Read Tzeltal Levítico 16 Bible Online

Levítico 16 - Tzeltal bible

Levítico 16

¹Te Jehová la sc'opon te Moisés te c'alal chamenix a te cheb snich'nab Aarón, te chamic c'alal nohpojic bahel ta stojol Jehová.

²Te Jehová la yalbe te Moisés: Halbeya te abanquil Aarón te ma biluc nax ora ya x'och bahel ta yutil te ch'ul awilal ta spat te tsalul pac', ta stojol te yawil stahel perdón te ay ta sba te scaxahul te chapbil-c'op, scuenta yu'un ma ba ya xcham a; como ya cac' chicnajucon ta tocal ta sba te yawil stahel perdón.

³Hich ya x'och bahel te Aarón ta ch'ul awilal: Ya x'och soc jcoht jcolel toro scuenta mahtanil yu'un mulil soc jcoht tat tuminchij scuenta scohtol chic'bil mahtanil.

⁴Ya slap bahel te ch'ultesbil smuc'ul-c'u' pasbil ta lino, ya slap te comil-wexal pasbil ta lino, ya schuc te schuhquil sch'uht pasbil ta lino, soc ya slap te spixjol lino-pac'. Ha te ch'ul c'u'uletic, ha ya slap te c'alal atinemix a.

⁵Ta banti te pueblo yu'un te snich'nab Israel te Aarón ya yic'be cha'coht tat tentsun scuenta mahtanil yu'un mulil soc jcoht tat tuminchij scuenta scohtol chic'bil mahtanil.

⁶Te Aarón ya yac' te jcolel toro yu'un scuenta stojel smul soc smul te mach'atic ay yu'un ta sna.

⁷Patil ya stsac te cha'coht tentsun yu'un te pueblo, ya yac'ticlan ta stojol Jehová ta yochibal te Nahilpac' Templo yu'un tahojibal.

⁸Soc ya stsa yil ta scuenta seña ta na'el ta schebal te tentsune; jun número yu'un Jehová, yan número yu'un Azazel.[11]

⁹Te Aarón ya yic' tal te tentsun te c'oht ta scuenta te seña ta na'el yu'un Jehová, ha ya yac' scuenta mahtanil yu'un mulil.

¹⁰Yan te tentsun te c'oht ta scuenta te seña ta na'el yu'un Azazel, cuxul ya yac' ta stojol Jehová yu'un ya yich' pasel stojel mulil ta scuenta, yu'un ya yich' ticonel bahel ta Azazel ta jochol taquin q'uinal.

¹¹Te Aarón ya yic' tal te jcolel toro te ya xtuhun scuenta mahtanil yu'un smul, ya smil te jcolel toro scuenta milbil mahtanil yu'un smul soc smul te mach'atic ay yu'un ta sna.

¹²Ya stsac jun schic'ojibal pom nojel ta ac'al te talem ta scajtajib ta chiq'uel mahtanil ay ta stojol Jehová, soc cha'johp juch'bil te bin sumet yic', ya yich' bahel ta spat te tsalul pac'.

¹³Ya yotses te pom ta sba ac'al ta stojol Jehová, te sch'ahilel pom ya spots te yawil stahel perdón ay ta sba te yawil Testigo-c'op, scuenta yu'un ma ba ya xcham a.

¹⁴Ya yich'be sch'ich'el te toro, ta yal sc'ab ya stsihtsin ta yawil stahel perdón ta stojol banti ya xloc' tal c'ahc'al; soc ya stsihtsin ta ch'ich' ta yal sc'ab huqueb buelta ta stojol te yawil stahel perdón.

¹⁵Patil ya smil te tat tentsun scuenta mahtanil yu'un smul te pueblo, ya yich'be ochel te sch'ich'el ta yutil te tsalul pac'; hich ya spas te bin ut'il la spasbe te sch'ich'el te jcolel toro, ya stsihtsimbe ta sba soc ta stojol te yawil stahel perdón.

¹⁶Hich ya slecubtesbe sc'oblal a te ch'ul awilal ta scaj sbohlilic te snich'nab Israel soc stoybahilic soc spisil smulic. Hich nix ya spasbe te Nahilpac' Templo yu'un tahojibal te ay ta yohlil te sbohlilique.

