Read Tzeltal Levítico 18 Bible Online

Levítico 18 - Tzeltal bible

Levítico 18

¹Te Jehová la yalbe te Moisés:

²Hich yac awalbe te snich'nab Israel: Ho'on Jehovahon te Dioson awu'unic.

³Ma me hichuc xapasic te bin ya spasic ta sq'uinal Egipto te banti nahinex; soc ma hichuc xapasic te bin ya spasic ta sq'uinal Canaán te banti ya quiq'uex bahel, ma me xat'umbeyic te bin ya spasique.

⁴Ac'a c'ohtuc ta pasel awu'unic te bintic caloj, pasahic te bin chapal cu'un, ha me xat'unic. Ho'on Jehovahon te Dioson awu'unique.

⁵Ha yu'un ch'uhunahic spasel te bintic chapal cu'un soc te bintic caloj ta mandar. Te mach'a ya spas, ya me xcuxaj yu'un. Ho'on, Jehovahon.

⁶Ma me ayuc winic te ya xway soc te ants jun sts'umbal soc. Ho'on, Jehovahon.

⁷Ma me xabohlobtesbe sc'oblal atat yu'un te ya xwayat soc anan; ha mero anan, ma me xwayat soc.

⁸Ma me xwayat soc te yihnam te atate, ya xbohlob sc'oblal atat yu'un.

⁹Ma me xwayat soc awix o awihts'in, teme yantsil-nich'an atat o yantsil-al anan, teme ayinem ta ana o ayinem ta yan lugar, ma me xwayat soc.

¹⁰Ma me xwayat soc te yantsil-nich'an te aquerem-nich'an o te yantsil-al te awantsil-nich'an, como ha'at nix yac abohlobtes ac'oblal a.

¹¹Ma me xwayat soc te yantsil-al te yihnam atat, te ha nix yantsil-nich'an te atate, como ha nix awihts'in.

¹²Ma me xwayat soc te swix o yihts'in te atate, como junax sts'umbal soc te atate.

¹³Ma me xwayat soc te swix o yihts'in te anane, como junax sts'umbal soc te anane.

¹⁴Ma me xabohlobtesbe sc'oblal atajun, ma me xwayat soc te yihnam, como ha yihnam te atajune.

¹⁵Ma me xwayat soc te awalib, como ha yihnam te anich'ane, ma me xwayat soc.

¹⁶Ma me xwayat soc te yihnam abanquil o awihts'in, ya me xbohlob sc'oblal a te abanquil o awihts'in.

¹⁷Ma me xwayat soc jtuhl ants soc yantsil-al; ma me xwayat soc te yil-ale, como jun sts'umbalic; mero ma lecuc ta pasel.

¹⁸Ma me pajaluc xawic' soc swix o yihts'in awihnam te hich yac awa'be scontrahin sbahic, ma me xwayat soc teme cuxul to te awihname.

¹⁹Ma me xwayat soc ants te c'alal bohloben sc'oblal yu'un yac yilbel schamel.

²⁰Ma me xwayat soc yihnam apat-axuhc, te hich ya xbohlob ac'oblal soc.

²¹Ma me xawa'be smahtanin ta c'ahc' ni jtuhluc anich'nab te dios Moloc. Ma me hichuc xawac' bohlobuc sc'oblal sbihil a te Dios awu'une. Ho'on, Jehovahon.

²²Ma me xwayat soc winic hich te bin ut'il ya xwayat soc ants; ihlaybil me.

²³Ma me xacuch aba soc chambahlam, te hich yac abohlobtes ac'oblal a; ha nix hich te antse, ma me xyac' sba ta cuchel yu'un chambahlam; jc'axel ma lecuc.

²⁴Ma me xabohlobtes ac'oblalic ta scuenta spasel ini; como ha ta scuenta ini te bohlob sc'oblal te nacionetic te ya jloq'ues ta atojolic,

²⁵soc te bohlob sc'oblal te lumq'uinale. La jca'be castigo yu'un te smule, soc te lumq'uinal la xehtay loq'uel te swinquilele.

²⁶Pero ha'ex ac'a c'ohtuc ta pasel awu'unic te bintic chapal cu'un soc te bintic caloj, ma me xapasic te bintic mero ilobtic sba ini, ha te mach'a slumal nix soc te jyanlum nahinem ta awohlilic,

²⁷como spisil te bintic mero ilobtic sba ini la spasic te mach'atic nahil nahinic tey ta lumq'uinal, te hich bohlob a te q'uinale.

²⁸Ma me xehtayex loq'uel te lumq'uinal ta scaj te la abohlobtesic, hich te bin ut'il la xe'tayix loq'uel te mach'atic nahil nahinic tey a.

²⁹Como mach'ayuc a te ya spas te bin mero ilobtic sba ini, ya me yich' loq'uesel ta yohlil te slumale.

³⁰Ha yu'un, pasahic te bintic caloje, ma me xapasic te bintic mero ilobtic sba la spasic te c'alal ma to talex a, scuenta yu'un ma ba yac abohlobtes ac'oblalic a. Ho'on, Jehovahon, te Dioson awu'unique, xchi.