel hich ay te c'a'el, teme ma ba puhquem bahel ta snuhculel, ya me scha'mac xan huqueb c'ahc'al.

⁶Ta shuquebal c'ahc'al te sacerdote ya me stsahtay xan yil ta lec; teme yac ta c'un ch'ayel bahel te c'a'ele, soc teme ma ba puhquem bahel ta snuhculel, ya me yal te lequix ay, ha nax schinuben; te jchamel ya me sac' sc'u' spac', hich lec sc'oblal ya xhil.

⁷Yan teme yac ta puhquel te schinul ta snuhculel te c'alal yac'ojix sba ta ilel yu'un te sacerdote ta sna'el teme lec aye, ya me yac' xan sba ta ilel yu'un te sacerdote.

⁸Teme la yil te sacerdote te puhquem ta snuhculel, ya me yal te bohloben sc'oblal; ha'ix c'a'el-chamel abi.

⁹Teme ay mach'a tsacbil ta c'a'el-chamel, ya me yich' iq'uel bahel ta stojol sacerdote.

¹⁰Ha ya stsahtay yil ta lec, teme ay sacal siht'emal ta snuhculel te la sacubtesbe te stsotsel, soc teme chican ta ilel te mero sbaq'uetal ta siht'emal,

¹¹ha c'a'el-chamel ta snuhculel te ma xlaje. Ha yu'un te sacerdote ya me yal te bohloben sc'oblal, ma ba ya smac, como ma lecuquix sc'oblal.

¹²Teme ya xpuhc bahel te c'a'el ta snuhculel, teme ya xpotsbot hahchel ta yoc c'alal ta sjol, te banti c'alal ya xhu' yu'un yilel te sacerdote,

¹³ha me ya stsahtay yil ta lec. Teme potsbotix scohtol sbaq'uetal yu'un te sc'a'ele, te sacerdote ya me yal te lec ay te mach'a ay sc'a'ele, como sacubix spisil, lecubix te mach'a ay ta chamele.

¹⁴Pero teme ay bin ora ya xchicnaj te mero sbaq'uetale, ma me lecuc sc'oblal ya xhil.

¹⁵Te sacerdote ya stsahtaybe yil ta lec te mero sbaq'uetale, ya me yal te bohloben sc'oblale. Ma ba lec sc'oblal te mero sbaq'uetale; ha me c'a'el-chamel abi.

¹⁶Teme ay bin ora sacub xan te mero sbaq'uetale, ya me xtal ta stojol te sacerdote,

¹⁷ha ya stsahtay yil ta lec. Teme sacubenix te sc'a'ele, ya me yal te lequix ay te mach'a ay ta chamel; lec sc'oblal ya xhil.

¹⁸Teme ay siht'em te ay spojowil ta snuhculel, pero teme lecub,

¹⁹teme ay to siht'em o tsajuben to banti c'axeme, ya me xbaht ya'be yil te sacerdote.

²⁰Ya me stsahtay yil ta lec te sacerdote; teme hich yilel te bin ut'il lohmajemix cohel yu'un te snuhculel, soc teme sacubenix te stsotsele, ya me yal te bohloben sc'oblal; ha me c'a'el-chamel te hahch ta banti siht'em te ay spojowil.

²¹Yan teme ya yil te sacerdote te mayuc sacuben stsotsel tey a, soc teme ma ba lohmajem cohel yu'un te snuhculel, teme algo ihc'uben yilel, ha yu'un te sacerdote ya me smac huqueb c'ahc'al.

²²Teme yac to ta puhquel bahel ta snuhculel, te sacerdote ya me yal te bohloben sc'oblal; ha'ix c'a'el-chamel abi.

²³Yan teme stalel ay, ma ba puhquem bahele, ha'ix te smac t'ohchil yu'un te loc' spojowil, te sacerdote ya me yal te lec ay sc'oblal.