¹⁷Ma me ayuc mach'a ay ta yutil a te Nahilpac' Templo yu'un tahojibal te ya x'och ta ch'ul awilal ta spasel te stojel mulil, ha to c'alal ya xloc' tal. Te c'alal la spasix te stojel smul soc smul te mach'atic ay yu'un ta sna, soc smul spisil te pueblo yu'un te snich'nab Israel,

¹⁸ya xloc' bahel ta scajtajib ta chiq'uel mahtanil te ay ta stojol Jehová, ya spasbe te stojel mulil; ya yich'be sch'ich'el te jcolel toro soc sch'ich'el te tat tentsun, ya sjaxbe ta xulubiletic ta sjoyobal te scajtajib ta chiq'uel mahtanil.

¹⁹Ya stsihtsin ta ch'ich' ta yal sc'ab huqueb buelta ta sba, hich ya slecubtesbe sc'oblal a soc ya sch'ultes yu'un te sbohlilic te snich'nab Israel.

²⁰C'alal ya xlaj ta spasbeyel te stojel mulil yu'un te ch'ul awilal, te Nahilpac' Templo yu'un tahojibal, soc te scajtajib ta chiq'uel mahtanil, ya me sticon ta iq'uel tal te cuxul tat tentsun;

²¹te Aarón ya scajan sc'ab ta sjol, ya yal ta stojol spisil te bin chopol spasojic te snich'nab Israel, ha te stoybahilic soc spisil smulic. Hich ya ya'be ta sjol te tat tentsun, soc ya scoltay bahel ta jochol taquin q'uinal ta scuenta jtuhl winic te tsahbile.

²²Te tat tentsun ya scuchbe bahel spisil smulic ta lugar banti mayuc mach'atic nahinemic. Te winic ya yihquitay hilel te tat tentsun ta jochol taquin q'uinal.

²³Patil te Aarón ya x'och bahel ta Nahilpac' Templo yu'un tahojibal, ya sloq'ues te lino c'u'uletic slapoj yu'un ya x'och bahel ta ch'ul awilal, ya yihquitay hilel tey a.

²⁴Ya x'atin ta lugar te ch'ultesbil, patil ya slap sc'u' spac' soc ya xloc' bahel, ya yac' te scohtol chic'bil mahtanil yu'un soc yu'un te pueblo, hich ya spasbe te stojel smul soc te smul te pueblohe.

²⁵Ya schic' ta scajtajib ta chiq'uel mahtanil te sjuhp'el te milbil mahtanil yu'un mulil.

²⁶Te mach'a c'oht scoltay bahel ta stojol Azazel te tentsun, ya me sac' sc'u' spac' soc ya me x'atin; patil ya xhu' ya x'och tal ta campamento.

²⁷Patil ya yich'ic loq'uel ta fuera yu'un te campamento te jcolel toro soc te tentsun scuenta mahtanil yu'un mulil, te la yich' ich'beyel ochel sch'ich'elic ta ch'ul awilal scuenta spasel stojel mulil, ya schiq'uic tey a te snuhculel, sbaq'uetal soc stsa'.

²⁸Te mach'a ya schic' ya sc'an ya sac' sc'u' spac' soc ya x'atin, patil ya xhu' ya x'och tal ta campamento.

²⁹Ha mandaril awu'unic ini te ma xlaj sc'oblal: Ta lajuneb c'ahc'al yu'un te shuquebal u ya me acom abahic ta spasel te bin scuenta abaq'uetal,[12] soc ma ba yac apas awa'telic a, te mach'a ha nix slumal soc te jyanlum nahinem ta awohlilique,

³⁰como ha sc'ahc'alel te ya yich' pasel te stojel mulil awu'unic, hich ya xlecubex yu'un spisil amulic ta stojol Jehová.

³¹Ha sc'ahc'alel cux-o'tan awu'unic soc te yac acom abahic ta spasel te bin scuenta abaq'uetal; ha mandaril te ma xlaj sc'oblal.

³²Ha ya spas te stojel mulil te sacerdote te malot ta aceite soc te ch'ultesbil scuenta sjelol ta sacerdotehil te state; ya me slap te ch'ultesbil c'u'ul pasbil ta lino,

³³soc ya me slecubtesbe sc'oblal te Mero Ch'ul Awilal, te Nahilpac' Templo yu'un tahojibal, te scajtajib ta chiq'uel mahtanil, te sacerdotehetic soc spisil te pueblohe.

³⁴Ha mandar awu'unic te ma xlaj sc'oblal scuenta spasel stojel mulil jun buelta ta jujun ha'bil, yu'un spisil smul te Israel, xchi te Jehová. Te Moisés hich la spas te bin ut'il halbot yu'un Jehová.