²⁴Ha nix hich teme ay banti c'ahq'uem te snuhculel, teme tsajuben o teme sac banti c'axix te c'ahq'ueme,

²⁵te sacerdote ya me stsahtay yil ta lec; teme sacuben te stsotsel te banti ay te c'a'ele, soc teme hich yilel te bin ut'il lohmajemix cohel yu'un te snuhculel, ha me c'a'el-chamel te hahchix te banti ay te c'ahq'ueme; te sacerdote ya me yal te bohloben sc'oblal, como ha'ix c'a'el-chamel abi.

²⁶Yan teme ya stsahtay yil ta lec te sacerdote te mayuc sacal stsotsel soc ma ba lohmajem cohel yu'un te snuhculel, teme algo ihc'uben yilel, te sacerdote ya me smac huqueb c'ahc'al.

²⁷Ta shuquebal c'ahc'al ya stsahtay yil ta lec te sacerdote; teme puhquemix bahel ta snuhculel, ya me yal te bohloben sc'oblal, ha'ix c'a'el-chamel abi.

²⁸Pero teme stalel ay, ma ba puhquem bahel ta snuhculel, teme algo ihc'uben yilel, ha yaquix ta c'axel te banti c'ahq'ueme; te sacerdote ya me yal te lec ay sc'oblal, como ha smac t'ohchil te banti c'ahq'ueme.

²⁹Teme ay ants o winic te ya xhahch c'a'el ta sjol o ta yisim,

³⁰te sacerdote ya me stsahtay yil ta lec te c'a'ele; teme hich yilel te bin ut'il lohmajemix yu'un te snuhculel, soc teme algo c'anuben te stsotsel soc teme mayuquix bayele, te sacerdote ya me yal te ma ba lequix sc'oblal, ha c'ahc'al chin, ha c'a'el-chamel ta sjol o ta yisim.

³¹Yan teme la stsahtay yil ta lec te sacerdote te c'ahc'al chin, teme ya yil te ma ba lohmajem cohel yu'un te snuhculel soc teme mayuc yihc'al stsotsele, ya me smac huqueb c'ahc'al te mach'a yich'oj te c'ahc'al chine.

³²Ta shuquebal c'ahc'al, te sacerdote ya me stsahtay xan yil ta lec te c'a'ele; teme ma ba puhquem te c'ahc'al chin soc mayuc sc'anal tsotsel, soc teme ma ba lohmajem yu'un te snuhculele,

³³ya me ya'be squits' te stsotsel pero ma ha'uc ta banti ay te c'ahc'al chin; te sacerdote ya me smac huqueb xan c'ahc'al te mach'a yich'oj te c'ahc'al chine.

³⁴Ta shuquebal c'ahc'al te sacerdote ya me stsahtay xan yil ta lec te c'ahc'al chin; teme ma ba puhquem ta snuhculel soc teme ma ba lohmajem cohel yu'un te snuhculel, te sacerdote ya yal te lequix ay sc'oblal; ya me sac' sc'u' spac', hich me lec sc'oblal ya xhilix a.

³⁵Pero teme yac ta puhquel ta snuhculel te c'ahc'al chin te c'alal la yich'ojix lecubtesel a,

³⁶te sacerdote ya me stsahtay xan yil ta lec; teme puhc bahel ta snuhculel te c'ahc'al chin, ma ba ya yil te sacerdote teme ay sc'anal tsotsel, yu'un ma ba lequix sc'oblal.

³⁷Pero teme ya yil te stalel te c'ahc'al chin soc te colemix yihc'al tsotsel, c'axemix te c'ahc'al chine; lequix ay sc'oblal, te sacerdote ya me yal te lequix ay sc'oblal.

³⁸Teme ay ants o winic te ay saclep'lep' ta snuhculel,

³⁹te sacerdote ya me stsahta yil ta lec; teme ya xchicnaj ta snuhculel algo sacsac ta ihc', ha chin te loc' ta snuhculel, lec ay sc'oblal stuquel.

⁴⁰Teme ay winic te ya xluhbaj tsotsel sjol, te t'axal ya xhil, lec me sc'oblal stuquel.

⁴¹Teme ya xluhbaj te stsotsel sjol ta sti'ba, t'axal ya xhil te sti'ba, lec ni me sc'oblal.

⁴²Yan teme ta sti'ba o teme ta spat jol ay c'a'el te tsajtsajtique, ha me c'a'el-chamel yac ta hahchel tey a.

⁴³Ha yu'un te sacerdote ya me stsahtay yil ta lec, teme tsajtsajtic te siht'emal te c'a'el ay ta sti'ba o ta spat jol, hich te bin ut'il ya spas te c'a'el-chamel ta snuhculel te baq'uete,

⁴⁴ha c'a'el-chamel abi, bohloben sc'oblal, ya me yal te sacerdote te ma ba lequix sc'oblal; ay c'a'el ta sjol.

⁴⁵Te mach'a yich'oj te c'a'el-chamel ya me slap ch'i'em sc'u' spac', watal te sjole, soc j'ohlil macal yelaw ya me x'awon: ¡Ma lecuc jc'oblal! ¡Ma lecuc jc'oblal! xchi me.

⁴⁶Te jayeb c'ahc'al yich'oj te c'a'ele, bohloben sc'oblal ya xhil. Stuquel ya xnahin ta fuera yu'un te campamento.

⁴⁷Teme ay ya xchicnaj stotol te c'u'ul pasbil ta lana o ta lino,

⁴⁸o jalbil pac' pasbil ta lino o lana, te nuhcul, o biluc a te pasbil ta nuhcul,

⁴⁹teme yax, o tsaj te stotol te ay ta c'u'ul o ta nuhcul, o bin jalbil, o biluc a te pasbil ta nuhcul, ha stotol te ya xlajinwan abi; ya me x'a'bot yil te sacerdote.

⁵⁰Te sacerdote ya me stsahtay yil ta lec te stotole, ya me smac huqueb c'ahc'al te bin ay stotole.

⁵¹Ta shuquebal c'ahc'al ya me yil te stotol; teme puhquemix a tey ta c'u'ul, o bin jalbil, ta nuhcul, o biluc a te pasbil ta nuhcul, ha stotol te ya xlajinwan, bohloben sc'oblal ya xhil.

⁵²Ya me yich' chiq'uel te c'u'ul, te bin jalbil ta lana o ta lino, o biluc a te pasbil ta nuhcul te ay stotole,[6] como ha stotol te ya xlajinwan; ya me yich' chiq'uel.

⁵³Pero teme ya stsahtay yil ta lec te sacerdote, teme ya yil te ma ba yac ta puhquel bahel te stotol te c'u'ul, bin jalbil, o biluc a te pasbil ta nuhcul,

⁵⁴ya me yal te sacerdote te ya yich' saq'uel te banti ay te stotole, soc ya smac huqueb xan c'ahc'al.

⁵⁵Te c'alal la yich'ix saq'uel a te stotole, ya stsahtay xan yil ta lec te sacerdote; teme ya yil te ma ba yanijem te stotole, aunque ma ba puhc xan bahel, bohloben sc'oblal, ya me achic' como lohmenix sohlel ta jehch.

⁵⁶Pero teme ya stsahtay yil ta lec te sacerdote, teme yac ta ch'ayel bahel te c'alal la yich'ix saq'uele, ya me sch'i' loq'uel ta c'u'ul, ta nuhcul, o ta jalbil pac'.

⁵⁷Teme ya xchicnaj yan buelta ta c'u'ul, bin jalbil, o biluc a te pasbil ta nuhcul, teme yac ta puhquele, ya me achic' te bintic ay stotole.

⁵⁸Pero te c'u'ul, jalbil pac', o biluc a te pasbil ta nuhcul te ch'ay stotol c'alal la yich' saq'uele, ya me yich' saq'uel yu'un schebal buelta, hich me lecubenix sc'oblal ya xhil, xchi te Jehová.

⁵⁹Ha mandaril ini sc'oblal te stotol ya xlajinwan te ay ta c'u'ul pasbil ta lana o ta lino, ta jalbil pac', o biluc a te pasbil ta nuhcul, scuenta yu'un ya xhu' ya yich' halel teme lec o teme bohloben sc'oblale.